ភ្នំពេញ៖ ក្នុងឆ្នាំ២០២៥កន្លងមកកម្ពុជាបានរកប្រាក់ចំណូលពីការលក់ស្វាយចន្ទីឆៅបានប្រមាណ ១,៥ពាន់លានដុល្លារ ដែលជាការកើនឡើង២៧ ភាគរយ បើធៀបនឹងឆ្នាំ២០២៤។
ក្នុងរយៈពេល១២ខែនៃឆ្នាំ២០២៥នេះដែរ កម្ពុជាផលិតបានគ្រាប់ស្វាយចន្ទីឆៅ ជាងមួយលានតោន បើទោះបីមានការព្រួយបារម្ភពីបញ្ហាប្រឈមនៃការប្រែប្រួលអាកាសធាតុក៏ដោយ។
លោក អួន ស៊ីឡុត ប្រធានសមាគមស្វាយចន្ទីកម្ពុជា បានប្រាប់ ARDB TVឱ្យដឹងថា បើគិតពីតួលេខនោះបានបង្ហាញថា ផលិតកម្មចន្ទីឆៅក្នុងឆ្នាំ២០២៥ មានសរុបប្រមាណ១ ០២០ ៧៥៧តោន។ ក្នុងកំឡុងពេលដូចគ្នានេះ កម្ពុជាបាននាំចេញគ្រាប់ស្វាយចន្ទីឆៅប្រមាណ១ ០០០ ៧៥៧តោន ទៅកាន់ទីផ្សារអន្តរជាតិ ដោយបង្កើតចំណូលបានប្រមាណ១,៥ពាន់លានដុល្លារ ដែលជាការកើនឡើង២៧ ភាគរយ បើធៀបនឹងឆ្នាំ២០២៤។
លោកបានប្រាប់ថា កាលពីអំឡុងដើមឆ្នាំ២០២៥ មានការព្រួយបារម្ភពីការរអាក់រអួលទាក់ទងនឹងអាកាសធាតុ ជាពិសេសក្នុងអំឡុងខែមីនា ដោយសារអាកាសធាតុអាក្រក់ បង្កការព្រួយបារម្ភដល់ការប្រមូលផលក៏ដោយ។ ទោះបីជាយ៉ាងណា ស្ថានភាពបានចាប់ផ្តើមប្រសើរឡើងវិញ នៅក្នុងខែមេសា, ខែឧសភា និងខែមិថុនា ធ្វើឱ្យទិន្នផលស្វាយចន្ទីល្អប្រសើរឡើងវិញ លើសពីការរំពឹងទុក។
បើតាមប្រធានសហគមស្វាយចន្ទីកម្ពុជា បានឱ្យដឹងដែរថា តម្លៃគ្រាប់ចន្ទី មានការប្រែប្រួលអាស្រ័យទៅលើគ្រាប់សើម ឬស្ងួត និងតម្រូវការទីផ្សារហើយតម្លៃខ្ពស់បំផុតក្នុងកំណត់ត្រា គឺក្នុងខែតុលា ឆ្នាំ២០២៥ ដែលចន្ទីស្ងួតមានតម្លៃ៨ ០០០រៀល។ ក្នុងនេះគ្រាប់ចន្ទីឆៅ ដែលនាំទៅកាន់ប្រទេសវៀតណាម មានតម្លៃក្នុងចន្លោះពី៥ ០០០រៀល ដល់៦ ៥០០រៀល ក្នុងមួយគីឡូក្រាម ចំណែកគ្រាប់ចន្ទីស្ងួត មានតម្លៃពី៦ ២០០រៀល ដល់៨ ០០០រៀល។
ទាក់ទិនក្នុងរឿងនេះ លោក អូន ស៊ីឡុត បានបញ្ជាក់ឱ្យដឹងដែរថា មកដល់ពេលនេះគ្រាប់ស្វាយចន្ទី ដែលបានចុះបញ្ជីការពារពូជនៅក្រសួងកសិកម្ម រុក្ខាប្រមាញ់ និងនេសាទ មានចំនួនបួនប្រភេទ ដូចជាពូជ M-23, ពូជ M-10 ពូជ IM-4 និងពូជ H-09។
លោកបានប្រាប់ឱ្យដឹងថា សម្រាប់ដំណាំស្វាយចន្ទីនៅកម្ពុជាប្រមាណ៧០ភាគរយហើយ ដាំក្នុងលក្ខណៈទ្រង់ទ្រាយតូចតាច គឺកសិករដាំជាលក្ខណៈគ្រួសារ និងមានតែប្រមាណ៣០ភាគរយប៉ុណ្ណោះ ដាំជាលក្ខណៈដីសម្បទានរបស់រាជរដ្ឋាភិបាល។
គួរបញ្ជាក់ថា បើយោងតាមអគ្គនាយកនៃអគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ បានឱ្យដឹងនាពេលកន្លងមកថា ប្រទេសកម្ពុជាមានដីសមស្របអាចដាំដុះដំណាំស្វាយចន្ទី ប្រមាណជា ១,២៨លានហិកតា។ ក្នុងឆ្នាំ២០២៤ ផ្ទៃដីដាំដុះដំណាំស្វាយចន្ទីទូទាំង ប្រទេសកម្ពុជាមានប្រមាណ៥៨០ ១១៧ហិកតា ហើយដំណាំស្វាយចន្ទី ដែលស្ថិតក្នុងក្រឡាផ្ទៃនេះជាដំណាំមានអាយុកាលផ្តល់ផលល្អផងដែរ។ ដោយឡែកចំពោះខេត្តកំពង់ធំមានផ្ទៃដីដាំដុះច្រើនជាងគេបង្អស់ គឺប្រមាណ ១៤៧ ៧០០ហិកតា បន្ទាប់មកមានខេត្តក្រចេះ ប្រមាណជា ១០២ ៥០០ ហិកតា និងខេត្តរតនគិរី មានផ្ទៃដីប្រមាណជា៩៧ ២០០ ហិកតា៕
