ហាណូយ៖ អាជ្ញាធរវៀតណាម បានបំផ្លាញចោលសត្វស្លាបជាង៩០០ក្បាល នៅក្នុងខេត្តហាទិញ (Ha Tinh) បន្ទាប់ពីមានការផ្ទុះជំងឺគ្រុនផ្តាសាយបក្សី H5N1 យ៉ាងខ្លាំង ដូច្នេះអាជ្ញាធរមូលដ្ឋានបានបង្កើនវិធានការដើម្បីទប់ស្កាត់រការចម្លងមេរោគពីសត្វទៅមនុស្ស។
ប្រធានមជ្ឈមណ្ឌលគ្រប់គ្រងជំងឺឆ្លង បាននិយាយថា ការផ្ទុះឡើងនូវជំងឺឆ្លងនេះ ត្រូវបានរកឃើញនៅថ្ងៃទី៧ ខែកុម្ភៈ ឆ្នាំ២០២៦ នៅក្នុងឃុំមួយ នៅក្នុងខេត្តហាទិញ ភាគខាងត្បូងទីក្រុងហាណូយ ក្រោយពីការធ្វើតេស្តនៅមន្ទីរពិសោធន៍ បានបញ្ជាក់ថា សំណាកសត្វស្លាបពីរប្រភេទមានផ្ទុកមេរោគគ្រុនផ្តាសាយបក្សី H5N1។
របាយការណ៍បឋម បានបង្ហាញថា បសុបក្សីបានធ្លាក់ខ្លួនឈឺ ឬងាប់នៅតាមផ្ទះកសិករចំនួន២៧គ្រួសារ ក្នុងចំណោមកសិករសរុប១២៣គ្រួសាររស់នៅក្នុងឃុំខាងលើនេះ ដូច្នេះត្រូវតែសម្លាប់សត្វចោលស្លាបចំនួន៩០២ក្បាល ដែលភាគច្រើនជាសត្វមាន់។
មន្ត្រីសុខាភិបាលវៀតណាម បានដាក់ពង្រាយបុគ្គលិកដើម្បីតាមដានសុខភាពមនុស្ស ដែលបានប៉ះពាល់សត្វបសុបក្សីទាំងអស់នេះ ចំណែកមជ្ឈមណ្ឌលគ្រប់គ្រងជំងឺឆ្លងបានផ្តល់ថ្នាំបាញ់សម្លាប់មេរោគនៅតាមកសិដ្ឋានចិញ្ចឹមសត្វស្លាបក្នុងតំបន់ផ្ទុះជំងឺឆ្លង។
ប្រធានមជ្ឈមណ្ឌលគ្រប់គ្រងជំងឺឆ្លង បាននិយាយថា ស្ថានភាពជំងឺផ្តាសាយបក្សីនេះកំពុងតែស្ថិតក្រោមការគ្រប់គ្រង ប៉ុន្តែបានព្រមានពីហានិភ័យខ្ពស់នៃការឆ្លងរាលដាលឡើងវិញ នៅមុនថ្ងៃបុណ្យចូលឆ្នាំថ្មី ឬថ្ងៃឈប់សម្រាកបុណ្យតេត របស់វៀតណាម នៅពេលវេលាមានការដឹកជញ្ជូន និងមានតម្រូវការសាច់សត្វស្លាបច្រើនខុសពីថ្ងៃធម្មតា។
ក្រៅវិធានការទប់ស្កាត់ អាជ្ញាធរវៀតណាម ក៏បានអំពាវនាវដល់ប្រជាពលរដ្ឋវៀតណាម សូមកុំបរិភោគសាច់បសុបក្សីឈឺ ឬងាប់ ចៀសវាងបិរភោគម្ហូបឈាមឆៅ ត្រូវចម្អិនម្ហូបឱ្យបានឆ្អិនល្អ ត្រូវមានអនាម័យដោយលាងដៃ និងទៅពិភាក្សាជាមួយក្រុមគ្រូពេទ្យ ប្រសិនបើមានរោគសញ្ញា ដូចជា ក្តៅខ្លួន ក្អក ឬពិបាកដកដង្ហើម។
នៅប្រទេសវៀតណាម ការផ្ទុះជំងឺផ្តាសាយបក្សី H5N1 ដំបូងត្រូវបានរកឃើញក្នុងឆ្នាំ២០០៣ ដែលនាំឱ្យមានការផ្ទុះឡើងនៃការឆ្លងរាលដាលដល់បសុបក្សីជាង៥៦លានក្បាល។ ចាប់ពីឆ្នាំ២០០៣ ដល់ឆ្នាំ២០២២ ការឆ្លងជំងឺផ្តាសាយពីសត្វមកមនុស្សក៏ត្រូវបានគេរាយការណ៍ផងដែរ ជាមួយនឹងអត្រាមនុស្សស្លាប់រហូតដល់៥០ភាគរយនៃអ្នកឆ្លងជំងឺ។
ទោះបីជាមានការរីកចម្រើនគួរឱ្យកត់សម្គាល់ក្នុងការបង្ការ និងគ្រប់គ្រងជំងឺឆ្លងនេះក៏ដោយ ក៏នៅតែមានការផ្ទុះឡើងនៃជំងឺឆ្លងផ្តាសាយបក្សីកើតឡើងជាបន្តបន្ទាប់ នៅក្នុងប្រទេសវៀតណាម ជាពិសេស អត្រាផ្ទុះឡើងខ្ពស់បំផុតនៅក្នុងរដូវរងា ដែលចាប់ផ្តើមពីខែធ្នូ ដល់ខែមីនា។
នៅចន្លោះឆ្នាំ២០២៣ និងពាក់កណ្តាលឆ្នាំ២០២៤ មានការផ្ទុះឡើងនៃជំងឺផ្តាសាយបក្សីប្រហែល២០ករណី នៅក្នុងខេត្តបាក់និញ និញប៊ិញ ទៀនយ៉ាង និងខេត្តឡុងអាន ដែលជាខេត្តស្ថិតនៅភាគខាងជើងវៀតណាម ហើយអាជ្ញាធរមូលដ្ឋានបានបំផ្លាញចោលសត្វស្លាបអស់ជាង៦ ០០០ក្បាល៕
