សៀងហៃ៖ ក្រុមហ៊ុននាំចេញផ្លែប៊ឺររបស់តង់ហ្សានី បាននិយាយថា ក្រុមហ៊ុនរបស់ខ្លួនកំពុងតែបង្កើនការដាំដុះផ្លែប៊ឺរសរីរាង្គ និងពង្រីកផ្ទៃដីដាំដុះថែមទៀត សម្រាប់ផ្គត់ផ្គង់ខ្សែសង្វាក់នាំចេញផលិតផលកសិកម្មទៅកាន់ទីផ្សារអន្តរជាតិ ជាពិសេសទីផ្សារក្នុងប្រទេសចិន។
យោងតាមសារព័ត៌មានរបស់ចិន បានឱ្យដឹងថា ក្រុមហ៊ុនមួយ ដែលបង្កើតឡើងក្នុងឆ្នាំ២០១៨ ដោយដំបូងឡើយមានចម្ការប៊ឺរទំហំជិតពីរហិកតា ប៉ុន្តែឥឡូវក្រុមហ៊ុនបានពង្រីកដល់ផ្ទៃដីដាំដុះរហូតដល់ទំហំ១១ហិកតា និងមានគម្រោងពង្រីកបន្ថែមទៀត។ ចម្ការនេះស្ថិតនៅតំបន់ខ្ពង់រាបភាគខាងត្បូងប្រទេសតង់ហ្សានី ដែលដីមានជីជាតិល្អសម្រាប់ផលិតផ្លែប៊ឺរមានគុណភាពល្អសម្រាប់នាំចេញទីក្រៅប្រទេស។
ប្រធានក្រុមហ៊ុននាំចេញផ្លែប៊ែររូបនេះ បានមានប្រសាសន៍ថា «យើងបានចាប់ផ្តើមដាំប៊ឺរតាំងពីចម្ការមានទំហំតូច ប៉ុន្តែឥឡូវនេះយើងបានពង្រីកដល់ថ្នាក់កសិដ្ឋានមានដីទំហំ១១ហិកតា ហើយកំពុងស្វែងរកដីបន្ថែមទៀត។ គោលដៅរបស់យើង គឺនាំចេញផ្លែប៊ឺរដោយផ្ទាល់ទៅកាន់ទីផ្សារពិភពលោក ជាពិសេសប្រទេសចិន ដោយមិនពឹងផ្អែកលើឈ្មួញកណ្តាលឡើយ»។
ចម្ការប៊ឺរ ដែលគ្រោងនាំចេញផ្លែទៅកាន់ទីផ្សារអន្តរជាតិនេះ ស្ថិតនៅកម្ពស់ប្រហែល ១ ៨០០ម៉ែត្រពីលើនីវ៉ូទឹកសមុទ្រ ហើយដីមានជីជាតិល្អ និងអាកាសធាតុអំណោយផលសមស្របសម្រាប់ការផលិតផ្លែប៊ឺរ។
លោកស្រីប្រធានក្រុមហ៊ុន បានអះអាងថា «ផ្លែប៊ឺរពីតំបន់នេះ គឺជាផលិតផលសរីរាង្គ១០០ភាគរយ។ យើងមិនប្រើជីគីមី ឬថ្នាំគីមីសម្លាប់សត្វល្អិតទេ។ យើងពឹងផ្អែកលើជីធម្មជាតិធ្វើពីលាមកគោរបស់យើង ដែលផ្តល់សារធាតុចិញ្ចឹមសម្រាប់ដើមប៊ែរ»។
លោកស្រីបានបន្ថែមថា ក្រុមហ៊ុនមានគោលបំណងស្វែងយល់បន្ថែម ដើម្បីបំពេញតាមចំណង់ចំណូលចិត្តទីផ្សារប្រទេសចិន។
លោកស្រីបានមានប្រសាស៍ទៀតថា «អ្នកប្រើប្រាស់ចិនមានភាពវៃឆ្លាត និងដឹងរសជាតិផ្លែប៊ែរច្បាស់លាស់។ យើងនឹងស្តាប់អ្វីដែលពួកគេចូលចិត្ត ហើយសម្របខ្លួនយើងទៅតាមតម្រូវការ»។
ក្រុមហ៊ុននេហក៏មើលឃើញសក្តានុពលសម្រាប់ផលិតផល ដែលមានតម្លៃបន្ថែមផងដែរ ដោយសង្ឃឹមថា នឹងផ្លាស់ប្តូរជំនាញ និងទាក់ទាញការវិនិយោគពីប្រទេសចិន ចូលមកបង្កើតរោងចក្រកែច្នៃ នាពេលអនាគត សម្រាប់នាំចេញផលិតផលផ្លែប៊ឺរកែច្នៃ មានដូចជាប្រេងប៊ែរ ឬផ្លែប៊ែរបង្កកផងដែរ។
បើយោងតាមពាណិជ្ជករចិន បានឱ្យដឹងថា មានក្រុមហ៊ុនតង់ហ្សានីចំនួន១៥ នឹងមកចូលរួមពិព័រណ៍ពាណិជ្ចកម្មអន្តរជាតិ ឆ្នាំ២០២៥នេះ ដែលគ្រោងរៀបចំឡើងនៅទីក្រុងសៀងហៃ ប្រទេសចិន ដើម្បីបង្ហាញពីផលិតផលរបស់ខ្លួន មានផ្លែប៊ែរ សណ្តែកសៀង ទឹកឃ្មុំ និងតែផងដែរ។
ពាណិជ្ជករចិនរូបនេះ បាននិយាយថា «យើងមានសេចក្តីសោមនស្សរីករាយ ដែលបានឃើញផ្លែប៊ឺរតង់ហ្សានីនឹងបង្ហាញខ្លួនជាលើកដំបូងនៅក្នុងពិព័រណ៍ឆ្នាំនេះ ដែលធ្វើមានការចាប់អារម្មណ៍ពីអ្នកប្រើប្រាស់ចិន»៕
