ដោយ ឡុង សារេត
បាត់ដំបង៖ សហគមន៍កសិកម្មទំនើបស្រូវអង្ករសុវត្ថិភាពស្រុកឯកភ្នំ ខេត្តបាត់ដំបង ប្រឈមនិងការបាត់បង់ទិន្នផលស្រូវវស្សាអាចដល់ប្រមាណ២ ០០០តោន នៅក្នុងឆ្នាំ២០២៦នេះ បន្ទាប់ពីដំណាំស្រូវប្រមាណ៣០ភាគរយ រងការខូចខាតដោយសារគ្រោះរាំងស្ងួត ទោះបីការអន្តរាគមន៍ទឹក និងទឹកភ្លៀងជួយសង្គ្រោះស្រូវបានមួយផ្នែកក៏ដោយ។
លោក ណែម ពក ប្រធានសហគមន៍កសិកម្មទំនើបស្រូវអង្ករសុវត្ថិភាពស្រុកឯកភ្នំខេត្តបាត់ដំបងបានឱ្យដឹងថា ក្នុងរដូវកាលគ្រោះរាំងស្ងួតអត់មានទឹកភ្លៀងមួយរយៈកន្លងមកនេះដីស្រែរបស់សមាជិកសហគមន៍ចំនួន ១ ៤២២ហិកតាប្រឈមនិងការខូចខាតដូចទៅនិងស្រូវរបស់កសិករផ្សេងទៀត។ ប៉ុន្តែបន្ទាប់ពីមានទឹកជំនន់កើតមានកន្លងទៅនេះបានធ្វើឱ្យកសិករបានបូមទឹកយកទៅស្រោចស្រពដំណាំស្រូវវស្សារបស់ខ្លួនបានច្រើន បូករួមជាមួយភ្លៀងធ្លាក់ជាប់ៗគ្នាជាបន្តបន្ទាប់នាពេលកន្លងមកនេះ បានជួយសង្គ្រោះស្រូវបានរហូតដល់៧០ភាគរយនៃទំហំផ្ទៃដីសរុប។
លោក ណែម ពក បានវាយតម្លៃថាតាមបទពិសោធន៍កន្លងទៅ ក្នុងចំណោមដីស្រែ១ ៤២២ហិកតាសហគមអាចប្រមូលផលស្រូវបានជាង៦០០០តោនក្នុងមួយរដូវ។ ដោយឡែកនៅឆ្នាំនេះដំណាំស្រូវដែលជួយសង្គ្រោះបាន៧០ភាគរយ រំពឹងថាទទួលបានទិន្នផលស្រូវសរុបជាង៤ ០០០តោន ខណៈស្រូវខូចខាតអស់៣០ភាគរយ ឬស្មើប្រមាណ២០០០តោន។
បើយោងតាមប្រធានសហគមន៍កសិកម្មទំនើបស្រូវអង្ករសុវត្ថិភាពស្រុកឯកភ្នំខាងលើ គិតមកដល់ខែសីហាឆ្នាំ២០១៦នេះ ដំណាំស្រូវវស្សាដែលជួយសង្គ្រោះបាន៧០ភាគរយមិនទាន់ផុតអាយុកាលនៃការដាក់ជីជំរុញការលូតលាស់នៅឡើយនោះទេ ហើយរំពឹងថានៅចុងខែសីហានេះស្រូវទាំងនេះចេញដង្ហើម (ផើម)ដែលអាចឱ្យកសិករប្រមូលផលបានយ៉ាងយូរនៅចុងខែកញ្ញាខាងមុខផងដែរ។
ទន្ទឹមនឹងការប្រមូលអាចឈានទៅសម្រេចបាននៅចុងខែកញ្ញា, លោក ណែម ពក បានឱ្យដឹងថាក្នុងពេលបច្ចុប្បន្នខាងសហគមន៍មិនទាន់បានធ្វើការចុះកុងត្រាជាមួយក្រុមហ៊ុនឬឈ្មួញប្រមូលទិញស្រូវណាមួយនៅឡើយនោះទេ។ កន្លងមកតម្លៃស្រូវដែលកសិករលក់បានប្រាក់ចំណេញពី៩ ០០០ ទៅ១ ០០០រៀល ក្នុងមួយគីឡូក្រាម។ ដូច្នេះផ្នែកទៅលើទំហំនៃការខូចខាតរំពឹងថាតម្លៃស្រូវក្នុងរដូវកាលប្រមូលផលនៅថ្ងៃខាងមុខអាចនឹងកើនឡើងជាងរដូវកាលមុនៗ ព្រោះការផលិតមានមិនច្រើនដូចកាលកន្លងទៅ។
យោងតាម លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ ធ្លាប់ប្រាប់ឱ្យដឹងកាលថ្មីៗនេះថាគិតត្រឹមថ្ងៃទី៣០ ខែកក្កដា ឆ្នាំ២០២៦ ខេត្តរងផលប៉ះពាល់ដោយសារគ្រោះរាំងស្ងួត រួមមាន ខេត្តបន្ទាយមានជ័យ បាត់ដំបង ពោធិ៍សាត់ កំពង់ឆ្នាំង ប៉ៃលិន កំពង់ចាម កំពង់ធំ និងខេត្តសៀមរាប ដោយមានផ្ទៃដីដំណាំស្រូវរងផលប៉ះពាល់សរុបមានជាង២៨៩ពាន់ហិកតា។
លោកលើកឡើងថា រាជរដ្ឋាភិបាលបានចាត់វិធានការអន្តរាគមន៍ជាបន្ទាន់ តាមរយៈក្រសួងធនធានទឹក និងឧតុនិយម ព្រមទាំងក្រសួង ស្ថាប័ន និងអាជ្ញាធរពាក់ព័ន្ធ ដោយអាចជួយសង្គ្រោះផ្ទៃដីដំណាំស្រូវបានប្រមាណ១៤៧ពាន់ហិកតា ដែលធ្វើឱ្យស្ថានភាពដំណាំមានភាពប្រសើរឡើងវិញ។
លោកបានបន្តថា ការអន្តរាគមន៍របស់រាជរដ្ឋាភិបាល គួបផ្សំនឹងការចូលរួមសហការរបស់ប្រជាពលរដ្ឋ និងការធ្លាក់ភ្លៀងជាបន្តបន្ទាប់ក្នុងរយៈពេលកន្លងមក បានធ្វើឱ្យដំណាំស្រូវភាគច្រើនចាប់ផ្តើមលូតលាស់ឡើងវិញ។ ទោះជាយ៉ាងណា ដំណាំស្រូវមួយចំនួនអាចរងផលប៉ះពាល់ដល់គុណភាព និងទិន្នផល ដោយសារការខ្វះខាតទឹកក្នុងអំឡុងពេលកន្លងមក។
បើយោងតាមអ្នកនាំពាក្យខាងលើ ភាពរាំងស្ងួតលើកនេះដែលបណ្តាលមកពីឥទ្ធិពលនៃបាតុភូតអែលនីញ៉ូបានធ្វើឱ្យបរិមាណទឹកក្នុងអាងស្តុកទឹក និងប្រព័ន្ធធារាសាស្ត្រនៅតំបន់មួយចំនួនមានកម្រិតទាបតាំងពីចុងឆ្នាំ២០២៥ ដែលបង្កការលំបាកក្នុងការផ្គត់ផ្គង់ទឹកសម្រាប់ការងារបង្កបង្កើនផលនៅដើមរដូវវស្សាឆ្នាំ២០២៦នេះ។
យោងតាមអង្គការឧតុនិយមពិភពលោក កាលពីថ្ងៃទី៣១ ខែកក្កដា ឆ្នាំ២០២៦ បានបង្ហាញឱ្យដឹងថា បាតុភូតអែលនីញ៉ូកំពុងបន្តពង្រឹងឥទ្ធិពលជាបន្តបន្ទាប់ ហើយត្រូវបានព្យាករថា នឹងក្លាយជាកត្តាសំខាន់ ដែលគ្របដណ្តប់លើលំនាំអាកាសធាតុសកល ក្នុងអំឡុងខែសីហា ដល់ខែតុលា ឆ្នាំ២០២៦។
អង្គការឧតុនិយមពិភពលោក បានគូសបញ្ជាក់ថា បាតុភូតអែលនីញ៉ូដែលកំពុងតែវិវត្តន៍នេះ រួមផ្សំជាមួយសីតុណ្ហភាពផ្ទៃមហាសមុទ្រពិភពលោកនៅតែក្តៅខ្លាំងខុសប្រក្រតី និងលទ្ធភាពកើតមាន បាតុភូតឌីប៉ូលមហាសមុទ្រឥណ្ឌាវិជ្ជមាននឹងជះឥទ្ធិពលយ៉ាងខ្លាំងដល់លំនាំអាកាសធាតុនៅតំបន់ជាច្រើនជុំវិញពិភពលោកក្នុងប៉ុន្មានខែខាងមុខ។
តាមការព្យាកររបស់អង្គការឧតុនិយមពិភពលោកបានបង្ហាញទៀតថា បាតុភូតអែលនីញ៉ូ នឹងបន្តកាន់តែខ្លាំងក្នុងអំឡុងខែសីហា ដល់ខែតុលា ឆ្នាំ២០២៦ ដែលនឹងបង្កើនលទ្ធភាពឱ្យសីតុណ្ហភាពនៅតំបន់ភាគច្រើននៃពិភពលោកខ្ពស់ជាងកម្រិតមធ្យមធម្មតា។ ជាមួយគ្នានេះលំនាំទឹកភ្លៀងក៏នឹងផ្លាស់ប្តូរជាលក្ខណៈពិសេសនៃបាតុភូតអែលនីញ៉ូ ដោយតំបន់ខ្លះត្រូវបានព្យាករថា នឹងមានភ្លៀងធ្លាក់ច្រើនជាងធម្មតា ខណៈតំបន់ផ្សេងទៀតនឹងប្រឈមហានិភ័យខ្ពស់នៃភាពរាំងស្ងួត។
បាតុភូត ឌីប៉ូលមហាសមុទ្រឥណ្ឌាវិជ្ជមានទំនងជានឹងកើតឡើង ដែលអាចពង្រឹងឥទ្ធិពលរបស់អែលនីញ៉ូ និងធ្វើឱ្យការប្រែប្រួលអាកាសធាតុនៅតំបន់មួយចំនួនកាន់តែធ្ងន់ធ្ងរ។
អង្គការឧតុនិយមពិភពលោកបានសង្កត់ធ្ងន់ថា ការព្យាករជាមុនទាំងនេះ ផ្តល់ឱកាសសម្រាប់ប្រទេសនានា អាជ្ញាធរ និងសហគមន៍ រៀបចំវិធានការត្រៀមទុកជាមុន ដើម្បីកាត់បន្ថយហានិភ័យ បង្កើនការសម្រេចចិត្តប្រកបដោយប្រសិទ្ធភាព និងការពារអាយុជីវិត ព្រមទាំងជីវភាពរស់នៅរបស់ប្រជាពលរដ្ឋ។
ជាមួយគ្នានេះ អង្គការឧតុនិយមពិភពលោក បានអះអាងថា បណ្តាញអ្នកជំនាញ និងស្ថាប័នសមាជិករបស់ខ្លួននៅទូទាំងពិភពលោក កំពុងសហការយ៉ាងជិតស្និទ្ធ ដើម្បីតាមដានការវិវត្តនៃបាតុភូតអែលនីញ៉ូ ផ្តល់ព័ត៌មានព្យាករណ៍ទាន់ពេលវេលា និងគាំទ្រដល់វិធានការកាត់បន្ថយផលប៉ះពាល់លើជីវិត និងជីវភាពរស់នៅរបស់ប្រជាជន៕
