ដាកា៖ មន្ត្រីជាន់ខ្ពស់នៅក្រសួងកសិកម្មបង់ក្លាដែស បាននិយាយថា ភ្លៀងធ្លាក់ខ្លាំងក្នុងរយៈពេលមួយសប្តាហ៍កន្លងមកនេះ និងទឹកហូរពីតំបន់ខ្ពង់រាប បានបំផ្លាញដំណាំលើផ្ទៃដីជាង២ ១០៩ហិកតា ក្នុងប្រទេសបង់ក្លាដែស ដែលប៉ះពាល់ដល់ជីវភាពកសិករជាង២២ ៤០០នាក់។
មន្ត្រីដដែលនេះ បានរៀបរាប់ថា ជំនន់ទឹកភ្លៀងនេះ ដែលកើតឡើងនៅភាគខាងលិច មានព្រុំប្រទល់ជាប់ប្រទេសឥណ្ឌា បានបំផ្លាញស្រូវសន្ទូងអស់ជាង១ ៥៣៤ហិកតា ប៉ះពាល់ជីវិតកសិករជាង១២ ០០០នាក់។ សំណាបលិចទឹកអស់ជាង២៥៥ហិកតា ប៉ះពាល់កសិករជាង២ ៨៥០នាក់។ បន្លែជាង៦៣៨ហិកតា ក៏ត្រូវលិចទឹកអស់ ប៉ះពាល់ជីវភាពកសិករចំនួន៥ ៣៣០នាក់ ខណៈចម្ការដំណាំហូបផ្លែ ខូចអស់ជាង២០ហិកតា ប៉ះពាល់ដល់ជីវភាពកសិករចំនូន៤០៥នាក់។ សរុបផ្ទៃដីដំណាំស្រូវរងផលប៉ះពាល់មានទំហំ២ ១០៩ហិកតា និងប៉ះពាល់ជីវភាពកសិករក្រីក្រជាង២២ ៤០០នាក់។
យ៉ាងហោចណាស់មនុស្សចំនួន៥១នាក់បានស្លាប់ និងជាងមួយលាននាក់បានរងផលប៉ះពាល់ដោយសារភ្លៀងធ្លាក់ខ្លាំងនៅប្រទេសបង់ក្លាដែសក្នុងរយៈពេលប៉ុន្មានថ្ងៃនេះ។ ចំណែកមនុស្សរាប់ពាន់នាក់បានបាត់បង់ផ្ទះសម្បែង បន្ទាប់ពីគ្រោះទឹកជំនន់ភ្លាមៗ និងការរអិលបាក់ដីបានវាយប្រហារផ្នែកធំៗនៃប្រទេស រួមទាំងរដ្ឋធានីដាកាផងដែរ។
ជាងពាក់កណ្តាលនៃចំនួនអ្នកស្លាប់មកទល់នឹងពេលនេះ បានកើតមានឡើងនៅក្នុងទីក្រុងដាកា និងនៅជំរុំជនភៀសខ្លួនរ៉ូហ៊ីងយ៉ា។ កាលពីសប្តាហ៍មុន សិស្សសាលាជាច្រើននាក់ និងគ្រូបង្រៀនម្នាក់ បានស្លាប់នៅពេលទឹកជំនន់ហូរយ៉ាងគំហុកមកជន់ពន្លិចសាលារៀន។
ប្រទេសបង់ក្លាដែស គឺជាប្រទេសស្ថិតក្នុងតំបន់វាលទំនាប និងមានទន្លេច្រើន ហើយតែងតែមានភ្លៀងធ្លាក់ខ្លាំងបង្កជាគ្រោះទឹកជំនន់ក្នុងរដូវវស្សា ប៉ុន្តែក្រុមអ្នកជំនាញបានព្រមានថា ការប្រែប្រួលអាកាសធាតុបានធ្វើឱ្យភ្លៀងធ្លាក់កាន់តែខ្លាំង និងកាន់តែញឹកញាប់។
គ្រោះជំនន់ទឹកភ្លៀងនេះ ត្រូវបានមន្ត្រីជំនាញរបស់ប្រទេសបង់ក្លាដែសចាត់ទុកថា បណ្តាលមកពីការប្រែប្រួលអាកាសធាតុ ដែលបង្កឡើងដោយឥទ្ធពលបាតុភូតធម្មជាតិ អែលនីញ៉ូ ដ៏ខ្លាំងក្លានៅក្នុងប្រវត្តិសាស្ត្រភពផែនដី។
អង្គការមនុស្សធម៌មួយបានព្រមានថា លំនាំបាតុភូតអាកាសធាតុអែលនីញ៉ូ ដែលកំពុងកើនឡើងយ៉ាងឆាប់រហ័ស កំពុងនាំមកនូវទឹកជំនន់ ជំងឺរាតត្បាត និងគ្រោះរាំងស្ងួតយ៉ាងធ្ងន់ធ្ងរដល់សហគមន៍ងាយរងគ្រោះបំផុតមួយចំនួនរបស់ពិភពលោក ដូចជាអាហ្វ្រិកខាងកើត និងទ្វីបអាស៊ី។
កាលសប្តាហ៍មុន គណៈកម្មាធិការសង្គ្រោះអន្តរជាតិ បាននិយាយថា ប្រទេសកេនយ៉ា អ៊ូហ្គង់ដា សូម៉ាលី បង់ក្លាដែស ប៉ាគីស្ថាន និងអាហ្វហ្គានីស្ថាន ស្ថិតក្នុងចំណោមប្រទេសប្រឈមនឹងហានិភ័យខ្លាំងបំផុត ដែលប្រទេសមួយចំនួនបាននិងកំពុងតស៊ូជម្នះរួចទៅហើយជាមួយនឹងភាពអាសន្នផ្នែកមនុស្សធម៌។
មជ្ឈមណ្ឌលព្យាករណ៍អាកាសធាតុរបស់សហរដ្ឋអាម៉េរិក បានប្រកាសកាលពីដើមខែកក្កដាថា បាតុភូតអែលនីញ៉ូ កំពុងពង្រឹងឥទ្ធិពលយ៉ាងឆាប់រហ័ស ដោយមានឱកាសរហូត៨១ភាគរយ នឹងក្លាយជាព្រឹត្តិការណ៍ដ៏មានឥទ្ធិពលបំផុតមួយ ចាប់តាំងពីឆ្នាំ១៩៥០ ដែលទំនងជាឈានដល់កម្រិតកំពូលនៅចន្លោះខែតុលា និងខែធ្នូ ឆ្នាំ២០២៦នេះ។
ចំណែកទីភ្នាក់ងារអាកាសធាតុរបស់អង្គការសហប្រជាជាតិ ដែលជាអង្គការឧតុនិយមពិភពលោក បាននិយាយកាលពីដើមខែកក្កដា បានប្រកាសថា ស្ថានភាពអែលនីញ៉ូនឹងឡើងឥទ្ធិពលយ៉ាងឆាប់រហ័សនៅចន្លោះខែកក្កដា និងខែកញ្ញា ឆ្នាំ២០២៦នេះ។
អ្នកវិទ្យាសាស្ត្រអាកាសធាតុ លោក ដានីញ៉ែល ស្វេន (Daniel Swain) បាននិយាយនៅលើឆានែល YouTube របស់គាត់ថា សីតុណ្ហភាពរបស់មហាសមុទ្រប៉ាស៊ីហ្វិកកំពុងស្ថិតក្នុងកម្រិតខ្ពស់បំផុតសម្រាប់ក្នុងឆ្នាំ២០២៦នេះ ដោយចាត់ទុកថា “រឿងរ៉ាវដ៏ធំសម្បើមនៃផលវិបាកដ៏ធំធេងសម្រាប់ពិភពលោក”។
នៅអាហ្វ្រិកខាងកើត លំនាំបាតុភូតអែលនីញ៉ូនេះ ជាធម្មតាមានន័យថា ពាក់កណ្តាលឆ្នាំ២០២៦កាន់តែរាំងស្ងួត បន្ទាប់មកពីខែតុលា ដល់ខែធ្នូនឹ ងមានភ្លៀងធ្លាក់ជោគជាំ បង្កឡើងដោយសារកម្ដៅទឹកនៅក្នុងមហាសមុទ្រឥណ្ឌា។ ចំណែក នៅប្រទេសសូម៉ាលី ភ្លៀងនឹងធ្លាក់ខ្លាំងបានជន់លិចផ្នែកខ្លះនៃរដ្ឋធានីម៉ូហ្គាឌីស្យូ ម្តងហើយម្តងទៀត នៅឆ្នាំ២០២៦នេះ។
ធនាគារពិភពលោកបានព្រមានថា ប្រសិនបើបាតុភូតមហាអែលនីញ៉ូ កើតឡើងដល់កម្រិតមែននោះ ម្លេះទិន្នផលស្រូវអាចធ្លាក់ចុះនៅទូទាំងតំបន់អាស៊ីខាងត្បូង និងអាហ្វ្រិកខាងកើត ដែលជាកន្លែងផលិតស្បៀងអាហារសម្រាប់មនុស្សរាប់រយលាននាក់៕ (ផាន់ អាណា)
