ដោយ ឡុង សារេត
ភ្នំពេញ៖ នៅទីស្នាក់ការកណ្តាលនៃធនាគារអភិវឌ្ឍន៍ជនបទ និងកសិកម្ម កាលពីព្រឹកថ្ងៃទី២៥ ខែវិច្ឆិកាឆ្នាំ២០២៥ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម (ARDB) ទទួលជួបពិភាក្សាការងារជាមួយគណៈប្រតិភូធនាគារអភិវឌ្ឍន៍កសិកម្មប្រទេសចិន (ADBC) ដែលដឹកនាំដោយលោក LIU Junbiao ប្រធានការិយាល័យនៃនាយកដ្ឋានស្តារជនបទ។
ក្នុងឱកាសនេះ ឯកឧត្តមបណ្ឌិតប្រតិភូ និងលោក LIU Junbiao បានចែករំលែកនូវបច្ចុប្បន្នភាពវិស័យហិរញ្ញវត្ថុ ដោយបានផ្តោតទៅលើកាលានុវត្តន៍ភាពនៃការផ្តល់ហិរញ្ញប្បទានក្នុងវិស័យកសិកម្ម កសិឧស្សាហកម្ម និងអាជីវកម្មបៃតង។ ជំនួបពិភាក្សាការងារនេះ ត្រូវបានធ្វើឡើងស្របពេលធនាគារ ADBC មកបំពេញទស្សនកិច្ចសិក្សាជាផ្លូវការនៅធនាគារ ARDB រយៈពេលបីថ្ងៃ ចាប់ពីថ្ងៃទី២៥ ដល់ថ្ងៃទី២៧ ខែវិច្ឆិកា ឆ្នាំ២០២៥ ដែលផ្តោតសំខាន់លើការចែករំលែកបទពិសោធន៍ លើនវានុវត្តន៍ហិរញ្ញប្បទានកសិកម្ម ហិរញ្ញប្បទានបៃតង សេវាប្រតិបត្តិការធនាគារ និងការសិក្សាស្រាវជ្រាវ។
បន្ថែមពីការចែករំលែកព័ត៌មាននេះ, ធនាគារ ARDB និងធនាគារ ADBC ក៏បានយល់ឃើញដូចគ្នាក្នុងការពង្រីកលទ្ធភាពកិច្ចសហប្រតិបត្តិការលើការផ្តល់ហិរញ្ញប្បទានរួមគ្នា និងការតភ្ជាប់សេវាទូទាត់អន្តរធនាគារ ជាពិសេសអាជីវកម្មបៃតង និងហិរញ្ញប្បទានបៃតង។
សូមជម្រាបជូនថា ដោយទទួលបានការអនុញ្ញាតពីឯកឧត្តមបណ្ឌិត កៅ ថាច ប្រតិភូរាជរដ្ឋាភិបាលទទួលបន្ទុកជាអគ្គនាយកធនាគារអភិវឌ្ឍន៍ជនបទ និងកសិកម្ម ឯកឧត្តម បាន លឹម អគ្គនាយករងធនាគារ ARDB បានដឹកនាំសហការីបានរៀបចំធ្វើបទបង្ហាញចែករំលែកបទពិសោធន៍ ក៏ដូចជាចំណេះដឹងដល់គណៈប្រតិភូធនាគារអភិវឌ្ឍន៍កសិកម្មប្រទេសចិន (ADBC)ផងដែរ។
ក្នុងឱកាសនេះដែរ ឯកឧត្តមអគ្គនាយករងបានលើកឡើងថា ការធ្វើបទបង្ហាញក្នុងពេលនេះមានគោលបំណង៖ ១)ចង់ឱ្យគណៈប្រតិភូបានស្វែងយល់អំពីប្រតិបត្តិការរបស់ធនាគារអភិវឌ្ឍន៍ជនបទ និងកសិកម្ម នៅកម្ពុជា, ២)ចង់ឱ្យគណៈប្រតិភូបានស្វែងយល់អំពីទំហំនៃប្រតិបត្តិការរបស់ធនាគារ ARDBនៅក្នុងវិស័យកសិកម្ម។ ការចែករំលែកនេះ គ្រាន់តែជាផ្នែកមួយនៃចំណេះដឹង ដែលធនាគារ ARDBបានធ្វើកន្លងមក។
បន្ថែមលើសពីនេះ ឯកឧត្តមបានមានប្រសាសន៍លើកឡើងថា «ខ្ញុំសង្ឃឹមថា ធនាគារ ARDBនឹងមានឱកាសបែបនេះ ស្វែងយល់អំពីប្រតិបត្តិការរបស់ធនាគារ ABDCនៅទីក្រុងប៉េកាំង។ ឱកាសពេលនេះជាការចាប់ផ្តើមនៃការអនុវត្ត MOUដែលធនាគារទាំងពីរបានធ្វើនាពេលកន្លងទៅ។ ខ្ញុំសង្ឃឹមថា កិច្ចសហប្រតិបត្តិការនេះ រឹតតែមានសារសំខាន់និងរឹងមាំនាពេលខាងមុខ»៕
