ខេត្តកណ្តាល៖ ឯកឧត្តមបណ្ឌិត កៅ ថាច ប្រតិភូរាជរដ្ឋាភិបាល ទទួលបន្ទុកជាអគ្គនាយក នៃធនាគារអភិវឌ្ឍន៍ជនបទ និងកសិកម្ម នៅថ្ងៃទី១៣ ខែសីហា ឆ្នាំ២០២៥នេះ បានអញ្ជើញចូលរួមកម្មវិធីសំណេះសំណាលជាមួយលោកគ្រូ អ្នកគ្រូស្ម័គ្រចិត្ត និងសិស្សានុសិស្ស ថ្នាក់ទី១២ ត្រៀមប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២៤-២០២៥ស្ថិតនៅវិទ្យាល័យ ហ៊ុន សែន ខ្សាច់កណ្តាល ស្រុកខ្សាច់កណ្តាល ខេត្តកណ្តាល នាថ្ងៃទី១៣ ខែសីហា ឆ្នាំ២០២៥នេះ។
នៅក្នុងពិធីសំណេះសំណាលនេះ ក៏មានការអញ្ជើញចូលរួមពីលោក ចេង ឌីណា អភិបាលនៃគណៈអភិបាលស្រុក ខ្សាច់កណ្តាល លោក ប៉ែន ប៊ុណ្ណា នាយកវិទ្យាល័យខ្សាច់កណ្តាល នាយករង ប្រធាន និងអនុប្រធានការិយាល័យអប់រំ យុវជន និងកីឡា លោកគ្រូ-អ្នកគ្រូ ដែលសរុបចំនួន៤៤៧នាក់។
នៅក្នុងឱកាសនេះ ឯកឧត្តមបណ្ឌិត កៅ ថាច បានមានប្រសាសន៍ពាំនាំនូវបណ្តាំសាកសួរសុខទុក្ខ និងការនឹករលឹកពីសំណាក់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ, ប្រធានក្រុមការងារថ្នាក់កណ្តាលចុះជួយខេត្តកណ្តាល និងជាប្រធានគណៈអចិន្ត្រៃយ៍ក្រុមការងារថ្នាក់កណ្តាលចុះជួយក្រុងអរិយក្សត្រ ស្រុកខ្សាច់កណ្តាល ស្រុកល្វាឯម ស្រុកកៀនស្វាយ ស្រុកមុខកំពូល និងស្រុកពញាឮ ដែលតែងយកចិត្តទុក្ខដាក់ជានិច្ច ចំពោះក្មួយៗជាសិស្សានុសិស្ស នៅក្នុងស្រុកខ្សាច់កណ្តាល។
ឯកឧត្តមបណ្ឌិតបានរំលឹកថា ឆ្នាំសិក្សាកន្លងទៅដោយមានការជំរុញលើកទឹកចិត្ត និងការឧបត្ថម្ភគាំទ្រទាំងស្មារតី និង ថវិកាពីសំណាក់ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី ឱ្យមានការបង្រៀនបំប៉នបន្ថែមម៉ោង បានធ្វើឱ្យអត្រាសិស្សប្រឡងជាប់ខ្ពស់រហូតដល់៩០,៦៨ភាគរយ ស្មើនឹង៦៣៣ នាក់ និងជាប់និទ្ទេស A សរុប១៥នាក់ ក្នុងនោះវិទ្យាល័យ ហ៊ុន សែន រ៉ូតាប្រាំពីរនាក់ និងវិទ្យាល័យ ហ៊ុន សែន ខ្សាច់កណ្តាលប្រាំបីនាក់ ហើយសម្រាប់ការប្រឡងឆ្នាំនេះ សង្ឃឹមថា ក្មួយៗនឹងប្រឡងជាប់និទ្ទេស A ច្រើនជាងឆ្នាំមុន។
ទាក់ទងនិងសភាពការណ៍កើតឡើងថ្មីៗនៅតំបន់ព្រំដែនកម្ពុជា -ថៃ វិញ ឯកឧត្តមបណ្ឌិតបានមានប្រសាសន៍ទៀតថា លោកគ្រូអ្នកគ្រូ និងក្មួយៗទាំងអស់ បានដឹងរួចហើយ អំពី សង្គ្រាមឈ្លានពានពីសំណាក់ប្រទេសថៃ មកលើបូរណភាពទឹកដីកម្ពុជារយៈពេលប្រាំថ្ងៃ ពីថ្ងៃទី២៤ ដល់ថ្ងៃទី២៨ ខែកក្កដា ឆ្នាំ២០២៥ កន្លងទៅ គីមូលហេតុដោយសារកងទ័ពថៃ បានបាញ់ប្រហារមកលើវីរកងទ័ពកម្ពុជាយើងមុន នៅប្រាសាទតាមាន់ធំ ហើយបានរាលដាលដល់ប្រាសាទតាក្របី តំបន់ប្រាសាទព្រះវិហារ និងតំបន់ដទៃទៀត ។
ស្ថិតក្នុងកាលៈទេសៈនេះ ប្រជាជនយើងគ្រប់ស្រទាប់វណ្ណៈ ទាំងក្នុង និងក្រៅប្រទេស នៅសមរភូមិក្រោយ គឺមានការសាមគ្គីភាពយ៉ាងរឹងមាំ ដោយបានចូលរួមគាំទ្រទាំងស្មារតី សម្ភារៈ និងថវិកា ជួយដល់បងប្អូនវីរកងទ័ពយើងនៅសមរភូមិមុខ និងប្រជាជនភៀសសឹកយ៉ាងផុសផុល ហើយយើងទាំងអស់គ្នា ត្រូវបន្តនូវស្មារតីសាមគ្គីភាពដូចនេះជាដរាប និងត្រូវជឿជាក់លើរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃរបស់សម្តេចធិបតី ហ៊ុន ម៉ាណែត និងសម្តេចតេជោ ហ៊ុន សែន ប្រធានព្រឹទ្ធសភា។
លើសពីនេះ ឯកឧត្តមបណ្ឌិតប្រតិភូ បានមានប្រសាសន៍ថា រាជរដ្ឋាភិបាលបានដាក់ចេញនូវយុទ្ធសាស្ត្របញ្ចកោណដំណាក់កាលទី១ ដែលក្នុងនោះ បានកំណត់នូវអាទិភាពគន្លឹះ ៥ គឺ÷“(១)មនុស្ស (២)ផ្លូវ (៣)ទឹក (៤)ភ្លើង និង (៥)បច្ចេកវិទ្យា” ក្នុងការអភិវឌ្ឍសេដ្ឋកិច្ចសង្គម និងប្តេជ្ញាអនុវត្តន៍ចក្ខុវិស័យរបស់សម្តេចតេជោ ហ៊ុន សែន ក្នុងការប្រែក្លាយប្រទេសកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពពស់ នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០។
បន្ទាប់ពីសំណេះសំណាលជាមួយនិងសិស្សានុសិស្សរួចមក ឯកឧត្តមបណ្ឌិតប្រតិភូ បានផ្តាំផ្ញើដល់ប្អូនៗ ដែលត្រៀមប្រឡងសញ្ញាបត្រមធ្យមសិក្សាទុតិយភូមិ ឆ្នាំសិក្សា ២០២៤-២០២៥ ពេលខាងមុខឲ្យបាននិទ្ទេសល្អគ្រប់ៗគ្នា ហើយត្រូវដាក់គោលដៅឲ្យបានច្បាស់លាស់ដូចជាសិក្សាផ្នែកវិទ្យាសាស្ត្រពិតឲ្យបានច្រើន ដើម្បីក្លាយជាមូលធនមនុស្ស ចូលរួមចំណែកក្នុងការកសាងជាតិជាមួយ និងរាជរដ្ឋាភិបាលទៅថ្ងៃអនាគតផងដែរ៕ ដោយ ហៃស៊ីណា
