ញូវសោធវែល៖ ក្រុមហ៊ុននាំចេញទំពាំងបាយជូរធំជាងគេមួយរបស់ប្រទេសអូស្ត្រាលី ត្រូវទទួលរងការផាកពិន័យអស់ប្រាក់ជាង៧០៣ ០០០ដុល្លារ បន្ទាប់ពីរកឃើញថា មានពិរុទ្ធភាពពីបទរំលោភលើលក្ខខណ្ឌជីវសុវត្ថិភាពក្នុងការនាំចេញផ្លែឈើទៅកាន់ប្រទេសនូវែលសេឡង់។
យោងតាមការចេញផ្សាយរបស់សារព័ត៌មាននៅក្នុងប្រទេសអូស្ត្រាលី បានឱ្យដឹងនៅថ្ងៃទី១៤ ខែសីហានេះថា តុលាការរដ្ឋញូវសោធវែល (New South Wales) របស់អូស្ត្រាលី បានបើកសវនាការជំនុំជម្រះករណីក្រសួងកសិកម្មអូស្ត្រាលី បានកំណត់ថា ក្រុមហ៊ុននាំចេញបានបំភាន់ភ្នែកមន្ត្រីរដ្ឋាភិបាលដោយចេតនា ខណៈពេលការនាំចេញផ្លែទំពាំងបាយជូរចំនួន១៤៥តោនទៅកាន់ប្រទេសនូវែលសេឡង់ ក្នុងអំឡុងរដូវនាំចេញ រវាងឆ្នាំ២០២៧ និងឆ្នាំ២០១៨។
តុលាការបានរកឃើញថា ក្រុមហ៊ុននាំចេញផ្លែទំពាំងបាយជូរ ឈ្មោះ ឌឹគ្រេបហៅ (The Grape House) បានប្រកាសភូតកុហក់ថា ទំពាំងបាយជូរមានប្រភពមកពីប្រទេសអូស្ត្រាលីភាគខាងត្បូង ហើយដាំដុះនៅក្នុងតំបន់ «មិនមានសត្វរុយទិចផ្លែ»។ ប៉ុន្តែទោះបីជាយ៉ាងណាក៏ដោយ ការស៊ើបអង្កេតបានរកឃើញថា ផ្លែទំពាំងបាយជូរទាំងនោះមានប្រភពមកពី «តំបន់មានសត្វរុយទិចផ្លែ»។ ទង្វើបែបនេះធ្វើឡើង ដើម្បីគេចពីច្បាប់តម្រូវឱ្យរក្សាទុកផ្លែទំពាំងបាយជូរក្នុងឃ្លាំងត្រជាក់រយៈពេល១៦ថ្ងៃ ជាចាំបាច់សម្រាប់ផលិតផលចេញពីតំបន់បែបនេះ។
ប្រទេសនូវែលហ្សេឡង់ គឺជាប្រទេស «មិនមានរុយផ្លែឈើ» ដែលត្រូវបានគេចាត់ទុកថាជាសត្វល្អិតបំផ្លាញផលដំណាំ ជាពិសេសសត្វល្អិតចង្រៃនេះភាគច្រើនបំផ្លាញដំណាំសម្រាប់ធ្វើពាណិជ្ជកម្ម។
លោកចៅក្រមតុលាការបាននិយាយថា សកម្មភាពបំពានច្បាប់របស់ក្រុមហ៊ុនមានគោលបំណងប្រឹងរកប្រាក់ចំណូលឱ្យបានច្រើន ដែលលោកបានពិពណ៌នាការប្រព្រឹត្តនេះថាជាការរៀបចំដោយចេតនា និងនិរន្តរភាពនៃប្រព័ន្ធនាំចេញ ដើម្បីស្វែងរកប្រាក់ចំណេញផ្ទាល់ខ្លួន។ សកម្មភាពបែបនេះត្រូវបានគេគិតទុកជាមុន ដោយកើតឡើងក្នុងរយៈពេលបន្ថែមម៉ោង និងមានជាប់ពាក់ព័ន្ធនឹងការរៀបចំផែនការ។
សវនាការបានរកឃើញថា នាយករបស់ក្រុមហ៊ុននាំចេញផ្លែទំពាំងបាយជូរ បានចុះហត្ថលេខាលើឯកសារផ្ទេរប្រាក់ ដោយចេតនាក្លែងបន្លំ ទាក់ទងនឹងប្រភពដើមនៃផ្លែទំពាំងបាយជូរ ហើយលោកចៅក្រមបានកត់សម្គាល់ថា គ្មានហេតុផលណាមួយបញ្ជាក់ពីថ្នាក់ដឹកនាំរបស់ក្រុមហ៊ុន ពិតជាមិនដឹងពីសកម្មភាពខុសច្បាប់នេះឡើយ។
លោកចៅក្រមបាននិយាយថា «ក្រុមឌឹគ្រេបហៅ គឺជាអ្នកចូលរួមដ៏សំខាន់នៅក្នុងឧស្សាហកម្មនាំចេញផ្លែទំពាំងបាយជូររបស់អូស្ត្រាលី។ ក្នុងនាមជានាយកតែមួយគត់របស់ក្រុមហ៊ុន និមានបទពិសោធន៍ច្រើនក្នុងឧស្សាហកម្មនេះ ក្នុងអំឡុងពេលមានការរំលោភបំពាន ច្បាប់ហើយ ហេតុអ្វីថ្នាក់ដឹកនាំក្រុមហ៊ុនមិនណែនាំឱ្យឈប់ប្រព្រឹត្តអំពើខុសច្បាប់ជាបន្តទៀត»។
ក្រុមហ៊ុននាំចេញផ្លែទំពាំងបាយជូរ ឌឺគ្រេបហៅ បង្កើតឡើងតាំងពីឆ្នាំ១៩៨៩ ត្រូវរងការផាកពិន័យជាប្រាក់សរុបចំនួនមួយលានប្រាំម៉ឺនដុល្លារអូស្ត្រាលី ឬស្មើនឹង៧០៣ ០០០ដុល្លារអាមេរិក។ លោកចៅក្រមបាននិយាយថា ការបំពាននេះបានធ្វើឱ្យខូចកិត្តិយសទាំងជីវសុវត្ថិភាពរបស់ប្រទេសនូវែលសេឡង់ និងកេរ្តិ៍ឈ្មោះរបស់ប្រទេសអូស្ត្រាលី ដែលគេកត់សម្គាល់ថា នៅក្នុងប្រទេសនូវែលសេឡង់ ដែលនៅតែ «មិនមានរុយទិចផ្លែ» ត្រូវបានគេហៅថា ជាមហាសំណាង ព្រោះផ្លែទំពាំងបាយជូរនាំចូលទៅ មានប្រភពពីតំបន់មានសត្វល្អិតចម្រៃច្រើនណាស់។
លោកបាននិយាយថា «ការបំពាននេះបានធ្វើឱ្យមានគ្រោះថ្នាក់ដល់ជីវសុវត្ថិភាពរបស់ប្រទេសនូវែលសេឡង់ ក៏ដូចជាកេរ្តិ៍ឈ្មោះរបស់ប្រទេសអូស្ត្រាលី ប៉ុន្តែជាសំណាងល្អមិនបានបង្កគ្រោះថ្នាក់ដល់សេដ្ឋកិច្ចទាំងរបស់ប្រទេសនូវែលសេឡង់ និងរបស់អូស្ត្រាលី ព្រមទាំងកសិករនៅក្នុងប្រទេសទាំងពីរផងដែរ»៕
