ដោយ នៅ ស៊ីវុត្ថា
ខេត្តមណ្ឌលគិរី៖ ឯកឧត្តម ថង សាវុន អភិបាលខេត្តមណ្ឌលគិរី បានជំរុញ និងលើកទឹកចិត្តដល់ប្រជាកសិករ បន្តពង្រីកផ្ទៃដីដាំដុះកាហ្វេបន្ថែមទៀត ដោយសារបច្ចុប្បន្នតម្រូវការទីផ្សារកំពុងកើនឡើង និងមានសក្ដានុពលល្អសម្រាប់ការនាំចេញ និងផ្គត់ផ្គង់ក្នុងស្រុក។
ឯកឧត្តម ថង សាវុន បានជំរុញ និងលើកទឹកចិត្តបែបនេះ ក្នុងគ្រាឯកឧត្តមពិនិត្យស្ថានភាពចម្ការកាហ្វេរបស់ប្រជាកសិករ នៅភូមិចម្ការតែ សង្កាត់ស្ពានមានជ័យ ក្រុងសែនមនោរម្យ ដើម្បីស្វែងយល់ពីការដាំដុះ ការថែទាំ និងផលិតភាពកាហ្វេជាក់ស្តែងនៅថ្ងៃទី១៨ ខែឧសភា ឆ្នាំ២០២៦។
ក្នុងការពិនិត្យស្ថានភាពចម្ការកាហ្វេរបស់ប្រជាកសិករនេះ ក៏មានការអញ្ជើញអមដំណើរដោយលោកបណ្ឌិត សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត ព្រមទាំងមន្ត្រីជំនាញពាក់ព័ន្ធមួយចំនួនផងដែរ។
ក្នុងឱកាសនេះ ឯកឧត្តមអភិបាលខេត្តបានជំរុញ និងលើកទឹកចិត្តដល់ប្រជាពលរដ្ឋឱ្យងាកមកដាំដំណាំ ដែលមានសក្តានុពល និងសមស្របទៅនឹងស្ថានភាពដី និងអាកាសធាតុនៃខេត្តមណ្ឌលគិរី ដូចជាដំណាំកាហ្វេ កាកាវ ចំបក់បារាំង និងដំណាំយុទ្ធសាស្ត្រផ្សេងៗទៀត ដែលអាចបង្កើនប្រាក់ចំណូល និងលើកកម្ពស់ជីវភាពរស់នៅរបស់ប្រជាពលរដ្ឋ។
ឯកឧត្តមបានបញ្ជាក់ថា ទឹកដីខេត្តមណ្ឌលគិរីមានសក្តានុពលកសិកម្មខុសៗគ្នាទៅតាមសណ្ឋានដី ដោយក្នុងនោះ តំបន់វាលទំនាប នៃស្រុកកោះញែក មានអំណោយផលសម្រាប់ដាំដំណាំស្រូវ។ តំបន់ស្រុកកែវសីមា មានអំណោយផលសម្រាប់ដំណាំស្វាយចន្ទី និងកៅស៊ូ។ តំបន់ខ្ពង់រាប នៃស្រុកពេជ្រាដា មានសក្តានុពលសម្រាប់ដំណាំជាច្រើនប្រភេទ។
ដោយឡែក តំបន់ភ្នំក្នុងក្រុងសែនមនោរម្យ និងស្រុកអូររាំង ដែលមានដីក្រហម និងរយៈកម្ពស់ពីនីវ៉ូសមុទ្រជាមធ្យមប្រមាណ៧០០ ទៅ៩០០ម៉ែត្រ គឺមានអំណោយផលខ្ពស់សម្រាប់ដំណាំកាហ្វេ កាកាវ ចំបក់បារាំង និងបន្លែគ្រប់ប្រភេទ ដែលមានគុណភាព និងឱជារសឆ្ងាញ់ប្លែកពីតំបន់ផ្សេងៗ។
ជាមួយគ្នានេះ ឯកឧត្តម ថង សាវុន ក៏បានបង្ហាញពីការខិតខំប្រឹងប្រែងរបស់រដ្ឋបាលខេត្ត ក្នុងការស្វែងរកទីផ្សារ និងជំរុញការតភ្ជាប់ទំនាក់ទំនងជាមួយក្រុមហ៊ុន និងដៃគូពាក់ព័ន្ធ ដើម្បីជួយឱ្យផលិតផលកសិកម្មរបស់ប្រជាកសិករ មានទីផ្សារច្បាស់លាស់ និងអាចប្រកួតប្រជែងបានកាន់តែប្រសើរ។
ឯកឧត្តមអំពាវនាវដល់បងប្អូនប្រជាពលរដ្ឋមានដីទំនេរ សូមងាកមកដាំដំណាំ និងបន្លែទៅតាមប្រភេទដំណាំ ដែលសមស្របនឹងសណ្ឋានដី និងអាកាសធាតុក្នុងតំបន់របស់ខ្លួន ដើម្បីបង្កើនចំណូល និងលើកកម្ពស់ជីវភាពគ្រួសារឱ្យកាន់តែប្រសើរឡើង។
ជាការឆ្លើយតប ប្រជាកសិករបានសម្តែងក្តីរីករាយ និងបង្ហាញថា ដំណាំកាហ្វេកំពុងផ្តល់ប្រាក់ចំណូលប្រសើរជាងមុន ខណៈទីផ្សារមានតម្រូវការខ្ពស់ និងតម្លៃមានស្ថិរភាព។
យោងតាមរបាយការណ៍របស់មន្ទីរកសិកម្ម រុក្ខាប្រមាញ់ និងនេសាទខេត្តមណ្ឌលគិរី បានឱ្យដឹងថា បច្ចុប្បន្នខេត្តមានផ្ទៃដីដាំដំណាំកាហ្វេជាង៥៨០ហិកតា ដែលអាចប្រមូលទិន្នផលបានជាង១ ៦០០តោនក្នុងមួយឆ្នាំៗ។ តាមរយៈការចូលរួមវិនិយោគយ៉ាងសកម្ម ពីសំណាក់វិនិយោគិនទាំងក្នុងស្រុក និងក្រៅស្រុក ឯកឧត្តម ថង សាវុន បានរំពឹងថា ផ្ទៃដីដំាដំណាំកាហ្វេនៅក្នុងខេត្តមណ្ឌលគិរី នឹងកើនឡើងជាង៦០០ហិកតាត្រឹមបំណាច់ឆ្នាំ២០២៦នេះ៕
