ដោយ ឡុង សារេត
ភ្នំពេញ៖ តម្លៃកង្កែបសាច់នៅលើទីផ្សារគិតមកដល់ថ្ងៃទី១២ ខែសីហានេះ ត្រូវបានមើលឃើញថា មិនទាន់មានសញ្ញាល្អធ្វើឱ្យកសិករក្នុងស្រុក ដែលជាអ្នកចិញ្ចឹមអាចលក់បានប្រាក់ចំណេញត្រឡប់មកវិញនោះទេ បន្ទាប់ពីសមាគមវារីវប្បករនៅកម្ពុជា បានអំពាវនាវឱ្យស្ថាប័នពាក់ព័ន្ធចាត់វិធានការទប់ស្កាត់ពីការធ្លាក់ចុះតម្លៃ នៅខែមេសា ឆ្នាំ២០២៦ ពីតម្លៃជាង៧ ០០០រៀល មកនៅ៥ ០០០រៀល ក្នុងមួយគីឡូក្រាម។
លោក ឡែមផូរ សុថារិទ្ធ ប្រធានគណៈកម្មការប្រតិបត្តិសមាគមវារីវប្បករនៅកម្ពុជា បានឱ្យដឹងថា តម្លៃកង្កែបសាច់ដែលសមាគមបានចែករំលែកនៅលើបណ្តាញទំនាក់ទំនងសង្គម កាលពីខែកក្កដា រហូតមកដល់ថ្ងៃទី១២ ខែសីហានេះ សមាគមបានធ្វើបច្ចុប្បន្នភាពតម្លៃកង្កែបសាច់ឡើងវិញ ដោយកង្កែបសាច់មួយគីឡូក្រាមឡើងថ្លៃបាន១០០រៀល ទៅ២០០រៀល ចំណែកនៅតាមកន្លែងខ្លះឡើងថ្លៃបាន៣០០រៀល។
ស្របពេលតម្លៃកង្កែបសាច់មានការប្រែប្រួលចន្លោះពី១០០រៀល ទៅ៣០០រៀល ក្នុងមួយគីឡូក្រាមក៏ដោយ ប៉ុន្តែមិនទាន់ឡើងដល់ថ្លៃដើមផលិតរបស់កសិករនៅឡើយទេ។ ពោលថ្លៃដើមផលិតកង្កែបសាច់មួយគីឡូក្រាម កសិករចំណាយពី៥ ៧០០រៀល ទៅ៦ ០០០រៀល ដូច្នេះដើម្បីអាចបានប្រាក់ចំណេញ ទាមទារឱ្យកសិករលក់ក្នុងតំម្លៃចាប់ពី៦ ៥០០រៀលឡើងទៅ ក្នុងមួយគីឡូក្រាម។
លោកបន្តថា បច្ចុប្បន្នកសិដ្ឋានចិញ្ចឹមកង្កែប ដែលជាសមាជិកសមាគមនៅសល់កង្កែបក្នុងស្តុកសរុបប្រមាណ១១៥តោន ព្រោះតម្លៃលក់នៅលើទីផ្សារទាបជាងថ្លៃដើមផលិត។ ប៉ុន្តែនៅលើទីផ្សារមានឈ្មួញនាំចូលមកបោះដុំលក់ដល់អ្នកប្រើប្រាស់ក្នុងស្រុក ខណៈអ្នកប្រមូលទិញកង្កែបសាច់ពីកសិករនៅតាមតំបន់បានផ្អាកដោយសារលក់មិនបានចំណេញ។
ប្រធានគណកម្មការប្រតិបត្តខាងលើនេះ បានលើកឡើងទៀតថា បើកង្កែបដល់អាយុកាលត្រូវលក់ចេញហើយ បែរជាលក់មិនចេញដោយសារតម្លៃទាបនេះ វាធ្វើឱ្យកសិករត្រូវការចំណាយថ្លៃដើមខ្ពស់។ តែទោះជាបែបនេះក្តី ក៏មានអ្នកចិញ្ចឹមខ្លះត្រូវបង្ខំចិត្តលក់ចេញខ្លះ ទោះបីដឹងថាខាតក្តី។ ដោយឡែកសម្រាប់អ្នកចិញ្ចឹមផ្សេងទៀត គេប្រើវិធីផ្អាកការផ្តល់ចំណី៥០ភាគរយ ដើម្បីរង់ចំាំទីផ្សារងើបឡើងវិញទើបផ្តល់ចំណីឱ្យគ្រប់គ្រាន់ឡើងវិញ។
លោក ឡែមផូរ សុថារិទ្ធ បានបន្តថា បច្ចុបន្នសមាជិកសមាគម ដែលប្រកបមុខរបរចិញ្ចឹមកង្កែបមាននៅខេត្តសៀមរាប កំពង់ចាម ពោធិ៍សាត់ ព្រៃវែង និងខេត្តតាកែវ។ ខណៈបញ្ហាតម្លៃកង្កែបសាច់ធ្លាក់អស់រយៈពេលជាច្រើនខែកន្លងមកនេះ ខាងសមាគមមិនទាន់អាចវាយតម្លៃ ឬអាចសន្និដ្ឋានថា អាចដោះស្រាយបញ្ហានេះនៅពេលណានៅឡើយនោះទេ។ ប៉ុន្តែទាមទារឱ្យស្ថាប័នពាក់ព័ន្ធរួមគ្នាត្រួតពិនិត្យការនាំចូលឱ្យបានតឹងរឹងតាមច្រកព្រំដែន និងកាត់បន្ថយកូតានាំចូលជាដើម៕
