ដោយ ឡុង សារេត
កណ្តាល៖ បច្ចុប្បន្នកសិផលក្នុងស្រុកស្ទើតែប្រភេទ ជួបបញ្ហាទីផ្សារក្នុងរដូវកាលប្រមូល។ ដើម្បីចៀសផុតពីបញ្ហាទីសម្រាប់កសិករត្រូវជ្រើសរើសពូជស្រូវសុទ្ធល្អ ដើម្បីយកទៅបង្កបង្កើន ត្រូវបានគេមើលឃើញថា លក់បានតម្លៃខ្ពស់ និងមិនសូវបារម្ភអំពីទីផ្សារក្នុងរដូវកាលប្រមូលផលចូលមកដល់ បើប្រៀបធៀបជាមួយបណ្តាកសិករប្រើពូជស្រូវតតាមគ្នា និងគ្មានប្រភពច្បាស់លាស់។
លោក សឿង វណ្ណា អនុប្រធានសហគមន៍កសិកម្ម ឧត្តមសុរិយា មានទីតាំងក្នុងស្រុកត្រាំកក់ ខេត្តតាកែវ បានសង្កេតឃើញថា បច្ចុប្បន្នកសិកររស់នៅក្នុងតំបន់ មានការកែប្រែផ្នត់គំនិត និងមានការយល់ដឹងច្រើនទៅលើការប្រើប្រាស់ពូជស្រូវសុទ្ធល្អ ខុសប្លែកពីមុន ដែលកសិករប្រើតែពូជស្រូវតាមទម្លាប់ចាស់ ឬប្រើពូជស្រូវដដែលៗ ធ្វើយូរទៅនាំឱ្យគុណភាពពូជធ្លាក់ចុះ ទិន្នផលស្រូវថយចុះ និងថែមទាំងពិបាកលក់នៅពេលប្រមូលផល។
លោកបញ្ជាក់ថា បន្ទាប់ពីមានក្រុមផលិតពូជស្រូវបង្កើតឡើងមក ពួកគាត់ចាប់ផ្តើមទិញពូជស្រូវសុទ្ធល្អពីសហគមន៍យកទៅប្រើប្រាស់ធ្វើឱ្យទិន្នផលស្រូវកើនឡើង ហើយអ្វីដែលលោកមើលឃើញមានការខុសប្លែកគ្នាខ្លាំងនោះ គឺមានឈ្មួញចង់បាន ដោយសារពូជស្រូវមានភាពសុទ្ធល្អ ហើយតម្លៃក៏បានខ្ពស់ដែរ។ លើសពីនេះ បើកសិករជាសមាជិកក្រុមផលិតពូជថែមទៀត គាត់លក់មកខាងសហគមន៍តាមបែបកិច្ចសន្យាកសិកម្ម ដែលសម្របសម្រួលដោយមន្ទីរកសិកម្ម។
បើតាមអនុប្រធានសហគមន៍ខាងលើ នៅពេលកសិករជ្រើសរើសពូជស្រូវសុទ្ធយកទៅដាំ លោកសង្កេតឃើញ កសិករទទួលបានផលចំណេញ និងទទួលបានទិន្នផលច្រើន៖ ទី១-គាត់កាត់បន្ថយថ្លៃដើមពូជ ធ្លាប់ប្រើពូជ១០០គីឡូក្រាមក្នុងមួយហិកតា មកនៅប្រមាណ៧០គីឡូក្រាម។ ទី២-ពូជសុទ្ធល្អមានភាពធន់ទ្រាំជាមួយអាកាសធាតុ ប្រើរយៈពេលផលិតខ្លី និងប្រើទឹកក៏អស់តិច និងទី៣-កសិករលក់បានតម្លៃខ្ពស់ ហើយងាយស្រួលលក់ មិនត្រឹមតែខាងសហគមន៍ចង់បាន សូម្បីតែឈ្មួញ និងក្រុមហ៊ុនផ្សេងៗសុទ្ធតែត្រូវការ ព្រោះពូជដែលគាត់យកទៅផលិតនោះវាមានភាពសុទ្ធល្អ។
លោក សឿង វណ្ណា ទទួលស្គាល់ថា ជាការពិតនៅពេលកសិករជ្រើសរើសពូជស្រូវសុទ្ធ គាត់អត់សូវខ្វល់រឿង ពេលលក់នោះទេ។ មានន័យថា តែនៅពេលគាត់ធ្វើពូជសុទ្ធ ទោះបីស្រូវសើម គេទិញហើយគាត់មិនទាន់ព្រមលក់ទេ ដោយសារគាត់គិតថា គ្រាន់តែហាលឱ្យស្ងួត និងសម្អាតឱ្យស្អាត គឺអាចលក់បានតម្លៃស្ទើតែគុណនឹងពីរ។ ដូចនេះ សហគមន៍ចង់ឱ្យសមាជិកសហគមន៍ ក៏ដូចជាកសិករនៅក្នុងស្រុក ប្រើប្រាស់ពូជស្រូវសុទ្ធល្អ ទាំងអស់គ្នា ។ ព្រោះវាជារឿងមួយល្អ និងមានអត្ថប្រយោជន៍ច្រើន។
សូមជម្រាបជូនថា សហគមន៍កសិកម្មឧត្តមសុរិយា ចាប់ផ្តើមមានក្រុមផលិតពូជស្រូវសុទ្ធជាក់លាក់ក្នុងឆ្នាំ ២០២១ គិតមកដល់ពេលរយៈពេល៦ឆ្នាំ និងមានសមាជិក៣៣គ្រួសារ។ ពីមុនមានផលិតពូជស្រូវក្រអូប០១ ផ្ការំដួល ចំប៉ីស៧០ ខា១៦ ប៉ុន្តែដោយសារពូជមួយចំនួនមិនសូវមានទីផ្សារ ធ្វើឱ្យកសិករក៏ងាកមករកពូជស្រូវណាដែលសំបូរទីផ្សារ ឬទីផ្សារត្រូវការ ដូចជាពូជស្រូវផ្ការំដួល និងពូជស្រូវសែនក្រអូប០១។ សម្រាប់ការផ្គត់ផ្គង់មានទាំងនៅក្នុងតំបន់ និងក្រៅតំបន់ មានដូចជាខេត្តកំពង់ចាម កណ្តាល បាត់ដំបង ព្រៃវែង ខេត្តស្វាយរៀងជាដើម។
សហគមន៍កសិកម្មឧត្តមសុរិយា ក្នុងឆ្នាំ២០២៣ និងឆ្នាំ២០២៤ ផលិតស្រូវពូជបានប្រមាណ ជាង១១តោន, ឆ្នាំ២០៥ផលិតស្រូវពូជបានចំនួន១៣តោន និងឆ្នាំ២០២៦នេះបានចំនួន៣០តោន៕
