ហុងកុង៖ នៅពេលព្យុះទីហ្វុង វីផា (Wipha) កាន់តែមានឥទ្ធិពលកម្លាំងខ្លាំង ហើយក្រុមឃ្លាំមើលអាកាសធាតុហុងកុង បានប្រកាសថា ទំនងជាមានខ្យល់បក់ខ្លាំង និងភ្លៀងធ្លាក់ខ្លាំងចូលមកដល់នាពេលខាងមុខ ភ្លាមនោះប្រជាជនហុងកុង ក៏ផ្អើលនាំគ្នាសម្រុកទីទៅទិញគ្រឿងឧបភោគបរិភោគមកស្តុកទុកសម្រាប់ថ្ងៃក្រោយ។
យោងតាមការផ្សាយរបស់គេហទំព័រលក់បន្លែផ្លែឈើ កាលពីថ្ងៃទី២២ ខែកក្កដា ឆ្នាំ២០២៥ បានលើកឡើងថា ដោយគិតទុកជាមុនអំពីព្យុះចូលមកដល់ ប្រជាជនហុងកុងក៏ផ្អើលសម្រុកចូលបណ្តាផ្សារទំនើបក្នុងទីក្រុងហុងកុង ដូចជាផ្សារ វ៉ែលខាំ ( Wellcome) និងផ្សារអ៊ីអន (Aeon) ជាដើម ដោយនាំគ្នាទិញរបស់របរហូបចុកបន្លែបន្លុកស្ទើរគ្មានសល់។
សេចក្តីការណ៍ប្លែកនៅលើប្រព័ន្ធផ្សព្វផ្សាយសង្គម ក្នុងទីក្រុងហុងកុង បានបង្ហាញរូបភាព និងឃ្លីបវីដេអូអំពីធ្នើដាក់តាំងទំនិញ នៅទទេស្អាត ខណៈអ្នកខ្លះទិញបានរបស់របរសំខាន់ៗ។ ចំណែក រូបភាពខ្លះបង្ហោះតាមហ្វេសប៊ុក បានផ្ទុះចំណាប់អារម្មណ៍ដោយកត់សម្គាល់ថា រហូតដល់ម៉ោង៦ល្ងាច ថ្ងៃទី២២ ខែកក្កដា ឆ្នាំ២០២៥ ទូដាក់នំប៉័ងនៅផ្សារទំនើបអ៊ីអន គឺគ្មាននៅសល់នំប៉័ងឡើយ។
រីអ្នកអត្ថាធិប្បាយបានសង្កេតឃើញបែបនេះ ហើយបញ្ចេញយោបល់ថា «ប្រជាជនហុងកុងពិតចម្លែកណាស់ រាល់ពេលមានខ្យល់ព្យុះភ្លៀងម្តងៗ ពួកគេផ្អើលឈូឆរប្រញាប់ប្រញាល់ទិញស្តុកគ្រឿងហូបចុក។ ប៉ុន្តែ តាមពិតភោជនីយដ្ឋានភាគច្រើននៅហុងកុង កំពុងតែបើកទ្វារដដែល មិនចាំបាច់ភ័យស្លន់ស្លោឡើយ»។
ទោះបីជាភោជនីយដ្ឋាននៅបើកទ្វារក្តី រឿងចម្លែកមួយទៀតគួរឱ្យកត់សម្គាល់ គឺមានតែបន្លែភ្លៅកង្កែបប៉ុណ្ណោះ ដែលសល់លើធ្នើ ចំណែកបន្លែផ្សេងទៀតគេទិញអស់គ្មានសល់។
ឃ្លីបវីដេអូ ដែលត្រូវបានចែករំលែកនៅលើបណ្តាញសង្គម បានបង្ហាញពីបន្លែនៅផ្សារទំនើប វ៉ែលខាំដោយមាននៅសល់ត្រឹមតែបន្លែភ្លៅកង្កែប តែមួយមុខប៉ុណ្ណោះ។ អ្នកបង្ហោះរូបភាពនេះ បាននិយាយបែបកំប្លែងថា «ម៉ាក់អើយ! ខ្ញុំបានរកឃើញបន្លែស្រស់ហើយ! ព្យុះនេះបង្ហាញពីចំនួនប្រជាជនហុងកុងភាគច្រើនគឺមិនចូលចិត្តបន្លែភ្លៅកង្កែបទេ!»។
តាមរយៈឃ្លីបវីដេអូដដែលនេះ បានបញ្ឆេះការពិភាក្សាតាមប្រព័ន្ធអ៊ីនធឺណេត រួមជាមួយនឹងការសរសើរ និងរិះគន់បន្លែភ្លៅកង្កែបផង។ ផ្ទុយទៅវិញ អ្នកចូលចិត្តបន្លែនេះ បានគូសបញ្ជាក់ពីរស់ជាតិបន្លែភ្លៅកង្កែបរហូតធ្វើអ្នកខ្លះបញ្ចេញយោបល់ថា ឈប់ជជែកបន្លែនេះទៅ នាំឱ្យតែឃ្លាន៕
អ្នកអត្ថាធិប្បាយម្នាក់បានកត់សម្គាល់ដោយកំប្លែងថា «និយាយពីមុខម្ហូបធ្វើពីបន្លែភ្លៅកង្កែប ធ្វើឱ្យខ្ញុំឃ្លានហើយ!៕
