ដោយ ឡុង សារេត
តាកែវ៖ ក្រោយពីអាក់ខានអស់រយៈពេលជាច្រើនឆ្នាំ, មន្ទីរពាណិជ្ជកម្មខេត្តតាកែវ បានបើកឱ្យសាកល្បងផ្សារចុងសប្តាហ៍ឡើងវិញជាថ្មីចំនួន១០ស្តង់ កាលពីថ្ងៃទី៤ ខែតុលា ឆ្នាំ២០២៥ នៅទល់មុខសាលមហាស្រពខេត្តតាកែវ ដើម្បីផ្តល់ឱ្យកាសដល់ផលិតករខ្នាតតូចនៅក្នុងស្រុកបានដាក់តាំងលក់ផលិតផលរបស់ខ្លួនឆាប់ទទួលបានការគាំទ្រពីអ្នកប្រើប្រាស់នៅក្នុងាស្រុក។
លោក សុខគឹម យូហេង ប្រធានការិយាល័យអភិវឌ្ឍន៍អាជីវកម្មនៃមន្ទីរពាណិជ្ជកម្មខេត្តតាកែវ និងជាមន្ត្រីបង្គោលសម្រាប់អនុវត្តគម្រោងជំរុញទីផ្សារសម្រាប់កសិករខ្នាតតូចហៅថា អេមស៍ បានប្រាប់ឱ្យ ARDB TVដឹងថា ផលិតផលដែលយកមកដាក់តាំងលក់នៅផ្សារចុងសប្តាហ៍ពេលនេះ គឺមានការសម្រិតសម្រាំងចេញពីគម្រោង តាមរយៈក្រុមផលិត និងចង្កោមផលិត ក្នុងនោះមានទាំងលក់ទិញ អ្នកផ្គត់ផ្គង់ធាតុចូល និងអ្នកផ្តល់សេវាកម្មផ្សេងៗ។
លោកបន្តថា “ក្រុមអ្នកផលិតក៏ដូចជាចង្កោមអ្នកផលិត ដែលយើងប្រមូលផលិតផលពួកគាត់មកដាក់តាំងលក់នៅចុងសប្តាហ៍ជាថ្មីវិញនេះ គឺយើងបានដឹងអំពីសាវតាពិតប្រាកដ។ មានន័យថា ដឹងទាំងគ្រាប់ពូជយកទៅដាំ ការផ្គត់ផ្គង់បច្ចេកទេស ការប្រើប្រាស់ជី និងការរៀបចំវេចខ្ចប់ផ្សេងៗ គឺស្ថិតនៅក្នុងរង្វង់នៃគម្រោងផលិតទាំងអស់។ ដូច្នេះផលិតផល ដែលបានយកមកដាក់លក់នៅផ្សារចុងសប្តាហ៍នេះ គឺមានសុវត្ថិភាព១០០ភាគរយ”។
បើតាមមន្ត្រីបង្គោលសម្រាប់អនុវត្តគម្រោងជំរុញទីផ្សារសម្រាប់កសិករខ្នាតតូចថា ផ្សារចុងសប្តាហ៍ខេត្តតាកែវពីមុន មានការដាក់តាំងបង្ហាញផលិតផលរបស់កសិករខ្នាតតូចនៅជិតផ្សារណាត់ តែសម្រាប់គម្រោងសាកល្បងឡើងវិញថ្មីនេះ ទទួលបានការអនុញ្ញាតពីអភិបាលខេត្ត ឱ្យដាក់នៅទីតាំងសាធារណៈនៅទល់មុខសាលមហោស្រពខេត្តតាកែវ។ ផ្អែកលើទីតាំង ដែលភ្ញៀវទេសចរណ៍តែងមកកម្សាន្តនេះ គម្រោងមានការរំពឹងទុកថា អាចទាក់ទាញប្រជាពលរដ្ឋ ដែលនិយមគាំទ្រ និងប្រើប្រាស់ផលិតផលខ្មែរក្នុងខេត្តបានកាន់តែច្រើននៅគ្រាបន្ទាប់។
លោក សុខគឹម យូហេង មានសុទិដ្ឋិនិយមថា “ការបើកសាកល្បងផ្សារចុងសប្តាហ៍ខេត្តតាកែវឡើងវិញក្នុងរយៈពេល៣ខែចុងក្រោយនៃឆ្នាំ២០២៥នេះ គម្រោងរំពឹងទុកគឺនឹងទទួលបានជោគជ័យ១០០ភាគរយ ដោយសារតែផលិតផល ដែលយើងយកមកដាក់តាំងនេះ គឺជាផលិតផលរបស់ខេត្តតាកែវ ផលិតដោយប្រជាពលរដ្ឋក្នុងខេត្តតាកែវ ដែលគិតដល់សុខភាព សុវត្ថិភាពរបស់អ្នកប្រើប្រាស់”។
អ្នកស្រី សេម សុវណ្ណនី ប្រធានសហគមន៍កសិកម្មពន្លឺសរីរាង្គនៅឃុំពេជ្រសារ ស្រុកកោះអណ្តែតខេត្តតាកែវ ដែលបានយកអង្ករសែនក្រអូបរួមនឹងជីទឹក ជីគ្រាប់ ដែលផលិតឡើងដោយវត្ថុធាតុដើមក្នុងស្រុកផ្ទាល់ មានការជឿជាក់ថា ផ្សារចុងសប្តាហ៍ថ្មីនេះនឹងចូលរួមផ្តល់អត្ថប្រយោជន៍ដល់សហគមន៍ តាមរយៈអ្នកប្រើប្រាស់ក្នុងស្រុកបានស្គាល់តែច្បាស់អំពីផលិតផល។
អ្នកស្រីបាននិយាយថា “នៅថ្ងៃអនាគតខ្ញុំរំពឹងថា ប្រជាពលរដ្ឋក្នុងស្រុកនឹងទទួលស្គាល់ ក៏ដូចជួយគាំទ្រផលិតផលក្នុងស្រុកទាំងអស់គ្នា។ បើយើងអត់បើកផ្សារចុងសប្តាហ៍ គឺកសិករមិនបានស្គាល់ផលិតផលក្នុងស្រុកនោះទេ។ ទោះបីការសាកល្បងបើកនៅពេលដំបូងៗមានអ្នកមកគាំទ្រតិចតួចក៏គឺយើងមានឱកាសមួយឱ្យអ្នកប្រើប្រាស់ និងកសិករបានយល់ដឹងច្បាស់លាស់ពីផលិតផលរបស់សហគមន៍ ដែលផលិតដោយកសិករក្នុងស្រុកផ្ទាល់”។
ទាក់ទងនិងបើកឡើងវិញនូវផ្សារចុងសប្តាហ៍ខេត្តតាកែវនេះ សូមទស្សនាការលើកឡើងរបស់លោក សុខគឹម យូហេង ប្រធានការិយាល័យអភិវឌ្ឍន៍អាជីវកម្មនៃមន្ទីរពាណិជ្ជកម្មខេត្តតាកែវ និងជាមន្ត្រីបង្គោលសម្រាប់អនុវត្តគម្រោងជំរុញទីផ្សារសម្រាប់កសិករខ្នាតតូច (អេមស៍)៕
