ព្រះវិហារ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានសមាគមបណ្តាញកសិករតេជោ នាព្រឹកថ្ងៃទី១២ ខែសីហា ឆ្នាំ២០២៦ ក្នុងឱកាសចុះជួបសំណេះសំណាល និងសួរសុខទុក្ខប្រជាកសិករនៅស្រុកឆែប ខេត្តព្រះវិហារ ព្រមទាំងបានណែនាំជាថ្មីដល់កសិករត្រូវយកចិត្តទុកដាក់ជាសំខាន់លើការរៀបចំផែនការផលិតកម្ម ដូចជាការគណនាថ្លៃដើមផលិត និងការសិក្សាអំពីទីផ្សារមុនពេលសម្រេចចិត្តដាំដំណាំអ្វីមួយ។
នៅក្នុងពិធីសំណេះសំណាលនេះក៏មានការចូលរួមពីលោក ឃិត សុធារ៉ា អភិបាលនៃគណៈអភិបាលស្រុកឆែប ក្រុមការងារសមាគមបណ្តាញកសិករតេជោ,តំណាងមន្ទីរកសិកម្មខេត្ត រដ្ឋបាលស្រុក ការិយាល័យជំនាញកសិកម្មស្រុក មេឃុំទាំង៨ មេភូមិ តំណាងសមាគមកសិករ និងប្រជាពលរដ្ឋសរុបប្រមាណ២៥០នាក់។
ឯកឧត្តមបណ្ឌិត កៅ ថាច បានថ្លែងក្នុងឱកាសនេះថា គោលបំណងសំខាន់នៃការជួបប្រជាពលរដ្ឋ គឺដើម្បីពិគ្រោះយោបល់ទៅវិញទៅមក ផ្តល់ព័ត៌មាន និងចែករំលែកចំណេះដឹងពាក់ព័ន្ធនឹងបច្ចេកទេសកសិកម្ម ព្រមទាំងស្វែងយល់ឱ្យបានច្បាស់ពីការលំបាក និងបញ្ហាប្រឈមរបស់កសិករ។ ដូច្នេះការចុះជួបដោយផ្ទាល់ គឺចង់ដឹងតម្រូវការជាក់ស្តែងរបស់កសិករ មិនមែនជាវេទិកាសម្រាប់ថ្លែងសុន្ទរកថាតែមួយមុខនោះទេ។
លើសពីនេះឯកឧត្តមបណ្ឌិត កៅ ថាច បានរំលឹកកសិករថា ការធ្វើកសិកម្មមិនគួរធ្វើតាមអារម្មណ៍ ឬតាមការឃើញអ្នកដទៃធ្វើនោះទេ ប៉ុន្តែត្រូវផ្អែកលើព័ត៌មានទីផ្សារច្បាស់លាស់ ត្រូវចេះគិតថ្លៃដើមផលិតកម្ម ទើបទទួលបានប្រាក់ចំណេញ។ ជាក់ស្តែងកសិករដាំស្វាយចន្ទីគួរតែសួរខ្លួនឯងជាមុនថា ហេតុអ្វីបានជាត្រូវដាំស្វាយចន្ទី តើទីផ្សារនៅទីណា តើការចំណាយក្នុងមួយហិកតាបានផលប៉ុន្មាន ហើយទិន្នផលរំពឹងទុកបានប៉ុន្មាន មានន័យថា ការគណនាបែបនេះអាចជួយឱ្យកសិករដឹងថា តើក្នុងផលិតកម្មរបស់ខ្លួនមានប្រសិទ្ធភាព និងអាចទទួលបានប្រាក់ចំណេញកម្រិតណា។
ជាមួយគ្នានេះដែរ កសិករត្រូវចេះកត់ត្រាលើការចំណាយ និងចំណូលឱ្យបានច្បាស់លាស់ប្រចាំថ្ងៃ ដើម្បីអាចវាយតម្លៃពីប្រសិទ្ធភាពនៃការផលិត និងសម្រេចចិត្តបានត្រឹមត្រូវថា តើគួរបន្តដាំដំណាំណា ឬផ្លាស់ប្តូរទៅដំណាំណា ដែលមានទីផ្សារអាចផ្តល់ប្រាក់ចំណេញល្អជាង។
លើសពីនេះទៀត កសិករត្រូវចេះជ្រើសរើសពូជណាមានគុណភាព និងត្រូវបានបន្សុទ្ធត្រឹមត្រូវ ជំនួសឱ្យការប្រើពូជចាស់ ឬពូជមិនមានប្រភពច្បាស់លាស់។ ការជ្រើសរើសពូជល្អ ត្រូវភ្ជាប់ជាមួយការថែទាំត្រឹមត្រូវ ការប្រើប្រាស់ជីធម្មជាតិ និងវិធីសាស្ត្រគ្រប់គ្រងសត្វល្អិតឱ្យមានប្រសិទ្ធភាព ដើម្បីកាត់បន្ថយថ្លៃដើម និងបង្កើនទិន្នផលខ្ពស់ជាងមុន។
ជាចុងក្រោយ ឯកឧត្តមបណ្ឌិតប្រតិភូបានបញ្ជាក់ប្រាប់កសិករថា សូមឱ្យប្រជាពលរដ្ឋចូលរួម បើកគណនីធនាគារ ARDB និងប្រើប្រាស់ប្រព័ន្ធទូទាត់ឌីជីថល (ARDB App) ដើម្បីងាយស្រួលក្នុងការទូទាត់សាច់ប្រាក់ និងផ្ទេរប្រាក់ ក្នុងនោះអាចប្រើប្រាស់សេវាហិរញ្ញវត្ថុកាន់តែងាយស្រួល និងមានសុវត្ថិភាពបំផុត។
ជាពិសេសកម្ចីពីធនាគារ ARDB អាចប្រើប្រាស់ក្នុងគោលបំណងពាក់ព័ន្ធនឹងកសិកម្ម ដូចជា ការដាំដុះ ការចិញ្ចឹមសត្វ ការកែច្នៃ និងសកម្មភាពអាជីវកម្មក្នុងខ្សែច្រវាក់កសិកម្ម ពោលធនាគារ ARDB ត្រូវបានបង្កើតឡើង ដើម្បីផ្តល់ហិរញ្ញប្បទានក្នុងការធ្វើកសិកម្ម ការកែច្នៃផលិតផលកសិកម្ម និងមុខរបរពាក់ព័ន្ធនឹងវិស័យកសិកម្ម ដោយមានលក្ខខណ្ឌ អត្រាការប្រាក់ទាប និងមានភាពបត់បែនជានិច្ច៕
