ដោយ នៅ ស៊ីវុត្ថា
ភ្នំពេញ៖ ផ្សារទំនើបនៅក្នុងទីក្រុងហុងកុងប្រមាណ៦០០ទីតាំងបានសម្រេចទទួលទិញគ្រាប់ស្វាយចន្ទីពីកម្ពុជា យកទៅដាក់តំាងលក់បន្តនៅក្នុងផ្សាររបស់ខ្លួន បន្ទាប់ពីមើលឃើញសក្តានុពល និងគុណភាពស្វាយចន្ទី ដែលដាំដុះដោយកសិករបស់កម្ពុជា។
ការទទួលទិញស្វាយចន្ទីពីផ្សារទំនើបទាំងនេះ គឺជាកិច្ចខំប្រឹងប្រែងប្រែងរបស់ក្រសួងពាណិជ្ជកម្មកម្ពុជា ដែលជាសេនាធិការបស់រាជរដ្ឋាភិបាលកម្ពុជា ក្នុងការជួយកសិករឱ្យមានលំនឹងទីផ្សារ និងតម្លៃ។
លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា នៅក្នុងកិច្ចសម្ភាសជាមួយអ្នកសារព័ត៌មាននៅថ្ងៃទី២៨ ខែមេសា ឆ្នាំ២០២៦ ឱ្យដឹងថា ដើម្បីឆ្លើយតបទនឹងកំណើននៃការផ្គត់ផ្គង់ស្វាយចន្ទីនៅក្រៅប្រទេស ក្រសួងពាណិជ្ជកម្មការចរចាទទួលបានជោគជ័យជាមួយផ្សារទំនើបទាំងនោះឱ្យទទួលទិញគ្រាប់ស្វាយចន្ទីពីកម្ពុជា។
លោកជំទាវបន្ថែមទៀតថា បន្ទាប់ពីមានផ្គត់ផ្គង់នៅក្នុងទីផ្សារក្រៅប្រទេសបានច្រើន នឹងធ្វើឱ្យកម្ពុជាក្លាយទៅជាអធិរាជស្វាយចន្ទី ដូចប្រសាសន៍របស់សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា និងបច្ចុប្បន្នជាប្រធានព្រឹទ្ធសភាកម្ពុជា។
ទាក់ទិននឹងបញ្ហានេះ លោក ស៊ុយ កុកធាន អនុប្រធានសមាគមស្វាយចន្ទីកម្ពុជា បានស្វាគមន៍ចំពោះកិច្ចខិតខំប្រែងរបស់ក្រសួងពាណិជ្ជកម្ម ក្នុងការស្វែងរកទីផ្សារថ្មីៗសម្រាប់នាំចេញគ្រាប់ស្វាយចន្ទីកម្ពុជាទៅកាន់ទីផ្សារអន្តរជាតិ។ ប៉ុន្តែ អ្វីដែលសំខាន់កម្ពុជាគ្មានគ្រាប់ស្វាចន្ទី ដែលកែច្នៃរួចលក់ទៅឱ្យគេ ដោយសារតែរោងចក្រមួយចំនួនគ្មានទុនគ្រប់គ្រាន់ក្នុងការប្រមូលទិញស្វាយចន្ទីឆៅយកមកកែច្នៃក្នុងរយៈពេលពេញមួយឆ្នាំ។
យោងតាមទិន្នន័យរបស់សមាគមស្វាយចន្ទីកម្ពុជា បានឱ្យដឹងថា នៅក្នុងឆ្នាំ២០២៥ កម្ពុជាបាននាំចេញគ្រាប់ស្វាយចន្ទីឆៅប្រមាណមួយលានតោន ទៅកាន់ទីផ្សារអន្តរជាតិ ដោយទទួលបានចំណូលមកវិញប្រមាណ១,៥ពាន់លានដុល្លារ គឺកើនឡើង២៧ភាគរយ ធៀបរយៈពេលដូចគ្នាឆ្នាំ២០២៤។
ប្រទេសកម្ពុជាមានដី ដែលសមស្របអាចដាំដុះដំណាំស្វាយចន្ទី ប្រមាណជា១,២៨លានហិកតា។ ចំពោះខេត្តកំពង់ធំមានផ្ទៃដីដាំដុះច្រើនជាងគេគឺប្រមាណជាង១៤ម៉ឺនហិកតា បន្ទាប់មកមានខេត្តក្រចេះ ប្រមាណជាង១០ម៉ឺនហិកតា និងខេត្តរតនគិរីប្រមាណជា៩,៧ម៉ឺនហិកតា៕
