ដោយ ឡុង សារេត
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានមានប្រសាសន៍ថា រាជរដ្ឋាភិបាលតែងចាត់ទុកវិស័យកសិកម្ម គឺជាក្រពះរបស់ជាតិ ខណៈពេលមច្ឆាជាតិជាម៉ាស៊ីនផលិតប្រូតេអ៊ីនរបស់ជាតិមិនចេះរីងស្ងួតនិងអាចរក្សាទុកជាអាហារសហគមន៍ដ៏ពេញនិយមរបស់ប្រជាពលរដ្ឋគ្រប់ស្រទាប់។
សម្តេចមហាបវរធិបតី ហ៊ុន ម៉ាណែត បានថ្លែងបែបនេះនៅក្នុងកម្មវិធីទិវាមច្ឆាជាតិ០១ កក្កដា ដែលរៀបចំនៅខេត្តស្វាយរៀង។
សម្តេចធិបតី បានមានប្រសាសន៍ទៀតថា ក្នុងន័យនេះរាជរដ្ឋាភិបាលនីតិកាលទី៧នៃរដ្ឋសភាបានកំណត់យកការអភិវឌ្ឍប្រកបដោយភាពធន់ ចីរភាព និងបរិយាបន្ន័ គឺជាបញ្ញកោណទី៤នៃយុទ្ធសាស្ត្របញ្ញកោណដំណាក់កាលទី១ ដោយមានការគ្រប់គ្រងធនធានធម្មជាតិ បេតិកភណ្ឌវប្បធម៌ និងទេសចរណ៍ប្រកបដោយចីរភាព គឺជាមុំទី២ និងការលើកស្ទួយកសិកម្ម និងការអភិវឌ្ឍជនបទជាមុំទី៣។
ជាក់ស្តែងសម្រាប់វិស័យកសិកម្ម រាជរដ្ឋាភិបាលបានដាក់ចេញនូវគោលនយោបាយជាតិអភិវឌ្ឍន៍វិស័យកសិកម្មឆ្នាំ២០២២-២០៣០ សំដៅធ្វើទំនើបកម្ម និងបង្កើនភាពប្រកួតប្រជែងក្នុងវិស័យកសិកម្ម ក៏ដូចជាធានាសុវត្ថិភាពម្ហូបអាហារ និងគ្រប់គ្រងដី ព្រៃឈើ និងជលផលប្រកបដោយចីរភាព។ 0
ចំណែកគោលនយោបាយផ្សព្វផ្សាយកសិកម្ម នៅកម្ពុជា គឺសំដៅលើកកម្ពស់ចំណេះដឹងផ្នែកសិកម្មទំនើបជំរុញការផ្ទេរ និងចាប់យកបច្ចេកវិទ្យានៅក្នុងផែនការយុទ្ធសាស្ត្រអភិវឌ្ឍន៍វិស័យកសិកម្ម សំដៅតម្រង់ទិសអភិវឌ្ឍតាមអនុវិស័យ។
សូមជម្រាបជូនផងដែរ នៅក្នុងកម្មវិធីទិវាមច្ឆាជាតិ០១ កក្កដាឆ្នាំ២០២៦ សម្តេចមហាបវរធិបតី ហ៊ុន ម៉ាណែត ក៏បានផ្តល់អនុសាសន៍សំខាន់ៗ៦ចំណុច ដល់ក្រសួងកសិកម្ម រុក្ខាប្រមាញ់ និងនេសាទផងដែរ។
នៅក្នុងពិធីនេះដែរ សម្ដេចមហាបវរធិបតី បានអំពាវនាវដល់ប្រជានេសាទ និងសហគមន៍នេសាទ ឱ្យចូលរួមអភិរក្សធនធានមច្ឆជាតិ ជាពិសេសការផ្អាកការនេសាទនៅរដូវត្រីពង ដើម្បីធានាចីរភាពផលត្រីសម្រាប់ជាតិ។ ទន្ទឹមនេះ សម្ដេចធិបតី បានបញ្ជាឱ្យសមត្ថកិច្ច ស្រាវជ្រាវរក និងចាត់វិធានការយ៉ាងម៉ឺងម៉ាត់ ចំពោះមេខ្យល់ ដែលបំផុសប្រជាពលរដ្ឋឱ្យប្រើឧបករណ៍ឆក់ត្រីខុសច្បាប់។
ចំពោះការបង្ក្រាបបទល្មើសនេសាទ សម្ដេចធិបតី បានណែនាំដល់សមត្ថកិច្ចពាក់ព័ន្ធទាំងអស់ ត្រូវដាក់ផលប្រយោជន៍ប្រជាជនជាធំ ដោយត្រូវតម្កល់ផលប្រយោជន៍ប្រជាជនភាគច្រើនជាអាទិភាព។
សម្ដេចធិបតី បានបញ្ជាក់បន្ថែមថា កិច្ចការបង្ក្រាបនេះ គឺធ្វើឡើងក្នុងគោលដៅការពារ “ឆ្នាំងបាយ” និងធានាផលត្រីជូនប្រជាជនទូទាំងប្រទេស។
សម្តេចនាយករដ្ឋមន្ត្រីវបានសរសេរសារខ្លីមួយ នៅលើផេកហ្វេសប់ុករបស់សម្តេចថា ទិវាមច្ឆាជាតិ ត្រូវបានប្រារព្ធឡើងជារៀងរាល់ឆ្នាំ ក្នុងគោលបំណងបំផុសស្មារតី និងចលនាជាតិឱ្យចូលរួមថែរក្សា អភិរក្ស និងអភិវឌ្ឍវិស័យជលផលប្រកបដោយនិរន្តរភាព។ រាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ បានដាក់ចេញ និងអនុវត្តយ៉ាងម៉ឺងម៉ាត់នូវវិធានការគន្លឹះ និងយុទ្ធសាស្ត្រសំខាន់ៗ តាមរយៈការកែទម្រង់ក្របខ័ណ្ឌច្បាប់ និងការបង្ក្រាបបទល្មើសជលផលគ្រប់ប្រភេទ ដើម្បីធានាបាននូវប្រសិទ្ធភាពនៃការគ្រប់គ្រងធនធានធម្មជាតិ និងធានាថា ធនធានជលផលនៅតែសម្បូរសម្រាប់កូនចៅជំនាន់ក្រោយ។
ជាការកត់សម្គាល់នៅឆ្នាំ២០២៥ ផលជលផលទទួលបានសរុប៩៧៨ ៥៦០តោន កើនឡើង៥,៦ភាគរយ ធៀបនឹងឆ្នាំ២០២៤ ក្នុងនោះផលនេសាទទឹកសាប៥១៤ ៨៣០តោន គឺកើនឡើង១០ភាគរយ ផលនេសាទសមុទ្រ១៤០ ១៦០តោន និងផលវារីវប្បកម្ម៣២៣ ៥៧០តោន។
