ពោធិ៍សាត់ ៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម ជា សមាជិកគណៈកម្មាធិការកណ្តាល និងជាសមាជិកយុវជន គណបក្សថ្នាក់កណ្តាល នាព្រឹកថ្ងៃទី២៧ ខែវិច្ឆិកា ឆ្នាំ២០២៥នេះ បានចាត់ទុកថា សហគ្រិនមានតួនាទីសំខាន់លើសពីម្ចាស់អាជីវកម្ម ដែលមានន័យថា សហគ្រិន គឺជាអ្នកកសាងភាពធន់ អ្នកបង្កើតដំណោះស្រាយសម្រាប់បញ្ហានានា និងជាអ្នកជំរុញវឌ្ឍនភាពមូលធនមនុស្ស។
ប្រសាសន៍លើកឡើងដូច្នេះ របស់ឯកឧត្តមបណ្ឌិត កៅ ថាច គឺក្នុងឱកាសអញ្ជើញបើកសិក្ខាសាលា និងធ្វើជាវាគ្មិន ស្តីពីកាលានុវត្តភាព និងទិសដៅវិនិយោគសម្រាប់អនាគត ដើម្បីចែកជូនចំណេះដឹងដល់ផែនសហគ្រិនវ័យក្មេងរបស់គណបក្សប្រជាជនកម្ពុជាក្នុងខេត្តពោធិ៍សាត់ ដែលរៀបចំឡើងនៅសណ្ឋាគារពោធិ៍សាត់រីវើសាយ។
កម្មវិធីសិក្ខាសិលានេះ ត្រូេះបានប្រារព្វឡើងក្រោមអធិបតីភាពឯកឧត្តម ម៉ៅ សាន សមាជិកគណៈកម្មាធិការកណ្តាល ជាអនុប្រធានគណៈកម្មាធិការគណបក្សខេត្ត និងជាសមាជិកក្រុមប្រឹក្សាខេត្ត ជាតំណាងដ៏ខ្ពង់ខ្ពស់របស់ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ លោក នាង ពុទ្ធារ៉ា អនុប្រធាននាយកដ្ឋានប្រតិបត្តិការ និងគ្រប់គ្រងតំបន់សេដ្ឋកិច្ចពិសេសនៃក្រុមប្រឹក្សាអភិវឌ្ឍន៍កម្ពុជា និងឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងម្ពុជា ក្នុងនោះរួមមានសមាជិកផែនសហគ្រិនវ័យក្មេងរបស់គណបក្សខេត្តពោធិ៍សាត់ សរុបប្រមាណ២០០នាក់។
ក្នុងឱកាសនេះ ឯកឧត្តមបណ្ឌិត កៅ ថាច បានថ្លែងកោតសរសើរ និងវាយតម្លៃខ្ពស់ចំពោះសមាគមសហគ្រិនវ័យក្មេង ព្រមទាំងយុវជនគណបក្សថ្នាក់កណ្តាល ផ្នែកសហគ្រិនវ័យក្មេង ដែលបានខិតខំអស់ពីកម្លំាងកាយចិត្ត ក្នុងការរៀចំកម្មវិធីនេះឡើង។
ឯកឧត្តមបណ្ឌិតបានមានប្រសាន៍ថា ការរៀបចំវេទិកាសម្រាប់កិច្ចពិភាក្សាក្នុងការតៀមខ្លួនសម្រាប់អាជីវកម្មថ្មី គឺចំពេលសេដ្ឋកិច្ចសកលមានភាពមិនប្រាកដប្រជា និងសេដ្ឋកិច្ចកម្ពុជាកំពុងងើបឡើងវិញ និងបានបង្ហាញឱ្យឃើញអំពីសារៈសំខាន់នៃវិស័យសហគ្រិនភាព ដែលដើរតួជាកម្លាំងចលករមួយ ក្នុងការជំរុញកំណើនសេដ្ឋកិច្ចជាតិ តាមរយៈការអភិវឌ្ឍផ្នែកសង្គម-សេដ្ឋកិច្ច ការបង្កើតឱកាសការងារថ្មី និងការជះឥទ្ធិពលវិជ្ជមានដល់ផលិតផលក្នុងស្រុករបស់ប្រទេសកម្ពុជា។
ក្នុងឱកាសសិក្ខាសិលានេះ ឯកឧត្តមបណ្ឌិត កៅ ថាច ក៏បានរំលឹកពីប្រវត្តិសាស្រ្តកម្ពុជាសម័យចក្រភពអង្គរ និងក្រោយសម័យអង្គរ ដែលបន្តមានការប្រែប្រួលរហូតដល់បច្ចុប្បន្ននេះ ជុំវិញដំណើរវិវត្តលើវិ័យកសិកម្ម និងម៉ូឌែលអាជីវកម្មរបស់ខ្មែរសម័យទំនើប និងអនាគតកម្ពុជា ដែលនឹងវិវត្តទៅជាសេដ្ឋកិច្ចមូលធនចំណេះដឹង និងសេដ្ឋកិច្ចបៃតងផងដែរ។
បន្ថែមពីនេះ ឯកឧត្តមបណ្ឌិតប្រតិភូក៏បានផ្តល់ជាអនុសាសន៍មួយចំនួនសម្រាប់សហគ្រិនថា «ម៉ូឌែលអាជីវកម្មនាពេលបច្ចុប្បន្ននេះ កំពុងផ្លាស់ប្តូរយ៉ាងលឿន បើធៀបនឹងពេលមុនៗ។ ម៉ូឌែលអាជីវកម្មបែបប្រពៃណី (Traditional Model) ដែលសំដៅដល់ការទិញ-លក់ និងផលិត កំពុងវិវត្តយ៉ាងលឿនទៅរកម៉ូឌែលអាជីវកម្ម ដែលមានថាមវន្ត (Dynamic) ឌីជីថល (Digital) និងចីរភាព (Sustainable) ជាងមុន។ ជាក់ស្តែង ម៉ូឌែលថ្នាលអាជីវកម្ម (Platform Model) បានតភ្ជាប់ទំនាក់ទំនងពីមនុស្សម្នាក់ទៅមនុស្សម្នាក់ មិនត្រឹមតែផលិតផលប៉ុណ្ណោះទេ។
សេដ្ឋកិច្ចបៃតង និងសេដ្ឋកិច្ចចក្រា បានប្រែក្លាយកាកសំណល់ទៅជារបស់មានតម្លៃ។ អាជីវកម្មប្រើប្រាស់ឌីជីថល និងបញ្ញាសិប្បនិម្មិត (Artificial Intellegence) បានផ្តល់អំណាចប្រកួតប្រជែងបន្ថែមដល់សហគ្រាសខ្នាតតូច និងមធ្យម។ សហគ្រាសសង្គម (Social Enterprise) បានកំណត់នូវទិសដៅនៃការរួមបញ្ចូលគ្នានៃផលចំណេញហិរញ្ញវត្ថុ និងផលចំណេញសង្គម»។
សហគ្រិនទាំងអស់គ្នា អាចនឹងមានពេលខ្លះធ្លាប់ប្រឈមមុខនឹងការបរាជ័យ ដែលធ្វើឱ្យបាត់បង់ធនធានហិរញ្ញវត្ថុ និងបាត់ទំនុកចិត្តលើខ្លួនឯង។ ប៉ុន្តែត្រូវចងចាំថា រាល់ជោគជ័យទាំងអស់ គឺកើតចេញពីការតស៊ូ។ បរាជ័យ គឺជាផ្នែកមួយនៃភាពជោគជ័យ ហើយភាពជោគជ័យនោះហេីយ ដែលនឹងបន្សល់ជាកេរ្តិ៍មរតកសម្រាប់អ្នកជំនាន់ក្រោយ៕
