ហាណូយ៖ ទោះបីជាប្រទេសចិនបានពន្យាពេលជាបណ្តោះអាសន្ននូវការដំឡើងពន្ធបន្ថែម ចាប់ពីថ្ងៃទី១៤ ខែឧសភា ដល់ដើមខែសីហា ក៏ដោយ ភាពមិនប្រាកដប្រជាជុំវិញទំនាក់ទំនងទ្វេភាគីរវាងប្រទេសទាំងពីរ នៅតែបន្តធ្វើឱ្យឧស្សាហកម្មផ្លែឈើរីរបស់អាម៉េរិក មិនទាន់មានភាពប្រាកដប្រជានៅឡើយ។
ប្រទេសចិនធ្លាប់ជាគោលដៅសំខាន់សម្រាប់ផ្លែឈែរីរបស់អាម៉េរិក ជាពិសេសក្នុងអំឡុងពេលមានការកើនឡើងពីឆ្នាំ២០១៥ ដល់ឆ្នាំ២០១៨។ ទោះជាយ៉ាងណាក៏ដោយ ក្នុងរយៈពេលពីរឆ្នាំកន្លងមកនេះ អ្នកនាំចេញជាច្រើនបានផ្លាស់ប្តូរការផ្តោតអារម្មណ៍របស់ពួកគេទៅកាន់ទីផ្សារអាស៊ីផ្សេងទៀតដូចជា វៀតណាម កូរ៉េខាងត្បូង និងជប៉ុន។ ប្រទេសកាណាដានៅតែជាប្រទេសនាំចូលធំបំផុត ដែលមានចំនួន៣៧ភាគរយនៃការនាំចេញផ្លែឈើរីរបស់សហរដ្ឋអាម៉េរិក។
ចំពេលភាពមិនប្រាកដប្រជាទាក់ទងនឹងពន្ធគយ ដែលកំពុងបន្តជាមួយប្រទេសចិន អ្នកនាំចេញផ្លែឈើរី របស់អាម៉េរិកបានងាកទៅរកទីផ្សារជំនួសវិញ មានដូចជាប្រទេសវៀតណាម ដោយរួមចំណែកដល់ការកើនឡើងនៃការផ្គត់ផ្គង់ និងតម្លៃទាបបំផុត។ នៅក្នុងហាងមួយចំនួនរបស់វៀតណាម តម្លៃបានធ្លាក់ចុះមកត្រឹមតែ៧,២០ដុល្លារក្នុងមួយគីឡូក្រាម ពោលគឺពាក់កណ្តាលនៃតម្លៃកាលពីឆ្នាំ២០២៤។
ផ្សារទំនើប វីនម៉ាត (WinMart) ដែលជាបណ្តាញលក់រាយដ៏ធំបំផុតមួយរបស់វៀតណាមបានធ្វើយុទ្ធនាការលក់បញ្ចុះតម្លៃ ចាប់ពីថ្ងៃទី៨ ខែកក្កដាដល់ថ្ងៃទី២៣ ខែកក្កដា ដោយកាត់បន្ថយតម្លៃមកត្រឹម១១,៤០ដុល្លារក្នុងមួយគីឡូក្រាម ពោលគឺ៦,១០ដុល្លារអាម៉េរិកទាបជាងតម្លៃធម្មតា។ ជាលទ្ធផល ការលក់ផ្លែឈើរី បានកើនឡើង១៤០ភាគរយ បើធៀបនឹងរយៈពេលដូចគ្នា កាលពីឆ្នាំ២០២៤។
យោងតាមសមាគមន៍បន្លែ និងផ្លែឈើ វៀតណាម ការនាំចូលផ្លែឈើរី ឈានដល់២៨លានដុល្លារ ក្នុងរយៈពេលប្រាំខែដំបូង នៃឆ្នាំ២០២៥នេះ គឺកើនឡើង៤៣ភាគរយ ពីមួយឆ្នាំទៅមួយឆ្នាំ។ វៀតណាមក៏កំពុងចរចាលើកិច្ចព្រមព្រៀងពាណិជ្ជកម្មជាមួយសហរដ្ឋអាម៉េរិកដើម្បីកាត់បន្ថយពន្ធគយពី៤៦ភាគរយ មកនៅត្រឹម២០ភាគរយ ដោយលុបបំបាត់ពន្ធលើទំនិញរបស់សហរដ្ឋអាម៉េរិក។
ក្រសួងកសិកម្មសហរដ្ឋអាម៉េរិក បានព្យាករណ៍ថា ទិន្នផលផ្លែឈើរី នឹងកើនដល់៣៨៣ពាន់តោន ក្នុងឆ្នាំ២០២៥ ដែលជាការកើនឡើងប្រាំបីភាគរយ។ ទិន្នផលកើនឡើងនេះបានជំរុញឱ្យតម្លៃលក់ដុំក្នុងស្រុកធ្លាក់ចុះពី១០ ទៅ១៥ភាគរយ ក្នុងខែមិថុនា និងខែកក្កដា បើធៀបនឹងរយៈពេលដូចគ្នាកាលឆ្នាំ២០២៤។
នៅពេលការនាំចេញទៅកាន់ប្រទេសចិនដីគោក បន្តប្រឈមមុខនឹងឧបសគ្គ ហើយផ្លឈើរីក៏ត្រូវបានបញ្ជូនបន្តទៅកាន់ទីក្រុងហុងកុង ដោយជំរុញឱ្យតម្លៃធ្លាក់ចុះដល់កម្រិត។ ឈើរីនៅទីផ្សារក្នុងរដ្ឋធានី វ៉ាសីងតោន ឥឡូវនេះលក់ត្រឹមតែ១១,២៤ដុល្លារក្នុងមួយគីឡូក្រាម។
យោងតាមក្រុមហ៊ុននាំចូលផ្លែឈើរី បានឱ្យដឹងថា ការលក់ប្រចាំថ្ងៃខ្ពស់បំផុតបានកើនឡើងពី៨ ០០០ប្រអប់ កាលពីឆ្នាំ២០២៤ ប៉ុន្តែនៅឆ្នាំ២០២៥នេះ បានកើនឡើងដល់១២ម៉ឺនប្រអប់។ ទោះជាយ៉ាងណាក៏ដោយ តម្លៃក៏បានធ្លាក់ចុះយ៉ាងខ្លាំង ដោយប្រអប់ទម្ងន់ប្រាំគីឡូក្រាមឥឡូវនេះ លក់ក្នុងតម្លៃពី៣៣,១២ទៅ៣៥,៦៧ដុល្លារ ដោយធ្លាក់ចុះ៣៥ភាគរយ។
ចំណែកក្នុងខែមេសា ឆ្នាំ២០២៤ តម្លៃសរុបនៃផ្លែឈើរបស់អាម៉េរិក ដែលនាំចូលទៅទីក្រុងហុងកុង បានកើនឡើង១១៨ភាគរយ។ ទោះជាយ៉ាងណាក៏ដោយ នៅចន្លោះខែកុម្ភៈ ដល់ខែមេសា ឆ្នាំ២០២៥នេះ តម្លៃនៃផ្លែឈើរីស្រស់ ដែលបាននាំចេញឡើងវិញពីហុងកុងទៅកាន់ប្រទេសចិនដីគោក បានធ្លាក់ចុះ៧២ភាគរយពីមួយឆ្នាំទៅមួយឆ្នាំ៕
