ព្យុងយ៉ាង៖ ក្រុមហ៊ុនពាណិជ្ជកម្មរបស់កូរ៉េខាងជើងកំពុងប្រមូលព័ត៌មានយ៉ាងសកម្មអំពីអ្នកទិញនៅក្នុងប្រទេសចិន ចំពោះបន្លែ និងផ្លែឈើស្រស់ ដែលត្រូវបានផលិតនៅកសិដ្ឋានដ៏ធំមួយ នៅជិតព្រំដែនប្រទេសចិន។
កិច្ចខិតខំប្រឹងប្រែងនេះឆ្លុះបញ្ចាំងពីការជំរុញកាន់តែខ្លាំងក្នុងការធ្វើពិពិធកម្មការនាំចេញ និងការប្រមូលផ្តុំរូបិយប័ណ្ណបរទេស ខណៈពាណិជ្ជកម្មតាមព្រំដែនរវាងកូរ៉េខាងជើង និងចិន ចាប់ផ្តើមងើបឡើងវិញ ក្រោយពីជំងឺរាតត្បាត កូវីដ១៩។
សារព័ត៌មាន ដេលី អិនខេ (Daily NK) បានរាយការណ៍ថា អ្នកតំណាងក្រុមហ៊ុនពាណិជ្ជកម្មកូរ៉េខាងជើង បាននិងកំពុងទាក់ទងដៃគូពាណិជ្ជកម្មចិន ហើយបានបញ្ជាក់ថា ដំណាំដាំលើក្នុងកសិដ្ឋានផ្ទះសំណាញ់របស់កូរ៉េខាងជើង ពិតជាមិនមានប្រើថ្នាំសម្លាប់សត្វល្អិត ហើយបន្លែពិតជាមានបរិមាណច្រើន។ ផលិតផលនេះរួមមានស្លឹកកាញឹប, សាឡាត់, ឆៃថាវ, ស្ពៃបូគោ, ម្ទេស, ត្រសក់ផ្អ, ប៉េងប៉ោះ និងត្រសក់ស្រូវ។ វិធីសាស្រ្តទីផ្សារហាក់ដូចជាត្រូវបានក្រិតតាមតម្រូវការអ្នកប្រើប្រាស់ជនជាតិចិនសម្រាប់ផលិតផលគ្មានសារធាតុគីមី និងជាដំណាំសរីរាង្គ គ្មានថ្នាំសម្លាប់សត្វល្អិត ត្រូវទទួលបានតម្លៃខ្ពស់នៅក្នុងប្រទេសចិន។
ប្រទេសកូរ៉េខាងជើងបាននិងកំពុងពង្រីកការនាំចេញរបស់ខ្លួនលើសពីទំនិញបែបប្រពៃណីនាពេលកន្លងមក មានដូចជារ៉ែ និងអាហារសមុទ្រ។ ផលិតផលបន្លែ និងផ្លែឈើស្រស់ៗ ដាំនៅនៅតាមព្រំដែនផ្តល់នូវអត្ថប្រយោជន៍ខាងដឹកជញ្ជូន ដោយសារចម្ងាយផ្លូវខ្លីជាង និងមានសក្តានុពលកាន់តែប្រសើរសម្រាប់រក្សាភាពស្រស់។
កសិដ្ឋានផ្ទះកញ្ចក់ ដាំដំណាំលើទឹកនេះ ដែលបានបញ្ចប់ការសាងសង់នៅខែកុម្ភៈ ឆ្នាំ២០២៦ គឺជាមជ្ឈមណ្ឌលកសិកម្មផ្ទះកញ្ចក់ដ៏ធំបំផុតរបស់ប្រទេសកូរ៉េខាងជើង។ កសិដ្ឋាននេះលាតសន្ធឹងលើផ្ទៃដីប្រហែល៤,៥គីឡូម៉ែត្រការ៉េ នៅលើកោះមួយជាប់មាត់ទន្លេ យ៉ាលូ (Yalu) ដែលជាព្រំដែនជាមួយប្រទេសចិន។ កសិដ្ឋាននេះមានសំណង់ផ្ទះកញ្ចក់ជាង១ ១៥០ខ្នង រួមជាមួយនឹងកន្លែងស្តុកត្រជាក់ និងកន្លែងស្រាវជ្រាវ។
កសិដ្ឋានខាងលើត្រូវបានសាងសង់នៅក្នុងសមាជលើកទី៩ នៃគណបក្សពលករកូរ៉េ ដែលបានប្រព្រឹត្តទៅកាលពីខែកុម្ភៈ ឆ្នាំ២០២៦ និងត្រូវបានចាត់ទុកថា ជាសមិទ្ធផលស្នាដសរបស់មេដឹកនាំកូរ៉េខាងជើង លោក គីម ជុងអ៊ុន (Kim Jong Un)។ គណបក្សពលករកូរ៉េ បានរៀបចំសមាជបក្ស ដើម្បីកំណត់ទិសដៅគោលនយោបាយសំខាន់ៗ និងបង្ហាញពីសមិទ្ធផលរបស់រដ្ឋ។
រដ្ឋាភិបាលទីក្រុងព្យុងយ៉ាង បានប្រកាសជាសាធារណៈ ហើយចាត់ទុកកសិដ្ឋាននេះថា ជាគម្រោងធ្វើទំនើបកម្មកសិកម្ម ក្នុងគោលបំណងកែលម្អរបបអាហាររបស់ប្រជាជនកូរ៉េខាងជើងទូទៅ។
ទោះបីជាយ៉ាងណាក៏ដោយ ក៏ដៃគូពាណិជ្ជកម្មចិនមានភាពយឺតយ៉ាវក្នុងការប្តេជ្ញាចិត្តទិញផលិតផលបន្លែរបស់កូរ៉េខាងជើង ដោយសារពួកគេភាគច្រើនមានបទពិសោធន៍តិចតួចក្នុងការនាំចូលអាហារស្រស់ពីកូរ៉េខាងជើង ហើយលក្ខណៈងាយខូចនៃទំនិញ ធ្វើឱ្យគយប្រញាប់ផ្តល់ការអនុញ្ញាតនាំចូល និងលក់ចែកចាយឱ្យបានឆាប់រហ័ស។ ការផលិតស្រស់ៗដូចជាបន្លែ និងផ្លែឈើ ត្រូវតែដឹកពីកសិដ្ឋានទៅអ្នកទិញយ៉ាងយូរក្នុងរយៈពេលមួយ ឬពីរថ្ងៃ ដើម្បីរក្សាតម្លៃពាណិជ្ជកម្ម ហើយពាណិជ្ជករចិនត្រូវបានគេរាយការណ៍ថា មិនប្រាកដថា កូរ៉េខាងជើងអាចធានាបាននូវកម្រិតនៃប្រតិបត្តិការនោះទេ។
ប្រភពដដែលបានពន្យល់ពីកង្វល់នេះយ៉ាងច្បាស់ថា ផលិតផលស្រស់ៗ ដែលមានតម្លៃសមរម្យក្នុងបរិមាណច្រើន ត្រូវមានទីផ្សាររួចជាស្រេច នៅក្នុងប្រទេសចិន ប៉ុន្តែរឿងសំខាន់គឺថា តើកូរ៉េខាងជើងអាចដឹកជញ្ជូនឆ្លងកាត់ព្រំដែនដោយរលូន និងគ្មានការរំខានដែរឬទេ។ ការបិទព្រំដែនជាឯកតោភាគីជាបន្តបន្ទាប់ ហើយគយផ្អាកការងារភ្លាមៗ ដោយភាគីកូរ៉េខាងជើង បានកើតឡើងកាលពីអតីតកាល ហើយនៅតែជាប្រភពនៃការព្រួយបារម្ភសម្រាប់ដៃគូពាណិជ្ជកម្មចិន៕
