ហ្សាការតា៖ ប្រទេសឥណ្ឌូណេស៊ី និងប្រទេសប៉េរូ កាលពីថ្ងៃទី១១ ខែកក្កដា ឆ្នាំ២០២៥ បានចុះកិច្ចព្រមព្រៀងពាណិជ្ជកម្ម ក្នុងពេលមេដឹកនាំប្រទេសទាំងពីរបានជួបប្រជុំគ្នានៅទីក្រុងហ្សាកាតា បន្ទាប់ពីប្រធានាធិបតីអាមេរិក លោក ដូណាល់ ត្រាំ (Donald Trump) បានកំណត់អត្រាពន្ធ១៩ភាគរយលើការនាំចូលពីប្រទេសឥណ្ឌូណេស៊ី។
សារព័ត៌មាន ហ្សាកាតា ប៉ុស្ត្តិ៍ របស់ឥណ្ឌូណេស៊ី បានចេញផ្សាយថា កិច្ចព្រមព្រៀងធ្វើឡើងក្នុងដំណើរទស្សនកិច្ចរបស់ប្រធានាធិបតីប៉េរូ លោកស្រី ឌីណា បូលួតេ (Dina Boluarte) ដែលត្រូវបានស្វាគមន៍ដោយក្រុមតន្រ្តីកងកិត្តិយស នៅឯវិមានប្រធានាធិបតី ក្នុងរដ្ឋធានីឥណ្ឌូណេស៊ី។
ប្រធានាធិបតីឥណ្ឌូណេស៊ី លោក ប្រាបូវូស ស៊ូប៊ីយ៉ាន់តូ (Prabowo Subianto) បានមានប្រសាន៍ថា មេដឹកនាំទាំងនេះបានធ្វើជាសាក្សីក្នុងការចុះហត្ថលេខាលើកិច្ចព្រមព្រៀងពាណិជ្ជកម្ម ហៅថា កិច្ចព្រមព្រៀងភាពជាដៃគូសេដ្ឋកិច្ចទូលំទូលាយ ដែលនឹងធ្វើឱ្យទំនាក់ទំនងរវាងប្រទេសទាំងពីរកាន់តែស៊ីជម្រៅបន្ទាប់ពីលោកបានទៅបំពេញទស្សនកិច្ចនៅទីក្រុងលីម៉ា កាលពីឆ្នាំ២០២៤។
លោកប្រធានាធិបតី បានមានប្រសាសន៍បន្ទាប់ពីកិច្ចប្រជុំថា «កិច្ចព្រមព្រៀងនេះនឹងពង្រីកការនាំទំនិញចូលទៅកាន់ទីផ្សារ និងជំរុញសកម្មភាពពាណិជ្ជកម្មរវាងប្រទេសទាំងពីរ។ ជាធម្មតា កិច្ចព្រមព្រៀងបែបនេះត្រូវចំណាយពេលជាច្រើនឆ្នាំ ប៉ុន្តែឥណ្ឌូណេស៊ី និងប៉េរូ អាចសម្រេចបាននូវកិច្ចព្រមព្រៀងនេះ ក្នុងរយៈពេល១៤ខែ»។
តាមការវិភាគស៊ីជម្រៅអំពីបញ្ហាធុរកិច្ច គេរំពឹងទុកថា កិច្ចព្រមព្រៀងនេះ គឺជាប្រភពឆ្ពោះទៅរកការពង្រីកទីផ្សារថ្មីៗថែមទៀត នៅក្នុងទិដ្ឋភាពអាជីវកម្ម ដែលកំពុងវិវត្តយ៉ាងឆាប់រហ័សរបស់ប្រទេសឥណ្ឌូណេស៊ី។
លោកប្រធានាធិបតី បានមានប្រសាសន៍ទៀតថា ប្រទេសទាំងពីរបានយល់ព្រមជំរុញកិច្ចសហប្រតិបត្តិការលើវិស័យនានា រួមទាំងវិស័យការពារជាតិ ឪសថ សន្តិសុខស្បៀង ថាមពល ជលផល និងរ៉ែផងដែរ។
យោងតាមទិន្នន័យរបស់ក្រសួងពាណិជ្ជកម្មឥណ្ឌូណេស៊ី បានឱ្យដឹងថា ក្នុងឆ្នាំ២០២៦ ការនាំចេញរបស់ឥណ្ឌូណេស៊ី ទៅកាន់ប្រទេសប៉េរូ មានតម្លៃ៣២៩,៤លានដុល្លារ ខណៈពេលការនាំចេញរបស់ប្រទេសប៉េរូ ទៅកាន់ប្រទេសឥណ្ឌូណេស៊ី មានទំហំទឹកប្រាក់ចំនួន១៤៩,៦លានដុល្លារ។
ដំណើរទស្សនកិច្ចរបស់លោកស្រីប្រធានាធិបតី ប៉េរូ គឺជាការផ្លាស់ប្តូរទស្សនកិច្ចទៅវិញទៅមក បន្ទាប់ពីលោកប្រធានាធិបតី ឥណ្ឌូណេស៊ី បានធ្វើដំណើរទៅកាន់ប្រទេស ប៉េរូ កាលពីក្នុងខែវិច្ឆិកា ឆ្នាំ២០២៤ ដើម្បីចូលរួមក្នុងកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក ហៅកាត់ថា APEC ។
រដ្ឋមន្ត្រីក្រសួងពាណិជ្ជកម្មឥណ្ឌូណេស៊ី បានបញ្ជាក់មុនដំណើរទស្សនកិច្ចផ្លូវរដ្ឋរបស់លោកស្រីប្រធានាធិបតី ប៉េរូ ថា កិច្ចព្រមព្រៀងសេដ្ឋកិច្ចនឹងអនុញ្ញាតឱ្យទំនិញឥណ្ឌូនេស៊ី ចូលទៅកាន់ទីផ្សារប្រទេសប៉េរូ៕
