តែលអាវី៖ ការនាំចេញទំនិញរបស់អ៊ីស្រាអែល ទៅកាន់សហរដ្ឋបានប្រឈមនឹងអត្រាពន្ធ១៥ភាគរយ ខណៈពេលវិធានការថ្មី ប្រកាសដោយប្រធានាធិបតីអាម៉េរិក លោក ដូណាល់ ត្រាំ (Donald Trump) បានចូលជាធរមាន កាលពីថ្ងៃទី៧ ខែសីហា ឆ្នាំ២០២៥។
មន្ត្រីអ៊ីស្រាអែលបានព្រមានថា ការផ្លាស់ប្តូរនេះអាចនាំឱ្យមានការកាត់បន្ថយបរិមាណនាំចេញ ការបាត់បង់ការងារ និងប្រាក់ចំណូលពន្ធអាជីវកម្មផងដែរ។
ប្រទេសអ៊ីស្រាអែលបានស្វែងរកការធានានូវអត្រាទាបជាង១០ភាគរយ ដែលធ្លាក់ចុះពី១៧ភាគរយ ដែលបានស្នើឡើងដំបូង ដើម្បីរក្សាការប្រកួតប្រជែងលើប្រទេស ប្រឈមនឹងពន្ធខ្ពស់ បន្ទាប់ពីការចរចាសម្រាប់ការពិចារណាពិសេសមិនបានជោគជ័យទេ។
ប្រធានសមាគមអ្នកផលិតអ៊ីស្រាអែល បាននិយាយថា «យើងអាចស្ថិតក្នុងស្ថានភាពដូចគ្នានឹងប្រទេសជាច្រើនផ្សេងទៀតដែរ ប៉ុន្តែយើងបាត់បង់អត្ថប្រយោជន៍ ដែលយើងទទួលបានជាមួយនឹងកិច្ចព្រមព្រៀងពាណិជ្ជកម្មសេរី ហើយត្រូវការការប្រកួតប្រជែងជាមួយប្រទេសដូចជាទួរគី ដែលពីមុនបានបង់ពន្ធ និងមានតម្លៃផលិតកម្មទាបជាងប្រទេសអ៊ីស្រាអែល។ បើគ្មានអត្ថប្រយោជន៍ប្រៀបធៀបទេ យើងនឹងបាត់បង់ការលក់»។
ពន្ធគយត្រូវបានព្យាករណ៍ថា នឹងកាត់បន្ថយការនាំចេញរបស់អ៊ីស្រាអែលពី២ ០០០លានដុល្លារទៅ៤ ០០០ពាន់លានដុល្លារក្នុងមួយឆ្នាំ។ ប្រសិនបើផលិតផលសម្រាប់ផ្សំឱសថ និងផលិតផលអង្គធាតុចម្លង ត្រូវរាប់បញ្ចូលផងដែរ នោះនឹងបាត់បង់ឪកាសការងារប្រហែលពី ២០ ០០០ ទៅ៣៣ ០០០កន្លែង។
លោកប្រធានសមាគមបាននិយាយថា ក្រោមកិច្ចព្រមព្រៀងពាណិជ្ជកម្មសេរីជាមួយសហរដ្ឋអាម៉េរិក ប្រទេសអ៊ីស្រាអែ បានកំណត់អត្រាពន្ធសូន្ស ប៉ុន្តែឥឡូវនេះ បានបាត់បង់អត្ថប្រយោជន៍របស់ខ្លួន ជាមួយប្រទេសតួកគី ជប៉ុន អង់គ្លេស និងប្រទេសផ្សេងទៀត។
វិធានការពន្ធទូទៅរបស់លោក ដូណាល់ ត្រាំ ប្រកាសកាលពីខែមេសា បានកំណត់អត្រាពី១០ ទៅ៤០ភាគរយសម្រាប់ទំនិញនាំចូលពីបណ្តាប្រទេសមួយចំនួន។ សហរដ្ឋអាម៉េរិកបានដំឡើងពន្ធលើប្រទេសកាណាដាដល់៣៥ភាគរយ យល់ព្រមលើការយកពន្ធ១០ភាគរយសម្រាប់ចក្រភពអង់គ្លេស និងកិច្ចព្រមព្រៀងពាណិជ្ជកម្មជាមួយកូរ៉េខាងត្បូង និងសហភាពអឺរ៉ុប។ ចំណែក អត្រាពន្ធ១៥ភាគរយ សម្រាប់ប្រទេសអ៊ីស្រាអែល ប្រទេសជប៉ុន តួកគី អ៊ីស្លង់ ន័រវែស ហ្វីជី ហ្គាណា ហ្គីយ៉ាណា និងប្រទេសអេក្វាឌ័រ។
នៅឆ្នាំ២០២៤ ពាណិជ្ជកម្មសរុបលើទំនិញរវាងអ៊ីស្រាអែល និងអាម៉េរិកមានតម្លៃប្រហែល៣៧ពាន់លានដុល្លារ ដោយអ៊ីស្រាអែល នាំចេញមានទឹកប្រាក់ចំនួន២២,២ពាន់លានដុល្លារ និងនាំចូលមានទឹកប្រាក់ចំនួន១៤,៨ពាន់លានដុល្លារ។
ការនាំចេញផលិតផលផ្នែកយោធា មានទឹកប្រាក់ប្រហែល៧,៥ ភាគរយនៃការនាំចេញសរុបរបស់អ៊ីស្រាអែល ហើយត្រូវបានរងផលប៉ះពាល់ ខណៈពេលការនាំចេញបច្ចេកវិទ្យាភាគច្រើនមិនមានឡើយ ដោយសារពន្ធមិនអនុវត្តចំពោះសេវាកម្ម។ ចំណែកផលប៉ះពាល់លើ៣០ភាគរយនៃការនាំចេញបច្ចេកវិទ្យា ដែលជាទំនិញរូបវន្តនៅតែស្ថិតក្រោមការត្រួតពិនិត្យដដែល។
លោកបាននិយាយថា «ប្រសិនបើការចរចាជាមួយសហរដ្ឋអាម៉េរិកមិនផ្តល់ឱ្យអ្នកនាំចេញរបស់អ៊ីស្រាអែល ទទួលបានលើកលែងពន្ធនាំចូលលើទំនិញទាំងនេះទៅសហរដ្ឋអាម៉េរិកទេ នោះយើងនឹងបាត់បង់សកម្មភាពអាជីវកម្មរបស់យើងកាន់តែច្រើន រួមទាំងការខាតបង់ប្រចាំឆ្នាំ ដែលប៉ាន់ស្មានយ៉ាងហោចណាស់ចំនួន៤ ០០០ពាន់លានដុល្លារ»៕ ដោយ ញឹក សំអូន
