ខេត្តកណ្តាល៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) និងជាប្រធានសមាគមបណ្តាញកសិករតេជោ នៅថ្ងៃទី២៣ ខែឧសភា ឆ្នាំ២០២៦ នេះ បានផ្តល់អនុសាសន៍ជូនប្រជាកសិករនៅក្នុងស្រុកកណ្តាលស្ទឹង ខេត្តកណ្តាល គួរប្រើជីឱ្យត្រឹមត្រូវតាមបច្ចេកទេស និងត្រូវពេលវេលាច្បាស់លាស់ ទើបធ្វើឱ្យដំណាំផ្តល់ទិន្នផលល្អ។
ឯកឧត្តមបណ្ឌិតប្រតិភូ បានផ្តល់អនុសាសន៍បែបនេះ ក្នុងឱកាសអញ្ជើញជួបសំណេះសំណាល និងសួរសុខទុក្ខប្រជាកសកសិកនៅស្រុកកណ្តាលស្ទឹង ខេត្តកណ្តាល ជាង៧០០នាក់។
ក្នុងឱកាសនេះ មានការអញ្ជើញចូលរួមពីលឯកឧត្តម ខុន សេរីរដ្ឋា អភិបាលរងខេត្តកណ្តាល
លោក អ៊ូច សៅវឿន អភិបាលស្រុកកណ្ដាលស្ទឹង ព្រមទាំងមានការចូលរួមពីមន្ត្រីរដ្ឋបាលស្រុក អធិការនគរបាលស្រុក ការិល័យជុំវិញស្រុក កងរាជអាវុហត្ថស្រុក មន្ត្រីការិយាល័យកសិកម្ម ធនធានធម្មជាតិ និងបរិស្ថានស្រុក មេឃុំ មន្ត្រីកសិកម្មឃុំ និងប្រជាកសិករស្រុកកណ្តាល។
ឯកឧត្តមបណ្ឌិត កៅ ថាច បានលើកឡើងដោយសេចក្តីនឹករឭកថា គោលបំណងសំខាន់នៃការជួបសំណេះសំណាលក្នុងឱកាសនេះ គឹដើម្បីឱ្យបងប្អូប្រជាកសិករបានស្គាល់ពីសមាគមបណ្តាញកសិករតេជោ និងចូលរួមជាសមាជិកឱ្យបានច្រើន ដើម្បីមានឱកាសទទួលបានការគាំទ្រផ្នែកទីផ្សារ និងប្រាក់កម្ចីក្នុងអត្រាការប្រាក់ទាប។
ទាក់ទិននឹងការធ្វើកសិកម្មរបស់បងប្អូនប្រជាកសិករ ឯកឧត្តមបណ្ឌិតបានបន្ថែមថា «ការធ្វើកសិកម្មរបស់ប្រជាកសិកយើងមិនថា នៅក្នុងស្រុកកណ្តាលស្ទឹងនេះទេ គឺនៅទូទាំងប្រទេសតែង ធ្លាប់បានជួបនូវបញ្ហា ទី១ បង្កើតកសិផល លក់មិនដាច់ ឬមានតម្លៃចុះថោក, ទី២ ពិបាកក្នុងការក្នុងស្វែងប្រាក់រកកម្ចី ដើម្បីយកមកធ្វើកសិកម្មបន្ត និងទី៣ បច្ចេកទេសនៃការដាំដុះ ព្រោះកសិកររបស់យើងមួយចំនួនធំមិនបានទៅសិក្សាពីបច្ចេកទេសឱ្យបានត្រឹមត្រូវនោះទេ ហើយកសិករខ្លះទៀតបានធ្វើកសិកម្មតតាមទម្លាប់ និងតាមបទពិសោធតៗគ្នា។
ជាមួយគ្នានេះ ឯកឧត្តមបណ្ឌិត បានក្រើនរំលឹកដល់ប្រជាកសិករទាំងអស់ក្នុងស្រុកកណ្តាលស្ទឹង ត្រូវធ្វើកសិកម្មគ្រប់ប្រភេទ ទាំងការធ្វើស្រែ ធ្វើចម្ការ ចិញ្ចឹមមាន់ ចិញ្ចឹមជ្រូក ដាំបន្លែ ចិញ្ចឹមគោ ចិញ្ចឹមត្រី និងចិញ្ចឹមទាជាដើម ត្រូវគិតគូរពីការរកឱ្យឃើញនូវការចំណាយថ្លៃដើមផលិតឱ្យបានច្បាស់លាស់ និងត្រឹមត្រូវ ទើបរកផលឃើញចំណេញ។ ការធ្វើដូច្នេះ គឺដើម្បីកាត់បន្ថយការចំណាយរបស់យើងឱ្យបានតិច ទើបទទួលបានផលចំណេញច្រើន។
បន្ថែមពីនេះទៀត ឯកឧត្តមបណ្ឌិតបានណែនាំឱ្យប្រជាកសិករនៅក្នុងស្រុកកណ្តាលស្ទឹងទាំងអស់ត្រូវប្រើជីឱ្យត្រឹមត្រូវស្របទៅតាមបច្ចេកទេស និងពិនិត្យពេលវេលាឱ្យបានច្បាស់លាស់ ទើបធ្វើឱ្យដំណាំកសិកម្មរបស់យើងទទួលបានល្អ។ លើសពីនេះទៀត បើចង់ទទួលបានផលចំណេញកាន់តែច្រើនពីការធ្វើកសិកម្មរបស់ខ្លួន កសិករត្រូវតែធ្វើជីកំប៉ុស្តដោយខ្លួនឯង ដែលមានធាតុផ្សំផ្សេងៗ អាចស្វែងរកបាននៅជុំវិញផ្ទះរបស់ខ្លួន៕
