ម៉ានីល៖ ក្រសួងពាណិជ្ជកម្ម និងឧស្សាហកម្មហ្វីលីពីន បានឱ្យដឹងថា រដ្ឋាភិបាលហ្វីលីពីនកំពុងតែខ្នះខ្នែងឱ្យមានការលើកលែងពន្ធពីសហរដ្ឋអាម៉េរិកសម្រាប់ការនាំចេញផ្លែដូង ទៅកាន់ទីផ្សារអាម៉េរិក។
រដ្ឋមន្ត្រីពាណិជ្ជកម្ម និងឧស្សាហកម្មហ្វីលីពីន លោកស្រី គ្រីស្ទីណា រូហ្គេ (Cristina Roque) បានប្រាប់អ្នកយកព័ត៌មានថា «យើងកំពុងស្វែងរកការលើកលែងពីពន្ធទៅវិញទៅមកសម្រាប់ផលិតផលសំខាន់ៗរបស់ហ្វីលីពីន រួមទាំងដូង និងផលិតផលធ្វើពីផ្លែដូវ»។
ការនាំចេញដូងទៅកាន់ទីផ្សារសហរដ្ឋអាម៉េរិក គឺស្ថិតក្នុងចំណោមផលិតផលរងគ្រោះដោយពន្ធគយចំនួន១៩ភាគរយរបស់លោក ដូណាល់ ត្រាំ (Donald Trump) ដែលបានចូលជាធរមានកាលពីថ្ងៃទី៧ ខែសីហា ឆ្នាំ២០២៥។
កាលពីឆ្នាំ២០២៤ ប្រេងដូង គឺជាទំនិញកសិផលដនាំចេញធំជាងគេរបស់ហ្វីលីពីនទៅកាន់ទីផ្សារអាម៉េរិក ដោយរកចំណូលបានជាង៥៥៨,៧ លានដុល្លារ។
ក្រៅពីការចរចាជាមួយសហរដ្ឋអាម៉េរិកសម្រាប់ការលើកលែងពីពន្ធនាំចេញផ្លែដូង រដ្ឋមន្ត្រីក្រសួងពាណិជ្ជកម្ម និងឧស្សាហកម្មហ្វីលីពីន បានមានប្រសាសន៍ថា ក្រសួងក៏កំពុងផ្តល់ជំនួយដល់អ្នកនាំចេញផ្លែដូង ដែលរងផលប៉ះពាល់ដោយពន្ធរបស់សហរដ្ឋអាម៉េរិក ដើម្បីជួយពួកគេស្វែងរកទីផ្សារថ្មី ឬអ្នកទិញថ្មី។
ខណៈពេលសហរដ្ឋអាម៉េរិក គឺជាទីផ្សារដ៏ធំមួយសម្រាប់ការនាំចេញផ្លែដូង ប្រធានគ្រប់គ្រងអាជ្ញាធរដូងហ្វីលីពីន បានប្រាប់អ្នកសារព័ត៌មានថា មានទីផ្សារផ្សេងទៀត ដែលអ្នកនាំចេញផ្លែដូងហ្វីលីពីនអាចផ្គត់ផ្គង់បានដូចជាអឺរ៉ុប ជប៉ុន និងប្រទេសចិន។
លោកបានបន្តថា ប្រទេសជប៉ុន និងប្រទេសចិន យើងអាចលក់ផលិតផលមួយចំនួនបានដែរ។ សម្រាប់ប្រទេសជប៉ុន និងប្រទេសចិន តម្រូវការភាគច្រើន គឺសម្រាប់ផ្លែដូងខ្ចី និងទឹកដូង។ ចំណែកនៅទីផ្សារអឺរ៉ុបវិញ តម្រូវការភាគច្រើន គឺសម្រាប់ផលិតផលប្រេងដូងសុទ្ធ និងដូងក្រអូប។
លោកស្រី គ្រីស្ទីណា រូហ្គេ រដ្ឋមន្ត្រីក្រសួងពាណិជ្ជកម្ម និងឧស្សាហកម្ម បានមានប្រសាសន៍ថា ឧស្សាហកម្មដូង គឺជាវិស័យអាទិភាពមួយសម្រាប់រដ្ឋាភិបាលហ្វីលីពីន ដោយដូងគឺជាសសរស្តម្ភនៃវិស័យកសិកម្មយូរអង្វែង។
លោកស្រីបានមានប្រសាសន៍ទៀតថា ផលិតផលដូងដូចជាប្រេងដូងសុទ្ធ ទឹកដូង ក៏ដូចជាផលិតផលសម្រាប់សុខភាពដ៏ពេញនិយមនៅទូទាំងពិភពលោកផងដែរ៕ ដោយ ញឹក សំអូន
