គូឡាឡាំពួរ៖ រដូវប្រមូលផលផ្លែទុរេននៅប្រទេសម៉ាឡេស៊ីកំពុងដំណើរការ បន្ទាប់ពីមានអាកាសធាតុក្តៅនិងស្ងួតរយៈពេលយូរនៅដើមឆ្នាំ២០២៦នេះ ដោយការផ្គត់ផ្គង់ចាប់ផ្តើមទៅដល់ទីផ្សារក្នុងប្រទេសម៉ាឡេស៊ី និងប្រទេសសិង្ហបុរី។
យោងតាមរបាយការណ៍ក្នុងស្រុក ពូជទុរេនផ្តល់ផលដើមរដូវ រួមមាន ឌី៦០៤ (D604) លីប៉ាន (Lipan) និងពូជមូសាង ឃីង (Musang King)។ ពូជទុរេនឌី៦០៤ ដែលជាពូជកូនកាត់មានប្រភពមកពីតំបន់ បាលីក ពូឡៅ (Balik Pulau) នៃកោះប៉េណាំង (Penang) ប្រទេសម៉ាឡេស៊ី និងបានណែនាំឱ្យដាំដុះនៅឆ្នាំ១៩៨៧ គឺជាពូជដំបូងគេ តែងតែមានទម្ងន់ជាង២គីឡូក្រាមក្នុងមួយផ្លែ។
អ្នកលក់ផ្លែទុរេនម្នាក់ បាននិយាយថា លក្ខខណ្ឌអាកាសធាតុបានជះឥទ្ធិពលដល់គុណភាពផ្លែឈើ។ កង្វះខាតភ្លៀងនៅឆ្នាំនេះ បានធ្វើឱ្យផ្លែទុរេនកាន់តែមានរសជាតិ។ រដូវប្រមូលផលនេះអាចមានរយៈពេលវែងជាងឆ្នាំមុន។ ទោះបីជាមានការចាប់ផ្តើមប្រមូលផលដំបូងក៏ដោយ ក៏ទីផ្សារនៅមានទំហំតូចនៅឡើយ។
ផ្លែទុរេន ដែលអាចរកទិបាននាពេលបច្ចុប្បន្ន រួមមានពូជ ឌី៦០៤, លីប៉ាន, លីប៉ាន បារ៉ា (Lipan Bara) ខ្ញីលឿង (Yellow Ginger) កាព្រី (Capri) ឌី៦០០ (D600) និងពូជមូសាង ឃីង (Musang King)។ ចំណែកពូជទុរេនផ្សេងទៀត មានដូចជា ពូជ បង្គាក្រហម (Red Prawn) និងទុរេនពូជ ហោ ឡោ (Hor Lor) ត្រូវបានគេរំពឹងថា នឹងមានលក់នៅតាមទីផ្សារក្នុងរយៈពេលពីរទៅបីសប្តាហ៍។
ផ្លែទុរេនពូជ ឌី៦០៤ មានតម្លៃប្រហែល២៥រីងគីត ឬស្មើនឹងប្រហែល៥,៣ដុល្លារ ក្នុងមួយគីឡូក្រាម។ ចំណែកផ្លែទុរេនពូជ មូសាង ឃីង កំពុងមានតម្លៃចន្លោះពី៣៨រីងគីត ទៅ៥៨រីងគីត ឬប្រហែល៨ដុល្លារ ទៅ១២,២ដុល្លារ ក្នុងមួយគីឡូក្រាម។
កាលពីពេលថ្មីៗកន្លងមកនេះ រដ្ឋមន្ត្រីក្រសួងកសិកម្ម និងសន្តិសុខស្បៀង ម៉ាឡេស៊ី លោក មូហាម៉ាត់ សាប៊ូ (Mohamad Sabu) បានមានប្រសាសន៍ថា ប្រទេសម៉ាឡេស៊ី បានទទួលការចុះបញ្ជីម៉ាកសម្គាល់ភូមិសាស្ត្ររួចហើយ សម្រាប់ពូជទុរេន មូសាង ឃីង ដែលផ្តល់ឱ្យប្រទេសម៉ាឡេស៊ីនូវសិទ្ធិផ្តាច់មុខចំពោះការប្រើឈ្មោះនេះ។
យោងតាមលោក មូហាម៉ាត់ សាប៊ូ បានឱ្យដឹងថា ពូជទុរេន មូសាង ឃីង ដែលដាំដុះនៅក្នុងប្រទេសម៉ាឡេស៊ី មានលក្ខណៈខុសប្លែកពីពូជទុរេនស្រដៀងគ្នា ដែលដាំដុះនៅកន្លែងផ្សេងទៀត។
លោកបានមានប្រសាសន៍ថា “យើងដឹងថា រសជាតិរបស់ទុរេន មូសាង ឃីង នៅប្រទេសម៉ាឡេស៊ីមិនដូចគ្នាទេ” លោកបានបន្ថែមថា លោកបានឃើញផ្ទាល់ភ្នែកនូវគំរូទុរេន ដែលមានស្លាកថា មូសាង ឃីង ក្នុងអំឡុងពេលទស្សនកិច្ចនៅប្រទេសចិន។
លោកបានមានប្រសាសន៍ថា «នៅពេលណាខ្ញុំទៅលេងប្រទេសចិន មិនថាជាផ្លូវការ ឬក្រៅផ្លូវការទេ ខ្ញុំដើរមើលផ្លែទុរេន ដែលតាំងលក់នៅទីនោះ។ នៅពេលផ្លែទុរេនដាក់ឈ្មោះថា មូសាង ឃីង ខ្ញុំបានសាកល្បងភ្ល័ក្ស តែវាមិនដូចរបស់ប្រទេសម៉ាឡេស៊ីទេ»។
ក្រសួងកសិកម្ម និងសន្តិសុខស្បៀង ម៉ាឡេស៊ីកំពុងធ្វើការជាមួយអាជ្ញាធរចិន រួមទាំងរដ្ឋបាលគយទូទៅនៃប្រទេសចិន ដើម្បីធានាបាននូវការទទួលស្គាល់ និងការការពារការនាំចេញទុរេន មូសាង ឃីង ពិតប្រាកដរបស់ម៉ាឡេស៊ី។
លោកបានមានប្រសាសន៍ទៀតថា «តាមរយៈអាជ្ញាធរទីផ្សារកសិកម្មសហព័ន្ធ យើងដាក់ស្លាកផ្លែទុរេននៅក្រោមស្លាក ម៉ាយបេស (MyBest) មានន័យថា របស់ខ្ញុំល្អបំផុត ដូច្នេះផ្លែទុរេន មូសាង ឃីង របស់ម៉ាឡេស៊ីពិតប្រាកដ ដែលត្រូវបានឯកភាពដោយរដ្ឋបាលគយទូទៅនៃប្រទេសចិន អាចត្រូវបានទទួលស្គាល់យ៉ាងច្បាស់»។
លោករដ្ឋមន្ត្រីក្រសួងកសិកម្ម និងសន្តិសុខស្បៀង បានបន្ថែមថា ភ្នាក់ងារអនុវត្តច្បាប់ រួមទាំងសេវាចត្តាឡីស័ក និងអធិការកិច្ចរបស់ប្រទេសម៉ាឡេស៊ី នឹងបង្កើនការចូលរួមផ្នែកបច្ចេកទេស និងពិភាក្សាជាមួយនិយ័តករចិន ដើម្បីដោះស្រាយការព្រួយបារម្ភអំពីការបកស្រាយខុសការពិត។
លោកបានមានប្រសាសន៍ថា “យើងនឹងពិភាក្សាយ៉ាងលម្អិតជាមួយអគ្គរដ្ឋបាលគយចិន និងជូនដំណឹងដល់ប្រទេសចិន តាមរយៈបណ្តាញផ្សេងៗ ដើម្បីឱ្យពួកគេដឹងថា ផ្លែទុរេន មូសាង ឃីង របស់ម៉ាឡេស៊ីត្រូវបានអនុម័ត និងមានស្លាក ម៉ាយបេស។”
លោកបញ្ជាក់ថា ការការពារម៉ាកយីហោ ផ្លែទុរេន មូសាង ឃីង នៅតែជាអាទិភាព ដោយសារការនាំចេញផ្លែទុរេនទៅកាន់ប្រទេសចិន បានអភិវឌ្ឍទៅជាមានតម្លៃខ្ពស់ និងជាប្រភពចំណូលសម្រាប់កសិករម៉ាឡេស៊ី។
លោកបានមានប្រសាសន៍អះអាងដូច្នេះថា «យើងត្រូវតែការពាររឿងនេះ ព្រោះការនាំចេញទៅប្រទេសចិន មានតម្លៃខ្ពស់ ហើយបានក្លាយជាមុខរបរថ្មីសម្រាប់កសិករទុរេនរបស់យើង។ ដូច្នេះ យើងនឹងបន្តការពារឈ្មោះពូជទុរេន មូសាង ឃីង ជាម៉ាករបស់ប្រទេសម៉ាឡេស៊ី»៕
