វៀងច័ន្ទន៍៖ រដ្ឋាភិបាលឡាវ និងសិង្ហបុរី បានអះអាងជាថ្មីនូវការប្តេជ្ញាចិត្តរបស់ខ្លួនក្នុងការកសាងកិច្ចសហប្រតិបត្តិការទ្វេភាគី លើវិស័យសំខាន់ៗ រួមមានពាណិជ្ជកម្ម និងវិនិយោគ អភិវឌ្ឍន៍ធនធានមនុស្ស សន្តិសុខស្បៀង ថាមពលស្អាត ឥណទានកាបូន និងកម្មវិធីស្ម័គ្រចិត្ត ជាពិសេសការបញ្ជូនអ្នកស្ម័គ្រចិត្តសិង្ហបុរីទៅកាន់ប្រទេសឡាវ។
យោងតាមសារព័ត៌មាន វៀងច័ន្ទន៍ ថែមស៍របស់ឡាវ បានឱ្យដឹងថា កិច្ចព្រមព្រៀងជាថ្មីនេះ ត្រូវបានធ្វើឡើងក្នុងដំណើរបំពេញទស្សនកិច្ចផ្លូវការទៅកាន់ប្រទេសសិង្ហបុរី ពីថ្ងៃទី១១-១២ ខែសីហា ឆ្នាំ២០២៥ របស់រដ្ឋមន្ត្រីក្រសួងការបរទេសឡាវ លោក ថុងសាវ៉ាញ ភុំវីហាន (Thongsavanh Phomvihane) តបតាមការអញ្ជើញរបស់រដ្ឋមន្ត្រីការបរទេសសិង្ហបុរី គឺលោក វីវាន បាឡាគ្រឹស្នាន់ (Vivian Balakrishnan)។
រដ្ឋមន្ត្រីការបរទេសទាំងពីរបានជួបពិភាក្សាគ្នានៅឯក្រសួងការបរទេសសិង្ហបុរី ដោយបានពិនិត្យមើលវឌ្ឍនភាពនៃកិច្ចសហប្រតិបត្តិការទ្វេភាគី និងពហុភាគី នាពេលកន្លងមក ហើយពិភាក្សាអំពីទិសដៅសម្រាប់កិច្ចសហប្រតិបត្តិការនាពេលអនាគត។
រដ្ឋមន្ត្រីទាំងពីរបានសម្តែងការពេញចិត្តចំពោះការរីកចម្រើននៃទំនាក់ទំនងជាមិត្តភាព និងកិច្ចសហប្រតិបត្តិការ ក្នុងរយៈពេល៥១ឆ្នាំកន្លងមក ដោយបានគូសបញ្ជាក់ពីដំណើរទស្សនកិច្ចកម្រិតខ្ពស់ជាទៀងទាត់ និងការបង្កើនទំនាក់ទំនងរវាងប្រជាជន និងប្រជាជន ដែលជាការរួមចំណែកដ៏សំខាន់ដល់ទំនាក់ទំនងទ្វេភាគីដ៏រឹងមាំ។
ប្រមុខការទូតទាំងពីរក៏បានទទួលស្គាល់ផងដែរនូវភាពជោគជ័យនៃការប្រារព្ធខួបលើកទី៥០ នៃទំនាក់ទំនងការទូតឡាវ-សិង្ហបុរី ក្នុងឆ្នាំ២០២៤ ដែលបង្ហាញពីព្រឹត្តិការណ៍ដ៏រស់រវើក និងប្រកបដោយអត្ថន័យ ដែលពង្រឹងចំណងមិត្តភាពយូរអង្វែងរវាងប្រជាជាតិទាំងពីរ។
នៅក្នុងកិច្ចពិភាក្សា ភាគីទាំងពីរបានទទួលស្គាល់ពីសារៈសំខាន់នៃការលើកកម្ពស់កិច្ចសហប្រតិបត្តិការលើវិស័យផ្សេងៗ និងប្តេជ្ញាពង្រឹងភាពជាដៃគូក្នុងក្របខ័ណ្ឌតំបន់ និងអន្តរជាតិ រួមទាំងអាស៊ានផងដែរ។
ក្នុងនាមរដ្ឋាភិបាល និងប្រជាជនឡាវ លោក ថុងសាវ៉ាញ ភុំវិហាន បានថ្លែងអំណរគុណយ៉ាងស្មោះស្ម័គ្រចំពោះរដ្ឋាភិបាល និងប្រជាជនសិង្ហបុរីសម្រាប់ការគាំទ្រដ៏យូរអង្វែង ជាពិសេសក្នុងការអភិវឌ្ឍធនធានមនុស្ស តាមរយៈកម្មវិធីបណ្តុះបណ្តាល និងពង្រឹងសមត្ថភាពជាច្រើន។
លោករដ្ឋមន្ត្រីក្រសួងការបរទេសឡាវ ក៏បានថ្លែងអំណរគុណយ៉ាងជ្រាលជ្រៅ និងជូនពរដល់ប្រជាជនសិង្ហបុរី ក្នុងឱកាសខួបលើកទី៦០ នៃទិវាបុណ្យជាតិសិង្ហបុរី និងសូមជូនពរឱ្យប្រទេសសិង្ហបុរី និងប្រជាជនសិង្ហបុរី ទទួលបាននូវសុខសន្តិភាព វិបុលភាព និងជោគជ័យបន្តទៀត។
ដំណើរទស្សនកិច្ចផ្លូវការនេះ ឆ្លុះបញ្ជាំងបន្ថែមទៀតនូវការប្តេជ្ញាចិត្តរួមគ្នារបស់ប្រទេសទាំងពីរក្នុងការធ្វើឱ្យកាន់តែស៊ីជម្រៅនូវចំណងមិត្តភាព និងពង្រីកកិច្ចសហប្រតិបត្តិការដើម្បីផលប្រយោជន៍ទៅវិញទៅមក និងស្ថិរភាពក្នុងតំបន់៕
