កូឡាឡាំពួរ៖ នៅក្នុងយុទ្ធនាការបង្ក្រាបការទន្ទ្រានយកដីរដ្ឋដោយខុសច្បាប់ អាជ្ញាធរក្នុងរដ្ឋបាហាំង (Pahang) របស់ប្រទេសម៉ាឡេស៊ី បានបំផ្លាញចោលចម្ការទុរេនខុសច្បាប់លើផ្ទៃដីជាង១០ ០០០ហិកតា នៅក្នុងតំបន់ព្រៃបម្រុងទុក របស់រដ្ឋ ហើយបានចាប់ខ្លួនជនល្មើសចំនួន១២៩នាក់។
ចាប់តាំងពីប្រតិបត្តិការចាប់ផ្តើមនៅក្នុងខែមេសា ឆ្នាំ ២០២៥ អាជ្ញាធរម៉ាឡេស៊ី បានកសាងសំណុំរឿងបានចុះនួន១២ករណីប្តឹងទៅតុលាការ ដែលក្រោយមកបានផ្តន្ទាទោសជនល្មើសដាក់ពន្ធនាគាររហូតដល់មួយឆ្នាំ និងពិន័យជាប្រាក់រហូតដល់២០០ ០០០រិងគីត ឬសើ្មនឹង៤៧ ៤០០ដុល្លារ។
អភិបាលរដ្ឋបាហាំង បានមានប្រសាសន៍ថា «ការចាប់ខ្លួនទាំងនេះ ឆ្លុះបញ្ចាំងពីជំហរយ៉ាងរឹងមាំរបស់អាជ្ញាធររដ្ឋបាហាំង ដើម្បីបង្ក្រាបអ្នករំលោភយកដីរបស់រដ្ឋជាកម្មសិទ្ធិឯកជន»។
ប្រតិបត្តិការបង្ក្រាបចុងក្រោយបង្អស់ ដែលបានចាប់ផ្តើមនៅថ្ងៃទី២១ ខែកក្កដា ឆ្នាំ២០២៥ បានចាប់ខ្លួនជនល្មើស៤៥នាក់ និងការបិទផ្លូវចូលទៅកាន់ចម្ការខុសច្បាប់នៅក្នុងតំបន់ព្រៃបម្រុង។ ក្នុងប្រតិបត្តិការនេះ អាជ្ញាធរមូលដ្ឋានក៏បានឈូសឆាយចោលដើមទុរេនខុសច្បាប់ប្រមាណ១០៥ហិកតា ដែលគេលួចដាំនៅក្នុងតំបន់ការពារនេះផងដែរ។
នៅជុំវិញតំបន់ព្រៃបម្រុងទុកនេះ ប្រជាជនម៉ាឡេស៊ី ឱ្យឈ្មោះថា ជារាជធានីធុរេនរបស់ប្រទេសម៉ាឡេស៊ី ជាពិសេសពូជស្តេចទុរេន មូសាងឃីង ដែលមានដើមទុរេនសរុបប្រហែល១៥០ ០០០ដើម ដាំដុះនៅលើផ្ទៃដីរបស់រដ្ឋចំនួន២ ០០០ហិកតា។
ការដាំដុះដើមទុរេនខុសច្បាប់នៅលើដីរបស់រដ្ឋបានកើតមានជាយូរមកហើយនៅក្នុងតំបន់។ កាលពីខែមេសា ឆ្នាំ២០២៥ ដើមទយរេនជាង១ ០០០ដើម ត្រូវបានបំផ្លាញចោលក្នុងដំណាក់កាលប្រតិបត្តិការដំបូង ដែលបង្កឱ្យមានប្រតិកម្មយ៉ាងខ្លាមងពីអ្នកដាំដោយខុសច្បាប់ និងមានប្រតិកម្មពីសមាជិកសភាម៉ាឡេស៊ីថែមទៀតផង។
កាលពីខែឧសភា អាជ្ញាធរមូលដ្ឋានបានលាតត្រដាងថា ផ្ទៃដីរដ្ឋ១០ ៥២១ហិកតា ត្រូវបានកាន់កាប់ដោយខុសច្បាប់។ សរុបមក ដីរដ្ឋប្រមាណ ១៤ ៥០០ហិកតា នៅទូទាំងរដ្ឋបាហាំង ត្រូវបានទន្ទ្រានយកសម្រាប់ដំណាំផ្សេងៗ រួមទាំង ដូងប្រេង កៅស៊ូ និងទុរេន។ ក្នុងនោះផ្ទៃដីជិត៦ ០០០ហិកតា ស្ថិតនៅក្នុងតំបន់ព្រៃបម្រុងទុកអចិន្ត្រៃយ៍។
លោកអភិបាលរដ្ឋ បានបញ្ជាក់ជាថ្មីថា ការធ្វើកសិកម្មដោយគ្មានការអនុញ្ញាតនៅលើដីរដ្ឋ ឬព្រៃបម្រុងទុករបស់រដ្ឋ គឺជាបទល្មើសព្រហ្មទណ្ឌ។
លោកបានមានប្រសាសន៍ដូច្នេះថា «អាជ្ញាធររដ្ឋបាហាំងនឹងមិនអត់ឱនចំពោះការទន្ទ្រានយកដីដោយខុសច្បាប់ ឬចម្ការទុរេនខុសច្បាប់ឡើយ។ គ្មានអ្នកណាម្នាក់នៅពីលើច្បាប់បាននោះទេ ហើយវិធានការយ៉ាងម៉ឺងម៉ាត់នឹងបន្តអនុវត្តរហូតដល់សកម្មភាពខុសច្បាប់ទាំងនេះត្រូវបានលុបបំបាត់ទាំងស្រុង»។
ផ្លែទុរេនបានក្លាយទៅជាផលិតផលនាំចេញដ៏សំខាន់សម្រាប់ម៉ាឡេស៊ី ដោយការនាំចេញបានកើនឡើងជាង២៥០ភាគរយ ក្នុងទំហំទឹកប្រាក់ចំនួន៧៦លានដុល្លារ នៅក្នុងឆ្នាំ២០១៨ កើនដល់២៧០លានដុល្លារ នៅឆ្នាំ២០២២។ ការនាំចេញត្រូវបានព្យាករណ៍ថា នឹងកើនទឹកប្រាក់ដល់ទំហំ៣៥៥លានដុល្លារ ក្នុងឆ្នាំ២០២៥៕
