តៃប៉ិ៖ ក្រសួងកសិកម្មតៃវ៉ាន់ បានបញ្ចេញរបាយការណ៍វាយតម្លៃប៉ាន់ប្រមាណថា គិតត្រឹមព្រឹកថ្ងៃទី១៤ ខែកក្កដា ឆ្នាំ២០២៦នេះ វិស័យកសិកម្មរបស់ខ្លួនបានរងការខាតបង់ទឹកប្រាក់សរុបប្រមាណ៧០៦ ០០០ដុល្លារ ក្រោយពីការវាយប្រហារដោយព្យុះប៉ាវី (Bavi)។
នៅក្នុងរបាយការណ៍ដដែល បានបង្ហាញថា ខេត្តម៉ៅលី (Miaoli) គឺជាតំបន់រងគ្រោះធ្ងន់ធ្ងរជាងគេ ដោយមានទំហំខូចខាតគិតជាទឹកប្រាក់រហូតដល់១៥ ៧២លានដុល្លារ ពោលគឺស្មើនឹង៦៩ភាគរយនៃផលប៉ះពាល់សរុបទូទាំងប្រទេស។ ក្រៅពីនេះ តំបន់មួយចំនួនទៀតដូចជា ទីក្រុងតៃប៉ិថ្មី ខេត្តស៊ិនឈូ (Hsinchu) ដែលល្បីខាងបច្ចេកវិទ្យា ទីក្រុងតៃជុង (Taichung) ដែលជាទីក្រុងធំបំផុតលំដាប់ទី២ របស់កោះតៃវ៉ាន់ ស្ថិតនៅភាគកណ្តាល ឈៀងខាងលិច ជាប់នឹងខេត្តម៉ៅលី និងទីក្រុងថៅយួន (Taoyuan) ដែលជាទីក្រុងឧស្សាហកម្មដ៏សំខាន់មួយនៅភាគខាងជើង សម្បូរដោយផ្ទះកញ្ចក់ប្លាស្ទិកសម្រាប់ដាំដំណាំ ក៏បានរាយការណ៍ពីការខាតបង់ផងដែរ។
បើគិតលើការខូចខាតផ្នែកដំណាំវិញ មានទំហំទឹកប្រាក់រហូតដល់៦៣២ ៣៥៧ដុល្លារ ដោយក្នុងនោះ ផ្លែទន្លាប់ រងការខាតបង់ខ្ពស់ជាងគេ ក្នុងទឹកប្រាក់ប្រហែល៣៩០ ៣៤៥ដុល្លារ បន្ទាប់មក គឺផ្លែពុទ្រា ដំណាំស្រូវដើមរដូវ ផ្លែម្រះ និងប៉េងប៉ោះ។
យោងតាមទិន្នន័យ ដីស្រែចម្ការចំនួន២២៦ហិកតា ត្រូវបានបំផ្លាញ ក្នុងនោះមានផ្ទៃដីប្រហែល៥០ហិកតា ដែលជិតដល់ពេលប្រមូលផលទៅហើយ ប៉ុន្តែត្រូវខូចខាតទាំងស្រុង។ លើសពីនេះ គ្រោះធម្មជាតិបានធ្វើឱ្យខូចខាតមធ្យោបាយ និងសម្ភារៈកសិកម្ម មានដូចជាដីស្រែ និងផ្ទះកញ្ចក់ប្លាស្ទិក គិតជាទឹកប្រាក់ប្រហែល៧៤ ០០០ដុល្លារថែមទៀត។
ដោយឡែក ស្របពេលត្រូវស្តារការខូចខាតខាងលើ ស្ថាប័នធំៗពីររបស់តៃវ៉ាន់ គឺផ្សារលក់កាបូនតៃវ៉ាន់ និងវិទ្យាស្ថានស្រាវជ្រាវកសិកម្មតៃវ៉ាន់ បានចុះហត្ថលេខាលើអនុស្សរណៈនៃការយោគយល់មួយ ដើម្បីលើកកម្ពស់ការរក្សាទុកកាបូនក្នុងដី ឬហៅថា កាបូនពណ៌លឿង និងការរក្សាទុកកាបូនក្នុងព្រៃឈើ។ កិច្ចសហការនេះ ធ្វើឡើងក្នុងគោលបំណងគាំទ្រដល់គម្រោងកាបូនធម្មជាតិ និងត្រៀមលក្ខណៈសម្រាប់ប្រព័ន្ធពាណិជ្ជកម្មការបំភាយឧស្ម័នរបស់កោះតៃវ៉ាន់។
រដ្ឋាភិបាលតៃវ៉ាន់ បានកំណត់គោលដៅយ៉ាងច្បាស់លាស់ក្នុងការបង្កើនការស្រូប និងរក្សាទុកឧស្ម័នកាបូន នៅក្នុងស្រុកឱ្យបានលើសពី១០លានតោន នៅត្រឹមឆ្នាំ២០៤០ខាងមុខ។ ដើម្បីសម្រេចផែនការនេះ ស្ថាប័នទាំងពីរនឹងចាប់ផ្តើមបង្កើតកម្មវិធីបណ្តុះបណ្តាល ដើម្បីជួយដល់បណ្តាអាជីវកម្ម និងក្រុមហ៊ុននានាឱ្យអភិវឌ្ឍសមត្ថភាព និងចូលរួមក្នុងយុទ្ធនាការកាត់បន្ថយការឡើងកម្ដៅភពផែនដីនេះទាំងអស់គ្នា។
ក្រសួងធនធានទឹក និងឧតុនិយម បានឱ្យដឹងថា ចាប់ពីថ្ងៃទី១៣ ដល់ថ្ងៃទី១៥ ខែកក្កដា ប្រទេសកម្ពុជាមានភ្លៀងធ្លាក់ និងខ្យល់បក់ខ្លាំង ដោយសារឥទ្ធិពលប្រយោលរបស់ព្យុះបាវី នៅលើសមុទ្រចិនខាងត្បូង។
ឥទ្ធិពលព្យុះបាវី ក៏បាននាំមកនូវភ្លៀងធ្លាក់ខ្លាំង និងទឹកជំនន់ដល់ផ្នែកខ្លះនៃប្រទេសកម្ពុជាផងដែរ ចាប់តាំងពីយប់ថ្ងៃទី១១ ខែកក្កដាមកម្លេះ ដោយបង្កឱ្យមានទឹកជំនន់តិចតួចនៅស្រុកសំឡូត ខេត្តបាត់ដំបង ក្រុងកំពត និងស្រុកកំពង់សិលា ខេត្តព្រះសីហនុ។
អាជ្ញាធរមូលដ្ឋានបានដាក់ពង្រាយកម្លាំងសង្គ្រោះបន្ទាន់ ដើម្បីជួយប្រជាពលរដ្ឋ និងសម្រួលដល់ការធ្វើដំណើរប្រកបដោយសុវត្ថិភាព។ រដូវវស្សាឆ្នាំ២០២៦របស់ប្រទេសកម្ពុជា ចាប់ផ្តើមពីខែឧសភា ដល់ខែតុលា ខណៈរដូវប្រាំងចាប់ផ្តើមពីខែវិច្ឆិកា ដល់ខែមេសា៕ (អៀវ ឈាងនី)
