ដោយ ជិន ម៉ាដេប៉ូ
នំពេញ៖ លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់ ARDB TVឱ្យដឹងថា បើគិតពីតួលេខស្វាយចន្ទី បានបង្ហាញថា ផលិតកម្មចន្ទីឆៅក្នុងឆ្នាំ២០២៥ មានបរិមាណសរុបប្រមាណ១ ០២០ ៧៥៧តោន។
ក្នុងកំឡុងពេលដូចគ្នានេះ កម្ពុជាបាននាំចេញគ្រាប់ស្វាយចន្ទីឆៅប្រមាណ ១ ០០០ ៧៥៧តោន ទៅកាន់ទីផ្សារអន្តរជាតិ ដោយបង្កើតចំណូលបានប្រមាណ១,៥ ពាន់លានដុល្លារ ដែលជាការកើនឡើង២៧ ភាគរយ បើធៀបនឹងឆ្នាំ២០២៤។
លោកបានប្រាប់ថា កាលពីអំឡុងដើមឆ្នាំ២០២៥ មានការព្រួយបារម្ភពីការរអាក់រអួលទាក់ទងនឹងអាកាសធាតុ ជាពិសេសក្នុងអំឡុងខែមីនា ដោយសារអាកាសធាតុអាក្រក់ ដែលគេព្រួយបារម្ភពីការជះឥទ្ធិពលអវិជ្ជមានដល់ការប្រមូលផលក៏ដោយ។ ទោះបីជាយ៉ាងណា ស្ថានភាពបានចាប់ផ្តើមល្អប្រសើរឡើងវិញ នៅក្នុងខែមេសា ខែឧសភា និងខែមិថុនា ធ្វើឱ្យទិន្នផលគ្រាប់ស្វាយចន្ទីហក់ឡើងវិញញ គឺលើសពីការរំពឹងទុកកាលពីដំបូងឡើយ។
បើតាមប្រធានសហគមស្វាយចន្ទីកម្ពុជា បានឱ្យដឹងដែរថា តម្លៃគ្រាប់ចន្ទី មានការប្រែប្រួលអាស្រ័យទៅលើគ្រាប់សើម ឬស្ងួត និងតម្រូវការទីផ្សារហើយតម្លៃខ្ពស់បំផុតក្នុងកំណត់ត្រា គឺក្នុងខែតុលា ឆ្នាំ២០២៥ ដែលគ្រាប់ចន្ទីស្ងួតមានតម្លៃ៨ ០០០រៀល។
ក្នុងនេះគ្រាប់ចន្ទីឆៅ ដែលនាំចេញទៅកាន់ប្រទេសវៀតណាម និងតម្លៃជាមធ្យមឆ្នាំ២០២៥ ដែលបានបង្ហាញថា ការនាំចេញគ្រាប់ចន្ទីឆៅទៅវៀតណាម មានតម្លៃជាមធ្យម២០២៥ក្នុងនេះ គ្រាប់ស្វាយចន្ទីសើមពីខែមករាដល់ខែធ្នូ តម្លៃស្ថិតក្នុងចន្លោះ៥ ០០០ ដល់៦ ៥០០រៀល។ ចំណែកគ្រាប់ស្វាយចន្ទីស្ងួត មានតម្លៃពី៦ ២០០រៀល ដល់៨ ០០០រៀល។
ទាក់ទិនក្នុងរឿងនេះ លោក អូន ស៊ីឡុត ប្រធានសមាគមន៍ស្វាយចន្ទីកម្ពុជាបានបញ្ជាក់ឱ្យដឹងដែរថា មកដល់ពេលនេះគ្រាប់ស្វាយចន្ទី ដែលបានចុះបញ្ជីការពារពូជនៅក្រសួងកសិកម្ម រុក្ខាប្រមាញ់ និងនេសាទ មានចំនួនបួនប្រភេទ ដូចជា M-23,ពូជ M-10 ពូជ IM-4 និងពូជ H-09 ។
លោកបានប្រាប់ឱ្យដឹងថា សម្រាប់ដំណាំស្វាយចន្ទីនៅកម្ពុជាប្រមាណ៧០ភាគរយ ដែលដាំក្នុងលក្ខណៈទ្រង់ទ្រាយតូច គឺកសិករដាំជាលក្ខណៈគ្រួសារ និងមានតែប្រមាណ៣០ភាគរយប៉ុណ្ណោះ ដាំជាលក្ខណៈដីសម្បទានរបស់រាជរដ្ឋាភិបាល។
គួរបញ្ជាក់ថា បើយោងតាមអគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនាកន្លងមកថា ប្រទេសកម្ពុជាមានដីសមស្របអាចដាំដុះដំណាំស្វាយចន្ទី ប្រមាណជា ១,២៨លានហិកតា។ ក្នុងឆ្នាំ២០២៤ ផ្ទៃដីដាំដុះដំណាំស្វាយចន្ទីទូទាំង ប្រទេសកម្ពុជាមានប្រមាណ៥៨០ ១១៧ហិកតា ហើយដំណាំស្វាយចន្ទី ដែលស្ថិតក្នុងក្រឡាផ្ទៃនេះ គឺជាដំណាំមានអាយុកាលផ្តល់ផលល្អផងដែរ។
ដោយឡែកចំពោះខេត្តកំពង់ធំមានផ្ទៃដីដាំដុះច្រើនជាងគេ គឺប្រមាណ ១៤៧ ៧០០ហិកតា បន្ទាប់មកមានខេត្តក្រចេះ ប្រមាណជា១០២ ៥០០ហិកតា និងខេត្តរតនគិរី ប្រមាណជា៩៧ ២០០ហិកតា៕
