ដោយ ឡុង សារេត
ភ្នំពេញ៖ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍បានចាត់ទុកសហគ្រាសកែច្នៃ និងក្រុមហ៊ុនចំនួន១១៧ ដែលបានចូលរួមដាក់តាំងបង្ហាញផលិតផលរបស់ខ្លួន គឺបង្ហាញឱ្យឃើញពីចលនាជាតិនិយមពុះកញ្ច្រោលកាន់តែខ្លាំង មិនដូចនៅពេលកន្លងមក។
ថ្លែងក្នុងពិធីបើកពិព័រណ៍ផលិតផល និងសេវាកម្មទេសចរណ៍កម្ពុជា កាលថ្មីៗនេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ មានប្រសាសន៍ថា ព្រឹត្តិការណ៍ពិព័រណ៍ផលិត និងសេវាកម្មទេសចរណ៍កម្ពុជា គឺជាឱកាសមួយដ៏ល្អសម្រាប់ផលិតករ ប្រតិបត្តិករក្នុងស្រុកជាមួយនិងអ្នកប្រើប្រាស់។ បង្កើតឱកាសដល់អ្នកវិនិយោគក្នុងការធ្វើទំនាក់ទំនង ក្នុងគោលបំណងសំដៅជំរុញកំណើនអាជីវកម្ម ផលិតកម្ម។ លើសពីនេះចូលរួមជំរុញការប្រើប្រាស់ផលិតផលខ្មែរ។
ឯកឧត្តមបន្តទៀតថា ការរៀបចំពិព័រណ៍ថ្ងៃនេះពិតជានិងផ្តល់នូវកាលានុវត្តភាពថ្មីៗបន្ថែមទៀតដល់អ្នកផ្គត់ផ្គង់ អ្នកចែកចាយនៅក្នុងប្រទេស ដែលជាឱកាសជួបជាមួយអ្នកជំនាញក្នុងវិស័យឧស្សាហកម្មទេសចរណ៍ មានក្រុមហ៊ុនផលិតម្ហូបអាហារ ភេសជ្ជៈ ក្រុមហ៊ុនសិប្បកម្មធ្វើដោយដៃ ក្រុមហ៊ុនផលិតនូវផលិតផលក្នុងស្រុក និងផលិតផលទូទៅ។
ឯកឧត្តម ហួត ហាក់ មានប្រសាសន៍ថា “ខ្ញុំសូមបញ្ជាក់ថា ចំនួនស្តង់១១៧ ដែលដាក់តាំងបង្ហាញផលិតផលក្នុងពេលនេះជាចំនួនមួយដ៏ច្រើន ពីព្រោះការតាំងពិព័រណ៍ពេលខ្លះអាចមាន២០០ស្តង់ មាន៣០០ស្តង់ ឬច្រើនជាងនេះ ប៉ុន្តែការតាំងពិព័រណ៍មុនពេលកម្ពុជាជួបបញ្ហាជាមួយប្រទេសថៃ គឺមានផលិតផលខ្មែរដាក់តាំងលក់មានកម្រិត ហើយក្រៅពីនោះ គឺសុទ្ធស៊ឹងតែជាផលិតផលនាំចូលមកពីបរទេស។ ប៉ុន្តែនៅពេលនេះចំនួនស្តង់ ដែលបានចូលរួម១១៧ស្តង់ គឺសុទ្ធស៊ឹងតែជាផលិតផលរបស់ខ្មែរ ដែលខ្មែរជាអ្នកផលិត”។
ឯកឧត្តមសង្កត់ធ្ងន់បន្ថែមទៀតថា “ការចូលរួមដាក់តាំងបង្ហាញផលិតផលខ្មែរចំនួន១១៧ស្តង់នេះគឺបង្ហាញចលនាជាតិនិយមដ៏ពុះកញ្ច្រោល ស្មារតីជាតិនិយមក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន ជាប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឃើញថា ចលនាជាតិនិយមមានភាពពុះកញ្ច្រោល ស្មារតីជាតិនិយមកាន់តែរួបរួម កាន់តែខ្លាំងក្លា ក្រោមអភិក្រម ខ្មែររួបរួម គឺខ្មែរខ្លាំង”។
ចំពោះការផលិត និងការគាំទ្រផលិតខ្មែរមួយរយៈចុងក្រោយនេះ សម្រាប់អ្នកស្រី សែម សុជាតា ម្ចាស់សិប្បកម្មនាងរំដេង ក៏ដូចជាអ្នកស្រី ជា សារ៉ឹម ម្ចាស់សិប្បកម្មដៃមាស បានទទួលស្គាល់ថាផលិតផលកែច្នៃចេញពីវត្ថុធាតុដើមក្នុងស្រុកចាប់ផ្តើមមានការផ្តល់តម្លៃគាំទ្រ និងប្រើប្រាស់ពីប្រជាពលរដ្ឋនៅក្នុងប្រទេសមានសន្ទុះកើនឡើងជាបន្តបន្ទាប់។ តែទោះជាបែបនេះក្តី ម្ចាស់សិប្បកម្មទាំងពីរបានសំណូមពរឱ្យអ្នកប្រើប្រាស់ផលិតផលខ្មែរបន្ថែមទៀត ដើម្បីចូលរួមផ្តល់អត្ថប្រយោជន៍ដល់កសិករដាំដុះនៅតាមតំបន់ឱ្យមានជីវភាពល្អប្រសើរ តាមរយៈការលក់កសិផលរបស់ខ្លួន មកឱ្យខាងអ្នកកែច្នៃ៕
