ស៊ីដនី៖ វិស័យសាកវប្បកម្មរបស់ប្រទេសអូស្ត្រាលីត្រូវបានព្យាករណ៍ថា នឹងរក្សាបាននូវកំណើនប្រកបដោយស្ថិរភាព ដោយសារមានតម្រូវការក្នុងស្រុក និងការនាំចេញទៅកាន់ទីផ្សារអាស៊ី។
ការិយាល័យសេដ្ឋកិច្ច និងវិទ្យាសាស្ត្រកសិកម្ម និងធនធានអូស្ត្រាលី ប៉ាន់ប្រមាណតម្លៃសរុបនៃផលិតកម្មសាកវប្បកម្ម បានចំណូល១១,៩ពាន់លានដុល្លារ រវាងចុងឆ្នាំ២០២៤ និងដើមឆ្នាំ២០២៥ នឹងកើនឡើងដល់១២,៤ពាន់លានដុល្លារ រវាងចុងឆ្នាំ២០២៥ និងដើមឆ្នាំ២០២៦។
ចំណូលមានមកពីផ្លែឈើ និងគ្រាប់ដំណាប់មានបរិមាណប្រហែល៤០ភាគរយ បន្លែ ស្រស់មាន៣៣ភាគរយ បណ្តុះកូនឈើ និងបណ្តុះដើមផ្កាមានចំនួន១៩ភាគរយ រួមជាមួយនឹងប្រភេទរុក្ខជាតិក្នុងតូចៗជាច្រើនទៀត។
ចំណែកបរិមាណផលិតកម្មវិញ ទទួលបានអំណោយផលលក្ខខណ្ឌលូតលាស់ ទោះបីជារាតត្បាតពីសត្វចង្រៃនៅតំបន់ភាគខាងត្បូង និងមានកម្ដៅខ្លាំងនៅក្នុងរដ្ឋឃ្វីនឡែន ដែលបង្កផលប៉ះពាល់ដល់ទិន្នផលខ្លះក៏ដោយ។ រីឯទិន្នផលផ្លែទំពាំងបាយជូ ក្រូចឆ្មារ និងផ្លែអាល់ម៉ុន អាចផ្គត់ផ្គង់ការនាំចេញបានគ្រប់គ្រាន់។ ផ្លែស្វាយនៅភាគខាងជើងរដ្ឋឃ្វីនឡែន និងផ្លែគូលែន ការ៉ុត ខ្ទឹមបារាំង និងក្រូចឆ្មាររបស់ប្រទេសអូស្ត្រាលីនៅភាគខាងលិច និងផ្លែ ឈើរី និងផ្លែប៊ឺរីដាំដុះនៅក្នុងតាស្មានា គឺសម្រាប់នាំចេញទៅកាន់គោលដៅទីផ្សារអាស៊ី។
ភាពសម្បូរហូរហៀសនៃទិន្នផលដំណាំអូស្ត្រាលី បានកើនឡើងតាមរយៈគ្រោងការណ៍ កម្លាំងពលកម្មចល័តប៉ាស៊ីហ្វីកអូស្ត្រាលី (Pacific Australia Labour Mobility) ទោះបីជាតម្លៃប្រាក់ឈ្នួលនៅតែកើនឡើងក៏ដោយ។ ចំណែកតម្លៃជី និងថាមពល បានធូរស្រាលបន្តិចតាំងពីឆ្នាំ ២០២២ ប៉ុន្តែនៅតែខ្ពស់កម្រិតមុនការរាតត្បាតនៃជំងឺកូវីដ១៩។
ការនាំចេញកសិផលរបស់អូស្ត្រាលី ត្រូវបានព្យាករណ៍ថា នឹងបានចំណូលចំនួន២,៧ពាន់លានដុល្លារ ក្នុងឆ្នាំ២០២៤-២០២៥ ដោយកើនឡើងដល់២,៩ពាន់លានដុល្លារ ក្នុងឆ្នាំ ២០២៥-២០២៦។ ផ្លែឈើ គឺជាប្រភេទទំនិញនាំចេញធំជាងគេ ដែលនាំមុខដោយផ្លែទំពាំងបាយជូ ក្រូចឆ្មារ ឈើរី និងផ្លែបឺរ ដែលមានតម្លៃសរុប១,២ពាន់លានដុល្លារ គឺកើនឡើងដល់ ១,២៥ពាន់លានដុល្លារ។ គ្រាប់ដំណាប់ត្រូវបានគេព្យាករណ៍ថា មានតម្លៃ៩៧០លានដុល្លារ បន្ទាប់មកមានចំណូលចំនួន១,១ពាន់លានដុល្លារ បានមកពីគ្រាប់អាល់ម៉ុន និងគ្រាប់ម៉ាកាដាមៀ។ ចំណែកទិន្នផលបន្លែ រកចំណូលបានប្រហែល២៨២លានដុល្លារ គឺកើនឡើងដល់ចំនួន២៨៨លានដុល្លារ។
ឧស្សាហកម្មគ្រាប់អាល់ម៉ុនរបស់អូស្រ្តាលី នៅតែជាឧស្សាហកម្មធំជាងគេទីពីររបស់ពិភពលោក ដែលផលិតបានបរិមាណចំនួន១៤៥ ០០០តោន ក្នុងឆ្នាំ២០២៤-២០២៥ ដោយនាំចេញបានចំនួន១៥៨ ០០០តោន។ ទិន្នផលគ្រាប់អាល់ម៉ុន ត្រូវបានគេព្យាករណ៍ថា នឹងថយចុះមកនៅត្រឹម១៤៣ ០០០តោន ក្នុងឆ្នាំ២០២៥-២៦ មុននឹងស្ទុះងើបឡើងវិញ នៅពេលចម្ការថ្មីៗចាប់ផ្តើមឱ្យផល។ ប្រទេសចិនកាន់កាប់ជិតពាក់កណ្តាលនៃការនាំចេញគ្រាប់អាល់ម៉ុនទាំងអស់ បន្ទាប់មកគឺប្រទេសឥណ្ឌា។
ទិន្នផលផ្លែទំពាំងបាយជូ ត្រូវបានគេរំពឹងថា នឹងមានបរិមាណចំនួន២៣០ ០០០តោនក្នុងឆ្នាំ២០២៤-២០២៥ ដោយនាំចេញបានចំនួន១៣៥ ០០០តោន ភាគច្រើននាំចេញទៅកាន់ទីផ្សារប្រទេសចិន វៀតណាម និងប្រទេសឥណ្ឌូនេស៊ី។ ការនាំចេញផ្លែក្រូចត្រូវបានព្យាករណ៍ថា នឹងមានបរិមាណប្រហែល១៩០ ០០០តោនសម្រាប់ក្រូចពោធិសាត់ និង១០៥ ០០០តោនសម្រាប់ក្រូចឃ្វីច។ ផលិតកម្មផ្លែប៊ឺរត្រូវបានគេរំពឹងថា នឹងមានបរិំមាណចំនួន១២៨ ០០០តោន ក្នុងឆ្នាំ២០២៤-២០២៥ មុនពេលកើនឡើងដល់ចំនួន១៧០ ០០០តោន ក្នុងឆ្នាំ២០២៥-២០២៦។ ផ្លែប៊ឺរី រួមទាំងផ្លែប៊្លូប៊ឺរី និងផ្លែស្ត្រប៊ឺរី នៅតែមានស្ថិរភាពជាមួយនឹងកំណើននៃការនាំចេញតិចតួចទៅកាន់ប្រទេសសិង្ហបុរី ហុងកុង ថៃ និងប្រទេសម៉ាឡេស៊ី។
ប្រទេសចិន វៀតណាម ជប៉ុន កូរ៉េខាងត្បូង និងប្រទេសឥណ្ឌូណេស៊ី គឺជាទីផ្សារសំខាន់សម្រាប់ផ្លែឈើអូស្ត្រាលី ខណៈប្រទេសឥណ្ឌាកាន់តែមានសារៈសំខាន់សម្រាប់ទីផ្សារគ្រាប់ដំណាប់។ ភាពជឿជាក់នៃការដឹកជញ្ជូនបានល្អប្រសើរចាប់តាំងពីឆ្នាំ២០២២ ទោះបីជាសុវត្ថិភាពជីវសាស្ត្រ និងលទ្ធភាពទទួលបានទឹកស្រោចស្រប់នៅក្នុងតំបន់មានប្រព័ន្ធធារាសាស្រ្តនៅតែជាបញ្ហាប្រឈមនៅឡើយ៕
