ញូវដែលី៖ កាលពីថ្ងៃទី១៣ ខែកក្កដា ឆ្នាំ២០២៥ សមាជិកសហព័ន្ធកសិករដាំប៉ោម នៅក្នុងប្រទេសឥណ្ឌា បានប្រមូលផ្តុំគ្នាធ្វើបាតុកម្មទាមទារឱ្យរដ្ឋាភិបាលដំឡើងពន្ធរហូតដល់១០០ភាគរយលើផ្លែប៉ោម។
ប្រធានសហព័ន្ធកសិករដាំប៉ោម បានស្រែកទាមទារនៅក្នុងពេលធ្វើបាតុកម្មតវ៉ាថា «យើងសូមអំពាវនាវដល់នាយករដ្ឋមន្រ្តីឥណ្ឌា លោក ណារិន្ត្រា ម៉ូឌី (Narendra Modi) កុំឱ្យចុះចាញ់នឹងសម្ពាធរបស់អាម៉េរិក ហើយសូមដាក់ពន្ធ១០០ភាគរយលើផ្លែប៉ោមអាម៉េរិក ព្រមទាំងទំនិញនាំចូលផ្សេងទៀត ដើម្បីការពារផលប្រយោជន៍របស់កសិករដាំប៉ោមក្នុងស្រុក»។
កសិករឥណ្ឌារាប់រយនាក់បានប្រមូលផ្តុំគ្នាធ្វើបាតុកម្ម ដោយអំពាវនាវឱ្យមានគម្រោងធានារ៉ាប់រងដ៏ទូលំទូលាយមួយ ដើម្បីការពារអ្នកផលិតខ្នាតតូចឱ្យរួចផុតពីការខាតបង់ដោយសារគ្រោះធម្មជាតិ សត្វល្អិតបំផ្លាញ និងហានិភ័យផ្សេងៗទៀត។
ផ្ទុយទៅវិញ ពួកបាតុករបាននិយាយថា អ្នកដាំដុះកំពុងប្រឈមនឹងបំណុលដ៏ច្រើនដែលបណ្តាលមកពីការខាតបង់ដំណាំម្តងហើយម្តងទៀត និងដោយសារគោលនយោបាយប្រឆាំងនឹងកសិកររបស់រដ្ឋាភិបាលឥណ្ឌា។
លោកប្រធានសហព័ន្ធ បានបន្ថែមថា «វាជាការទាមទារជាយូរមកហើយរបស់យើង សុំឱ្យមានការលើកលែងលើប្រាក់កម្ចី ដែលកសិករបានយកប្រាក់ក្រោមគម្រោងកាតឥណទាន»។
សហព័ន្ធកសិករដាំប៉ោម ក៏បានជំរុញឱ្យរដ្ឋាភិបាលស្តារឡើងវិញនូវគ្រោងការណ៍អន្តរាគមន៍ទីផ្សារ ដើម្បីរក្សាស្ថិរភាពតម្លៃផ្លែប៉ោម ដោយបានរិះគន់ការដំឡើងថ្លៃអគ្គិសនីនាពេលថ្មីៗនេះ ជាជាងនិយាយថា អ្នកប្រើប្រាស់ជាជនក្រីក្រមិនអាចបង់ថ្លៃអគ្គិសនីបានទេ។
លោកបានបញ្ជាក់ថា រដ្ឋាភិបាលបានដំឡើងពន្ធជំនួសឲ្យការផ្តល់អគ្គិសនីដោយឥតគិតថ្លៃដូចដែលខ្លួនបានសន្យា។
ការតវ៉ាស្រដៀងគ្នានេះដែរ បានកើតឡើងនៅក្នុងប្រទេសឥណ្ឌា ដើម្បីគាំទ្រការទាមទាររបស់សហព័ន្ធកសិករដាំប៉ោម។ តំណាងបាតុករបានដាក់ញត្តិជូនលោកនាយករដ្ឋមន្ត្រីឥណ្ឌា ដោយបានអំពាវនាវឱ្យមានការលើកទឹកចិត្តសម្រាប់ការដាំដំណាំប៉ោមនៅក្នុងប្រទេសឥណ្ឌា ដែលមានចំនួនកាន់តែច្រើនឡើង ព្រមទាំងសុំការបង្កើនការគាំទ្រផ្នែកហិរញ្ញវត្ថុសម្រាប់គម្រោងសាកវប្បកម្ម ការធានារ៉ាប់រងដំណាំ បង្កើតឡើងវិញនូវគម្រោងអន្តរាគមន៍ទីផ្សារ បន្ថែមពន្ធនាំចូលឱ្យបានខ្ពស់លើការនាំចូលផ្លែប៉ោមពីសហរដ្ឋអាម៉េរិក៕
