ដោយ ឡុង សារេត
ភ្នំពេញ៖ ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ បានផ្តល់នូវយោបល់សំខាន់ៗចំនួន៧ចំណុចដល់ជូនគ្រប់ក្រសួងស្ថាប័ន និងតួអង្គពាក់ព័ន្ធក្នុងវិស័យហិរញ្ញវត្ថុ ជាពិសេសធនាគារជាតិនៃកម្ពុជា និងអាជ្ញាធរសេវាហិរញ្ញវត្ថុមិនមែនធនាគារ សំដៅចាប់យកកាលានុវត្តភាពពីការរីកចម្រើននៃវិស័យហិរញ្ញវត្ថុជាមួយនឹងការត្រៀមលក្ខណៈដោះស្រាយនូវបញ្ហាប្រឈម ដែលអាចនឹងកើតឡើងជាយថាហេតុ។
នៅក្នុងពិធីបើកសម្ពោធដាក់ឱ្យប្រើប្រាស់ជាផ្លូវ «យុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០២៥-២០៣០» នៅថ្ងៃទី១៧ ខែធ្នូឆ្នាំ២០២៥ របស់ធនាគារជាតិនៃកម្ពុជា ឯកឧត្តមអគ្គបណ្ឌិតសភាចារ្យ បានមានប្រសាសន៍ដើម្បីចូលរួមជាវិភាគទានសំដៅចាប់យកកាលានុវត្តភាពពីការរីកចម្រើននៃវិស័យហិរញ្ញវត្ថុជាមួយនឹងការត្រៀមលក្ខណៈដោះស្រាយនូវបញ្ហាប្រឈម ដែលអាចនឹងកើតឡើងជាយថាហេតុ។
ក្នុងនាមជាប្រធានគណៈកម្មាធិការគោលនយោបាយសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ,ខ្ញុំសូមយកឱកាសដ៏ថ្លៃថ្លានេះលើកឡើងនូវយោបល់មួយចំនួនជូនដល់គ្រប់ក្រសួង-ស្ថាប័ន និងតួអង្គពាក់ព័ន្ធក្នុងវិស័យហិរញ្ញវត្ថុ,ជាពិសេសធនាគារជាតិនៃកម្ពុជា និងអាជ្ញាធរសេវាហិរញ្ញវត្ថុ មិនមែនធនាគារដូចខាងក្រោម៖
ទី១)-ការរៀបចំប្រព័ន្ធសំណាញ់សុវត្ថិភាពហិរញ្ញវត្ថុសមស្រប៖ ធនាគារជាតិនៃកម្ពុជាត្រូវពន្លឿនការដឹកនាំរៀបចំយន្តការការពារប្រាក់បញ្ញើ, ដោយមានការចូលរួមជិតស្និទ្ធពីអាជ្ញាធរសេវាហិរញ្ញវត្ថុមិនមែនធនាគារ និងក្រសួងសេដ្ឋកិច្ច និងហិរញ្ញវត្ថុ។ ទន្ទឹមនេះ,ធនាគារជាតិនៃកម្ពុជា ក្រសួងសេដ្ឋកិច្ច និងហិរញ្ញវត្ថុ និងអាជ្ញាធរសេវាហិរញ្ញវត្ថុមិនមែនធនាគារ ត្រូវសិក្សា និងរៀបចំក្របខណ្ឌបទប្បញ្ញត្តិនានាស្តីពីការត្រៀមទប់ទល់ និងការគ្រប់គ្រងវិបត្តិព្រមទាំងរៀបចំសូចនាករហានិភ័យគន្លឹះ និងប្រព័ន្ធផ្តល់សញ្ញាមុនជាដើម សំដៅរួមចំណែកធានាស្ថិរភាពនៃប្រព័ន្ធហិរញ្ញវត្ថុជាតិ។
ទី២)-ការលើកកម្ពស់បរិយាបន្នហិរញ្ញវត្ថុ និងអក្ខរកម្មហិរញ្ញវត្ថុ៖ ធនាគារជាតិនៃកម្ពុជាត្រូវបន្តដឹកនាំធ្វើបច្ចុប្បន្នកម្មយុទ្ធសាស្ត្រជាតិ ស្តីពីបរិយាប័ន្ទហិរញ្ញវត្ថុដោយមានកិច្ចសហការជិតស្និទ្ធពីក្រសួង ស្ថាប័នពាក់ព័ន្ធ ដើម្បីកំណត់ទិសដៅយុទ្ធសាស្ត្រឲ្យស្របតាមបរិការណ៍សង្គម សេដ្ឋកិច្ចកម្ពុជា,មានជាអាទិ៍៖ការកាត់បន្ថយថ្លៃដើមនៃការទទួលបានហិរញ្ញប្បទាន,ការពង្រីកលទ្ធភាពនៃការទទួលបានឥណទាន និងការខិតខំធានានូវការប្រើប្រាស់ឥណទានឲ្យចំគោលដៅ។
ទន្ទឹមនេះ,ក្រសួងអប់រំ យុវជន និងកីឡា ក៏គួរគិតគូរបញ្ចូលប្រធានបទទាក់ទងនឹងវិស័យហិរញ្ញវត្ថុ ក្នុងកម្មវិធិសិក្សាដើម្បីចូលរួមលើកកម្ពស់អក្ខរកម្មហិរញ្ញវត្ថុ, ទាំងក្នុងវិស័យធនាគារ និងមិនមែនធនាគារដល់សិស្ស និស្សិត។
ទី៣)-ការពង្រឹងសន្តិសុខសាយប័រ និងអភិបាលកិច្ចទិន្នន័យ៖ គ្រប់ក្រសួង ស្ថាប័នត្រួតពិនិត្យ និងអាជ្ញាធរអនុវត្តច្បាប់ ដែលមានការពាក់ព័ន្ធ ត្រូវចូលរួមធានាស្ថិរភាព និងសុវត្ថិភាពនៃប្រតិបត្តិការហិរញ្ញវត្ថុ ព្រមទាំងត្រូវចូលរួមជួយជំរុញអនុលោមភាព និងប្រសិទ្ធភាព នៃការអនុវត្តកិច្ចការប្រឆាំងការសម្អាតប្រាក់ និងហិរញ្ញប្បទានភេរវកម្ម និងហិរញ្ញប្បទានដល់ការរីកសាយភាយអាវុធមហាប្រល័យ។
ទី៤)- ការគិតគូររៀបចំហេដ្ឋារចនាសម្ព័ន្ធគាំទ្រ និងប្រព័ន្ធអេកូឡូស៊ី ក្នុងវិស័យហិរញ្ញវត្ថុ៖ ធនាគារជាតិនៃកម្ពុជា និងអាជ្ញាធរសេវាហិរញ្ញវត្ថុមិនមែនធនាគារ គប្បីរៀបចំឲ្យមានប្រព័ន្ធគ្រប់គ្រងផ្ទៃក្នុង និងហេដ្ឋារចនាសម្ព័ន្ធសមស្របដោយមានភាពប្រទាក់ក្រឡា និងសហថាមភាព ដើម្បីធានានូវប្រសិទ្ធភាពនៃការអនុវត្តព្រមទាំងត្រូវសិក្សា និងបង្កើតឧបករណ៍ហិរញ្ញវត្ថុថ្មីៗ ដើម្បីផ្តល់ភាពសំបូរបែបបន្ថែមទៀត សម្រាប់ការវិនិយោគក្នុងទីផ្សារហិរញ្ញវត្ថុ។
ទី៥)-ការរៀបចំយន្តការគាំពារអតិថិជន៖ ធនាគារជាតិនៃកម្ពុជា និងអាជ្ញាធរសេវាហិរញ្ញវត្ថុមិនមែនធនាគារ ក៏មានកាតព្វកិច្ចផងដែរ ក្នុងការរៀបចំក្របខណ្ឌបទប្បញ្ញត្តិចាំបាច់សម្រាប់ការស៊ើបអង្កេត និងការដោះស្រាយវិវាទសំដៅបង្កើនទំនុកចិត្តពីវិនិយោគិន និងសាធារណជន ។
ទី៦)- ការកសាងមូលធនមនុស្ស និងការបណ្តុះបណ្តាលឯកទេសកម្មលើវិស័យហិរញ្ញវត្ថុ៖ ធនាគារជាតិនៃកម្ពុជា និងអាជ្ញធរសេវាហិរញ្ញវត្ថុមិនមែនធនាគារ ត្រូវបន្តខិតខំពង្រឹង និងពង្រីកសមត្ថភាពមន្ត្រីលើការត្រួតពិនិត្យ ការតាមដាន និងការឃ្លាំមើលវិស័យហិរញ្ញវត្ថុ ព្រមទាំងត្រូវជំរុញការធ្វើសមាហរណកម្មវិស័យហិរញ្ញវត្ថុ និងការពង្រឹងកិច្ចសហប្រតិបត្តិការក្នុងតំបន់ និងសកលលោក ជាពិសេស តាមរយៈការចែករំលែកព័ត៌មាន ចំណេះដឹង និងចំណេះធ្វើ ទៅវិញទៅមកដើម្បីធានាថា ការអនុវត្ត និងការធ្វើនិយ័តកម្មក្នុងវិស័យហិរញ្ញវត្ថុត្រូវបានរៀបចំស្របតាមគោលការណ៍ និងនិន្នាការទីផ្សារក្នុងស្រុក និងអន្តរជាតិ និងទី៧)- ការរៀបចំនូវក្របខណ្ឌតាមដាន និងវាយតម្លៃសមិទ្ធកម្ម៖ គណៈកម្មាធិការដឹកនាំការអភិវឌ្ឍវិស័យហិរញ្ញវត្ថុត្រូវដឹកនាំការរៀបចំយន្តការតាមដាន និងវាយតម្លៃលើផែនការសកម្មភាព ដែលត្រូវបានដាក់ចេញក្នុងយុទ្ធសាស្ត្រនេះ, ដោយមានសូចនាករច្បាស់លាស់សម្រាប់វាស់វែងវឌ្ឍនភាពប្រកបដោយលក្ខណៈវិទ្យាសាស្ត្រ និងនវានុវត្តន៍ ដើម្បីធានានូវការអនុវត្តប្រកបដោយប្រសិទ្ធភាព និងស័ក្តិសិទ្ធិភាពខ្ពស់។
ពិធីសម្ពោធដាក់ឲ្យប្រើប្រាស់ជាផ្លូវការ នូវ «យុទ្ធសាស្ត្រអភិវឌ្ឍន៍ វិស័យហិរញ្ញវត្ថុ ឆ្នាំ២០២៥-២០៣០ នេះ គឺជាឱកាសដ៏ពិសិដ្ឋសម្រាប់វិស័យហិរញ្ញវត្ថុ ដែលត្រូវបានរៀបចំឡើងក្នុងគោលបំណងចែករំលែកព័ត៌មានដែលត្រូវបានធ្វើបច្ចុប្បន្នភាពចុងក្រោយ ពាក់ព័ន្ធនឹងវឌ្ឍនភាព និងទិសដៅថ្មីៗជាយុទ្ធសាស្ត្រក្នុងវិស័យហិរញ្ញវត្ថុនៅកម្ពុជា។
ក្នុងឱកាសនោះដែរ លោកជំទាវបណ្ឌិត ជា សិរី ទេសាភិបាលធនាគារជាតិនៃកម្ពុជា មានប្រសាសន៍ថា យុទ្ធសាស្ត្រអភិវឌ្ឍន៍វិស័យហិរញ្ញវត្ថុឆ្នាំ២០២៥-២០៣០នេះ ផ្ដោតលើអាទិភាពចម្បងៗរួមមាន៖
១)-ការពង្រឹងស្ថិរភាពហិរញ្ញវត្ថុដើម្បីការពារទំនុកចិត្ត និងភាពធន់
២)-ការជំរុញបរិយាបន្នហិរញ្ញវត្ថុជាពិសេស សម្រាប់ស្ត្រី យុវជន សហគ្រាសធុនមីក្រូ តូច និងមធ្យម និងសហគមជនបទ
៣)-ការអភិវឌ្ឍទីផ្សារហិរញ្ញវត្ថុឱ្យកាន់តែស៊ីជម្រៅ សំដៅធ្វើពិពិធកម្មប្រភពទុនរយៈពេលវែង
៤)-ការលើកកម្ពស់បរិវត្តកម្មឌីជីថល និងសន្តិសុខសាយប័រ ដើម្បីធានានូវសុវត្ថិភាព និងភាពទុកចិត្តនៃនវានុវត្តន៍បច្ចេកវិទ្យា
៥)-ការគាំទ្រនិងលើកកម្ពស់ហិរញ្ញវត្ថុប្រកបដោយចីរភាព ដែលគាំទ្រដល់បរិស្ថាន និងការប្រែប្រួលអាកាសធាតុ
៦)-ការពង្រឹងអភិបាលកិច្ច និងកិច្ចសហការរវាងស្ថាប័នទាំងអស់នៅក្នុងវិស័យហិរញ្ញវត្ថុ៕
