ដោយ ឡុង សារេត
ភ្នំពេញ៖ ដោយទទួលបានការអនុញ្ញាតិដ៏ខ្ពង់ខ្ពស់ពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB)នៅព្រឹកថ្ងៃទី១២ ខែមិថុនា ឆ្នាំ២០២៦ លោក គិត ខេមរារិទ្ធ ប្រធាននាយកដ្ឋានផ្នែកលក់ និងទីផ្សារ និងលោក ឈិន ឌីណា ប្រធាននាយកដ្ឋានគ្រប់គ្រងសេវាធនាគារឌីជីថលរួមជាមួយក្រុមការងារ បានចូលរួមដាក់តាំងបង្ហាញផលិតផល និងសេវាកម្មរបស់ធនាគារ ARDB ក្នុងពិព័រណ៍វិចិត្រសាលការរចនាបញ្ញាសិប្បនិម្មិត នៅសាកលវិទ្យាល័យជាតិគ្រប់គ្រង។
ពិព័រណ៍វិចិត្រសាលរចនាបញ្ញាសិប្បនិម្មិតនេះ ក៏មានការអញ្ចើញចូលរួមជាកិត្តិយសពីឯកឧត្តមសាស្ត្រាចារ្យបណ្ឌិត ហោ ប៉េង សាកលវិទ្យាធិកានៃសាកលវិទ្យាល័យជាតិគ្រប់គ្រង, តំណាងក្រសួងប្រៃសណីយ៍ និងទូរគមនាគមន៍, តំណាងក្រសួងទេសចរណ៍, តំណាងភោជនីយដ្ឋានបាយ័ន, តំណាងសមាគមទេសចរណ៍កម្ពុជា, តំណាងសមាគមទេសចរណ៍អាស៊ីប៉ាស៊ីហ្វិក, លោកសាស្ត្រាចារ្យ លោកគ្រួអ្នកគ្រួ និងនិស្សិតជាច្រើនផ្សេងទៀត។
ឯកឧត្តមសាស្ត្រាចារ្យបណ្ឌិត ហោ ប៉េង បានមានប្រសាសន៍ថា «ថ្ងៃនេះគឺជាឱកាសដ៏ពិសេសសម្រាប់សាកលវិទ្យាល័យជាតិគ្រប់គ្រង ដោយសារយើងកំពុងឈរធ្វើជាសាក្សីនៃភាពច្នៃប្រឌិតគ្មានដែនកំណត់ទេពកោសល្យនវានុវត្តន៍ និងការគិតគូរបែបច្នៃប្រឌិតរបស់និស្សិតមកពីជំនាញទេសចរណ៍ បដិសណ្ឋារកិច្ច និងសេដ្ឋកិច្ចឌីជីថល តាមរយៈការរចនា និងអនុវត្តកម្មវិធីបញ្ញាសិប្បនិម្មិត (AI)ដើម្បីដោះស្រាយបញ្ហាប្រឈមក្នុងពិភពជាក់ស្តែង។ ពិព័រណ៍នេះមិនមែនគ្រាន់តែជាការបង្ហាញបច្ចេកវិទ្យា AI ប៉ុណ្ណោះទេ ប៉ុន្តែវាតំណាងឱ្យសមត្ថភាព និងចំណេះដឹងរបស់និស្សិតយើង ក្នុងការបំប្លែងគំនិតឱ្យទៅជាដំណោះស្រាយជាក់ស្តែង ដែលអាចចូលរួមចំណែកដល់សង្គម ធុរកិច្ច ព្រមទាំងឧស្សាហកម្មទេសចរណ៍ និងបដិសណ្ឋារកិច្ច»។
ឯកឧត្តមសាស្ត្រាចារ្យ បានបន្តទៀតថា យើងទាំងអស់គ្នាបានជា្របយ៉ាងច្បាស់ហើយថា បច្ចេកវិទ្យាបញ្ញាសិប្បនិម្មិត កំពុងតែអភិវឌ្ឍន៍យ៉ាងរហ័ស និងធ្វើការផ្លាស់ប្តូររបៀបរស់នៅ ការរៀនសូត្រ ការប្រាស្រ័យទាក់ទង បទពិសោធ ការធ្វើការងារនិងការប្រកបអាជីវកម្ម។ នៅជុំវិញពិភពលោក បញ្ញាសិប្បនិម្មិតកំពុងក្លាយជាកាតាលីករដ៏សំខាន់ក្នុងការជំរុញកំណើនសេដ្ឋកិច្ច និងទេសចរណ៍ បង្កើនផលិតភាពក្នុងគ្រប់ទិដ្ឋភាព និងពង្រឹងភាពប្រកួតប្រជែងនៅគ្រប់វិស័យ។ ស្របពេលប្រទេសកម្ពុជាកំពុងរុញច្រានរបៀបវារៈបច្ចេកវិទ្យាឌីជីថល គ្រឹះស្ថានសិក្សា និងសាកលវិទ្យាល័យនានា មានតួនាទី និងការទទួលខុសត្រូវយ៉ាងសំខាន់ក្នុងការបំពាក់បំប៉នសិស្ស និស្សិតនូវចំណេះដឹងបំណិន និងផ្នត់គំនិតបច្ចេកវិទ្យា ដែលចាំបាច់ដើម្បីអាចរីកចម្រើន និងប្រកួតប្រជែងនៅក្នុងយុគស័យថ្មីនេះបាន។
ឯកឧត្តមសាស្ត្រាចារ្យ មានប្រសាសន៍គូសបញ្ជាក់ថា នៅសាកលវិទ្យាល័យជាតិគ្រប់គ្រងជឿជាក់ថា ការអប់រំកម្រិតឧត្តមសិក្សាត្រូវតែដើរហួសពីការរៀនសូត្រតាមបែបប្រពៃណីនៅតែក្នុងថ្នាក់រៀន។ សាលាលើកទឹកចិត្តនិស្សិតឱ្យក្លាយជាអ្នកបង្កើតនវានុវត្តន៍ អ្នកច្នៃប្រឌិត អ្នកដោះស្រាយបញ្ហា សហគ្រិន និងជាពលរដ្ឋឌីជីថល ដែលមានការទទួលខុសត្រូវ។
ឯកឧត្តមសាស្ត្រាចារ្យ «ខ្ញុំពិតជាមានមោទនភាពជាខ្លាំង ដែលគំំនិតផ្តួចផ្តើមផ្នែក AIនេះបានប្រមូលផ្តុំគ្រប់គ្នា មកជុំគ្នា ជាពិសេស សហការរវាងនិស្សិតមកពីមហាវិទ្យាល័យទេសចរណ៍ និងមហាវិទ្យាល័យសេដ្ឋកិច្ចឌីជីថល។ កិច្ចសហការអន្តរវិស័យនេះបានបង្ហាញពីរបៀប ដែលបច្ចេកវិទ្យា AI អាចត្រូវបានរួមបញ្ចូលគ្នាយ៉ាងចុះសម្រុងជាមួយចំណេះដឹង និងបង្កើតជាដំណោះស្រាយច្នៃប្រឌិតឆ្លើយតបទៅនឹងតម្រូវការជាក់ស្តែងនៅក្នុងសង្គម ដែលកំពុងមានការប្រែប្រួលយ៉ាងឆាប់រហ័សនេះ”។
សូមជម្រាបជូនថា វិចិត្រសាលការរចនាបញ្ញាសិប្បនិម្មិត មានក្រុមនិស្សិតចំនួន៩១នាក់ ចែកជា១៤ក្រុម ដើម្បីធ្វើបង្ហាញនូវគម្រោង AI៖ ១)-ប្រព័ន្ធប្រឹក្សាយោបល់លើការស្នើសុំទិដ្ឋាការ,២)-ប្រព័ន្ធបណ្តុះបណ្តាលការប្រាស្រ័យទាក់ទងផ្នែកបដិសណ្ឋារកិច្ច, ៣)-ប្រព័ន្ធរៀបចំកម្មវិធីទស្សនកិច្ចទេសចរណ៍ផ្ទាល់ខ្លួន, ៤)-ប្រព័ន្ធត្រួតពិនិត្យថ្លៃសេវាកម្មទេសចរណ៍, ៥)-ប្រព័ន្ធរៀបចំផែនការសេវាកម្មម្ហូបអាហារ,៦)-ប្រព័ន្ធរៀបចំផែនការទេសចរណ៍ធម្មជាតិផ្អែកលើសហគមន៍, ៧)-ប្រព័ន្ធរៀបចំផែនការអាពាហ៍ពិពាហ៍, ៨)-ប្រព័ន្ធរៀបចំផែនការធ្វើដំណើរទៅកម្សាន្តនៅខេត្តសៀមរាប, ៩)-ប្រព័ន្ធជំនួយការផ្នែកអាហារូបត្ថម្ភផ្ទាល់ខ្លួន, ១០)-ប្រព័ន្ធជំនួយការរៀបចំផែនការថវិកា, ១១)-ប្រព័ន្ធប្រឹក្សាយោបល់ពិនិត្យ និងវិនិច្ឆ័យស្បែក, ១២)-ប្រព័ន្ធណែនាំមុខម្ហូប និងអាហារក្នុងស្រុក,១៣)-ប្រព័ន្ធដៃគូត្រៀមប្រឡង IELTS និងទី១៤)-ប្រព័ន្ធ GPT ផ្គូរផ្គងការងារ៕
