តេអ៊ីរ៉ង់៖ ទោះបីជាប្រឈមមុខនឹងការដាក់ទណ្ឌកម្មសេដ្ឋកិច្ចក៏ដោយ ធម្មជាតិអំណោយផលរបស់អ៊ីរ៉ង់ និងតំបន់កសិអេកូឡូស៊ីចម្រុះផ្តល់នូវមូលដ្ឋានគ្រឹះសម្រាប់ការអភិវឌ្ឍវិស័យកសិកម្មដ៏រឹងមាំ និងធានាបាននូវសន្តិសុខស្បៀងក្នុងប្រទេស ព្រមទាំងអាចបង្ហាញឱ្យឃើញឡើងវិញ នូវតួនាទីរបស់ប្រទេសអ៊ីរ់ង់ នៅក្នុងប្រព័ន្ធស្បៀងអាហារក្នុងតំបន់ និងលើពិភពលោក។
សារព័ត៌មាន អ៊ីរ៉ង់ បានចេញផ្សាយថា ក្នុងចំណោមផ្ទៃដីសរុបជាង១៦៤លានហិកតារបស់ប្រទេសអ៊ីរ៉ង់ ផ្ទៃដីទំហំប្រមាណ១៩លានហិកតា គឺជាដីកសិកម្ម ដែលស្មើនឹង១២ភាគរយនៃផ្ទៃដីសរុបរបស់ប្រទេស។ ក្នុងចំណោមនោះ ផ្ទៃដីប្រមាណ១៨,៥លានហិកតា បច្ចុប្បន្នត្រូវបានប្រើប្រាស់សម្រាប់ដំណាំសាកវប្បកម្ម និងដំណាំកសិកម្ម។ ខណៈពេលប្រហែលមួយភាគបីនៃផ្ទៃដីសរុបរបស់ប្រទេសអ៊ីរ៉ង់ ត្រូវបានចាត់ទុកជាដីល្អសមរម្យសម្រាប់ធ្វើស្រែចម្ការបាន។
អាកាសធាតុល្អនៅក្នុងប្រទេសអ៊ីរ៉ង់ គឺជាអំណោយផលឱ្យកសិករអាចដាំដុះដំណាំជាច្រើនប្រភេទ ពេញមួយឆ្នាំ ដែលធ្វើឱ្យអ៊ីរ៉ង់អាចផលិតធញ្ញជាតិសំខាន់ៗ បន្លែផ្លែឈើ រុក្ខជាតិឱសថ និងផលិតផលសត្វដែលសម្របខ្លួនទៅនឹងបរិស្ថានផ្សេងៗគ្នា លើផ្ទៃដីលាតសន្ធឹងពីភាគអាគ្នេយ៍ដ៏ស្ងួតហួតហែងទៅតំបន់ភាគខាងជើងដ៏ខៀវស្រងាត់ នៅជាប់ព្រំដែនសមុទ្រកាសព្យែន។
ចំណែកចំណុចខ្លាំងជាយុទ្ធសាស្ត្រមួយទៀតរបស់ប្រទេសអ៊ីរ៉ង់មួយទៀត គឺការធ្វើកសិកម្មមានទឹកភ្លៀងគ្រប់គ្រាន់ ដែលបច្ចុប្បន្នគ្របដណ្តប់លើផ្ទៃដីប្រមាណ៦លានហិកតា។
ទោះបីជាយ៉ាងណាក៏ដោយ ជាមួយនឹងភាពជឿនលឿនក្នុងការគ្រប់គ្រងទឹក និងការអនុវត្តកសិកម្មបែបទំនើប ផ្ទៃដីដាំដុះដ៏សក្តានុពលអាចកើនឡើងចំនួនបួនដង ដែលនាំមកនូវផ្ទៃដីកសិកម្មរហូតដល់ទំហំ១៤ លានហិកតា ក្រោមការប្រើប្រាស់ប្រកបដោយផលិតភាព។ កត្តានេះអាចជំរុញផលិតកម្មស្បៀងក្នុងស្រុកកើនឡើងយ៉ាងច្រើនដោយមិនពឹងផ្អែកខ្លាំងពេកលើធនធានធារាសាស្ត្រ។
ម្យ៉ាងវិញទៀត ការធ្វើកសិកម្មក្នុងផ្ទះសំណាញ់កំពុងបង្ហាញពីភាពជោគជ័យថ្មីមួយទៀត។ ទោះបីជាផ្ទៃដីផ្ទះសំណាញ់មានទំហំសរុបប្រហែល១៨ ០០០ហិកតា ក្នុងរយៈប៉ុន្មានឆ្នាំចុងក្រោយនេះក៏ដោយ ក៏ផែន ការអភិវឌ្ឍន៍នឹងពង្រីករហូតដល់៦៤ ០០០ហិកតា នៅក្នុងឆ្នាំ២០២៥នេះ។
ការធ្វើកសិកម្មក្នុងផ្ទះសំណាញ់របស់អ៊ីរ៉ង់អាចបង្កើនទិន្នផលយ៉ាងច្រើន ហើយជួយកាត់បន្ថយការប្រើប្រាស់ទឹកច្រើនផងដែរ ដែលជួយសម្រាលបន្ទុករបស់ប្រទេសប្រឈមនឹងបញ្ហាខ្វះខាតទឹក ដែលជាតម្រូវការសម្រាប់ផលិតកម្មដាំបន្លែផ្លែឈើឱ្យបានពេញមួយឆ្នាំ។
ជីវចម្រុះដ៏សម្បូរបែបរបស់ប្រទេសអ៊ីរ៉ង់នេះហើយ ដែលផ្តល់នូវអត្ថប្រយោជន៍ពិសេសមួយ រួមទាំងប្រភេទរុក្ខជាតិជាង៨ ០០០ប្រភេទ រួមទាំងរុក្ខជាតិឱសថសម្រាប់ព្យាបាលជំងឺជាង២ ៣០០ប្រភេទ។
សក្ដានុពលរបស់ប្រទេសអ៊ីរ៉ង់ក្នុងការបង្កើនការដាំដុះ និងការកែច្នៃរុក្ខជាតិឱសថ និងគ្រឿងក្រអូបអាចនាំឱ្យអីរ៉ង់ក្លាយជាអ្នកផ្គត់ផ្គង់ដ៏សំខាន់នៅក្នុងទីផ្សារពិភពលោក ដែលកំពុងតែត្រូវការផលិតផលធម្មជាតិសម្រាប់សុខភាព ផ្តល់ការវិនិយោគលើបច្ចេកវិទ្យា និងកែច្នៃជាផលិតផលអាទិភាពផងដែរ។
រីឯការចិញ្ចឹមសត្វវិញ ទទួលបានអំណោយផលយ៉ាងល្អដោយមានវាលស្មៅដ៏ធំល្វឹងល្វើយ ដែលមានផ្ទៃដីជាង៨០លានហិកតា ល្អសម្រាប់ការចិញ្ចឹមចៀម និងចិញ្ចឹមពពែរាប់លានក្បាលរបស់កសិករអ៊ីរ៉ង់។
ការធ្វើទំនើបកម្មប្រព័ន្ធទាំងនេះ ដើម្បីបង្កើនផលិតភាព និងរួមបញ្ចូលលំហូរប្រាក់ចំណូលចម្រុះ មានដូចជាផលិតផលទឹកដោះគោ រោមចៀម ស្បែក និងទេសចរណ៍ជនបទ អាចជួយពង្រឹងជីវភាពរស់នៅតាមជនបទ និងកាត់បន្ថយការនាំចូលផលិតផលសត្វពីបរទេសផងដែរ៕
