ដោយ ឡុង សារេត
កំពត៖ ប្រធានសមាគមលើកកកម្ពស់ម្រេចកំពតបានឱ្យដឹងថា ម្រេចកំពតជាផលិតផលម៉ាកសម្គាល់ភូមិសាស្ត្រទំនិញប្រចាំខេត្តកំពតត្រូវបាននាំចេញទៅកាន់ទីផ្សារពិភពលោកប្រមាណ៨០ភាគរយ ក្នុងចំណោមទិន្នផលសរុបប្រមាណ១២០តោន ក្នុងមួយឆ្នាំ ហើយតម្លៃនៅតែរក្សាបានថ្លៃខ្ពស់មិនប្រែប្រួល ឬធ្លាក់ចុះដូចកសិផលសក្តានុពលរបស់កម្ពុជាផ្សេងទៀត។
លោក ស៊ីម សុទុន ប្រធានសមាគមលើកកម្ពស់ម្រេចកំពតបានឱ្យដឹងថា បច្ចុប្បន្នសមាគមមានសមាជិកដែលកសិករដាំម្រេចមានចំនួន៣៤៥នាក់ មានផ្ទៃដីសម្រាប់ផលិតម្រេចប្រមាណ២០០ហិកតា ដែលក្នុងមួយឆ្នាំអាចប្រមូលផលបានពី១១០ ទៅ១២០តោន។
លោកលើកឡើងថា ទៅជាទូទៅ និងយោងទៅតាមសៀវភៅបន្ទុករបស់ម្រេចកំពត កសិករចាប់ផ្តើមប្រមូលផលម្រេចពីខែមករា រហូតដល់ខែមិថុនា ឬកក្កដា។ ប៉ុន្តែនៅឆ្នាំ២០២៦នេះ ដោយសារអាកាសធាតុមានការប្រែប្រួលធ្វើឱ្យដំណាំម្រេចត្រូវបានពន្យាពេល ដូច្នេះការប្រមូលផលអាចបញ្ចប់នៅខែសីហានេះ។
ទន្ទឹមនឹងការប្រមូលផលម្រេចនៅឆ្នាំ២០២៦ មិនទាន់បានបិទបញ្ចប់, បើតាមលោក ស៊ីម សុទុន ប្រធានសមាគមលើកកម្ពស់ម្រេចកំពត បានគូសបញ្ជាក់ថា ក្នុងបរិមាណម្រេចកំពតមួយឆ្នាំ ដែលកសិករផលិតបានពី១១០ ទៅ១២០តោន។ ចំណែកប្រមាណ៨០ភាគរយ ដែលក្រុមហ៊ុនទិញពីកសិករ ត្រូវបាននាំចេញទៅទីផ្សារសហភាពអឺរ៉ុប៧០ភាគរយ និង១០ភាគរយផ្សេងទៀតនាំទៅសហរដ្ឋអាម៉េរិក និងទីផ្សារបណ្តាប្រទេសផ្សេងទៀតនៅលើពិភពលោក។
លោកបន្តថា តម្លៃម្រេចក្រុមហ៊ុនឱ្យតម្លៃផ្សេងៗគ្នា ប៉ុន្តែមានក្រុមហ៊ុនមួយចំនួនឯកភាពក្នុងការទិញទៅលើប្រភេទម្រេចខ្មៅមួយគីឡូក្រាម ថ្លៃពី២០ ទៅ២៣ដុល្លារ,ម្រេចក្រហមតម្លៃ៣០ ទៅ៣៣ដុល្លារ និងម្រេចសតម្លៃ៣៤ ទៅ៣៥ដុល្លារ។
ទាក់ទងនិងដំណាំម្រេចកំពតនេះដែរ, លោក ចាន់ រិទ្ធិ ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពត ធ្លាប់មានប្រសាសន៍ថាវិស័យកសិកម្ម គឺជាវិស័យមួយ ដែលជាសរសរទ្រូងដ៏សំខាន់សម្រាប់សេដ្ឋកិច្ចជាតិ និងជាជីវភាពរបស់ប្រជាពលរដ្ឋ។ ទោះយ៉ាងណាក៏ដោយកសិករកំពុងប្រឈមខ្លាំងនិងការប្រែប្រួលអាកាសធាតុ ការកើនឡើងកម្ដៅ និងបាតុភូតមិនប្រក្រតីនានា ដែលបង្កឱ្យប៉ះពាល់ដល់ទិន្នផល គុណភាពកសិផល ពិសេសដំណាំម្រេចកំពត ដែលជាដំណាំសក្តានុពល និងជាម៉ាកសម្គាល់ភូមិសាស្ត្រទំនិញប្រចាំខេត្តកំពត។
លោកលើកឡើងថា “ឆ្លើយតបទៅនិងបញ្ហាខាងលើនេះ។ ការផ្លាស់ប្តូរទម្លាប់របស់កសិករតាមបែបប្រពៃណីមកអនុវត្តកសិកម្មបៃតង និងបច្ចេកវិទ្យាឆ្លាតវៃ ធននឹងអាកាសធាតុ គឺជាតម្រូវការចាំបាច់ ហើយបន្ទាន់បំផុតសម្រាប់យើងទាំងអស់គ្នា។ តួយ៉ាងការសម្ងួតម្រេចដោយប្រើថាមពលពន្លឺព្រះអាទិត្យ មិនត្រឹមតែជួយកាត់បន្ថយនូវឧស្ម័នផ្ទះកញ្ចក់ទេ ប៉ុន្តែថែមទាំងជួយរក្សាបានភាពអនាម័យ និងស្តង់ដារម្រេចកំពតឱ្យកាន់តែប្រសើឡើងថែមទៀត ដើម្បីបង្កើនប្រាក់ចំណូលមួយចំណែកថែមទៀត”៕
