ហ្សាការតា៖ យោងតាមទិន្នន័យ ដែលចេញផ្សាយ កាលពីដើមខែមករា ឆ្នាំ២០២៦ ដោយទីភ្នាក់ងារស្ថិតិកណ្តាល បានឱ្យដឹងថា ប្រទេសឥណ្ឌូណេស៊ី បានកត់ត្រាអតិរេកពាណិជ្ជកម្មកើនឡើងចំនួន៣៨,៥៤ពាន់លានដុល្លារ គិតពីខែមករាដល់ខែវិច្ឆិកា ឆ្នាំ២០២៥ ដែលស្មើនឹងប្រមាណ៣៨ ៣២៤ពាន់លានដុល្លារ។
ទិន្នន័យក៏បានបង្ហាញទៀតថា អតិរេកនេះកើនឡើងដោយពាណិជ្ជកម្មមិនមែនជាចំណូលបានមកពីប្រេង និងឧស្ម័ន ដែលមានអតិរេកចំនួន៥៦,១៥ពាន់លានដុល្លារ ខណៈពេលចំណូលបានមកពីវិស័យប្រេង និងឧស្ម័ន ជាមានឱនភាពទៅវិញ គឺមានទឹកប្រាកើចំនួន១៧,៦១ពាន់លានដុល្លារ។
ចំណែកការនាំចូលសរុបរបស់ឥណ្ឌូណេស៊ី ក្នុងអំឡុងពេល១១ខែដំបូងនៃឆ្នាំ២០២៥ មានទឹកប្រាក់ចំនួន២១៨,០២ពាន់លានដុល្លារ គឺកើនឡើង២,០៣ភាគរយពីមួយឆ្នាំទៅមួយឆ្នាំ។ ក្នុងនោះ ការនាំចូលមិនមែនប្រេង និងឧស្ម័ន មានទឹកប្រាក់ចំនួន១៨៨,៦១ពាន់លានដុល្លារ គឺកើនឡើង៤,៣៧ភាគរយ បើធៀបនឹងរយៈពេលដូចគ្នា ក្នុងឆ្នាំ២០២៤។
ការនាំចេញសរុបក្នុងរយៈពេលដូចគ្នានេះ មានទឹកប្រាក់ចំនួន២៥៦,៥៦ពាន់លានដុល្លារ ដែលជាកំណើនចំនួន៥,៦១ភាគរយ ពីមួយឆ្នាំទៅមួយឆ្នាំ។ ការនាំចេញមិនមែនប្រេង និងឧស្ម័ន នៅក្នុងឆ្នាំ២០២៥ បានកើនដល់ទំហំទឹកប្រាក់២៤៤,៧៥ពាន់លានដុល្លារ គឺកើនឡើង៧,០៧ភាគរយ ធៀបនឹងឆ្នាំ២០២៤។
ប្រទេសចិននៅតែជាគោលដៅធំបំផុតរបស់ឥណ្ឌូណេស៊ី សម្រាប់ការនាំចេញផលិតផលមិនមែនប្រេង និងឧស្ម័ន ដោយការនាំចេញមានតម្លៃ៥៨,២៤ពាន់លានដុល្លារ។ តួលេខនេះតាមពីក្រោយដោយសហរដ្ឋអាមេរិក ដែលមានតម្លៃ ជាទឹកប្រាក់ចំនួន២៨,១៤ពាន់លានដុល្លារ និងឥណ្ឌា ដែលមានតម្លៃជាទឹកប្រាក់ចំនួន១៦,៤៤ពាន់លានដុល្លារ។ ដូច្នេះ បើបូករួមបញ្ចូលគ្នា នោះទីផ្សារទាំងបីមានចំនួន៤ ភាគរយនៃការនាំចេញសរុបនៃផលិតផលមិនមែនប្រេង និងឧស្ម័នរបស់ប្រទេសឥណ្ឌូណេស៊ី។
ការនាំចេញទៅកាន់ប្រទេសចិន មាន២៣,៨ភាគរយនៃការនាំចេញសរុបរបស់ឥណ្ឌូណេស៊ី សម្រាប់ផលិតផលមិនមែនប្រេង និងឧស្ម័ន ដែលមានលោហធាតុ និងដែកថែប ឥន្ធនៈរ៉ែ និងផលិតផលនីកែល។ សហរដ្ឋអាមេរិកបានរួមចំណែក១១,៥ភាគរយ ខណៈពេលឥណ្ឌាមានចំនួន៦,៧២ភាគរយ។
បើគិតនៅតាមតំបន់វិញ បានឱ្យដឹងថា ការនាំចេញផលិតផលមិនមែនប្រេង និងឧស្ម័ន ទៅកាន់ប្រទេសជាសមាជិកសមាគមប្រជាជាតិអាស៊ីអាគ្នេយ៍ ហៅកាត់ថា អាស៊ាន មានចំនួនសរុប៤៧,២១ពាន់លានដុល្លារ ស្មើនឹង១៩,២៩ភាគរយ ខណៈការនាំចេញទៅកាន់សហភាពអឺរ៉ុប មានចំនួន១៧,៧៥ពាន់លានដុល្លារ ឬស្មើនឹង៧,២៥ភាគរយ។
ចំពោះនាំចូលវិញ ប្រទេសចិនក៏ជាប្រភពដ៏ធំបំផុតនៃការនាំចូលផលិតផលមិនមែនប្រេង និងឧស្ម័ន របស់ឥណ្ឌូណេស៊ី ក្នុងអំឡុងខែមករា ដល់ខែវិច្ឆិកា ឆ្នាំ២០២៥ ដោយការនាំចេញមានតម្លៃជាទឹកប្រាក់ចំនួន៧៧,៥២ពាន់លានដុល្លារ ឬស្មើនឹង៤១,១ភាគរយ។ បន្ទាប់មក គឺប្រទេសជប៉ុន ដែលមានតម្លៃជាទឹកប្រាកើចំនួន១៣,២៨ពាន់លានដុល្លារ ឬស្មើនឹង៧,០៤ភាគរយ និងសហរដ្ឋអាមេរិក មានតម្លៃជាទឹកប្រាក់ចំនួន៨,៩៣ពាន់លានដុល្លារ ឬស្មើនឹង៤,៧៣ភាគរយ។
ការនាំចូលពីប្រទេសសមាជិកអាស៊ាន មានតម្លៃជាទឹកប្រាក់ចំនួនសរុប២៩,៤៦ពាន់លានដុល្លារ ឬស្មើនឹង១៥,៦២ភាគរយ នៃការនាំចូលផលិតផលមិនមែនប្រេង និងឧស្ម័ន ខណៈការនាំចូលពីសហភាពអឺរ៉ុប មានតម្លៃជាទឹកប្រាក់ចំនួន១១,២ពាន់លានដុល្លារ ឬស្មើនឹង៥,៩៤ភាគរយ៕
