ហ្សាការតា៖ សមាគមរោងម៉ាស៊ីនកិនម្សៅរបស់ប្រទេសឥណ្ឌូណេស៊ី នឹងចុះហត្ថលេខាលើកិច្ចព្រមព្រៀងមួយ ដើម្បីនាំចូលស្រូវសាលីរបស់អាម៉េរិក យ៉ាងហោចណាស់មួយលានតោនក្នុងមួយឆ្នាំ សម្រាប់រយៈពេលប្រាំឆ្នាំខាងមុខ ក្នុងតម្លៃជាទឹកប្រាក់ចំនួន១,២ពាន់លានដុល្លារ ដើម្បីចៀសវាងការយកពន្ធដ៏អាក្រក់បំផុតរបស់ប្រធានាធិបតីអាម៉េរិក លោក ដូណាល់ ត្រាំ (Donald Trump)។
រដ្ឋមន្ត្រីក្រសួងសេដ្ឋកិច្ចឥណ្ឌូណេស៊ី លោក អៀឡាងហ្គា ហាតាតូ (Airlangga Hartarto) បានប្រាប់ទីភ្នាក់ងារព័ត៌មានបារាំង អាអេហ្វប៉េ (AFP) កាលពីសប្តាហ៍មុនថា រដ្ឋាភិបាលទីក្រុងហ្សាការតានឹងបង្កើនការនាំចូលកសិផលពីសហរដ្ឋអាម៉េរិក ដើម្បីជៀសវាងការយកពន្ធកាន់តែតឹងរ៉ឹង និងកាន់តែច្រើន ដែលរដ្ឋាភិបាលក្រុងវ៉ាស៊ីនតោន បាននិយាយថា នឹងចូលជាធរមាននៅថ្ងៃទី០១ ខែសីហា ឆ្នាំ២០២៥នេះ ប្រសិនបើមិនមានកិច្ចព្រមព្រៀងថ្មីណាមួយ។
ចំណែកប្រធានសមាគមរោងម៉ាស៊ីនកិនម្សៅឥណ្ឌូណេស៊ី បាននិយាយកាលពីថ្ងៃទី៧ ខែកក្កដា ឆ្នាំ២០២៥ ដូច្នេះថា «យើងមានកិច្ចព្រមព្រៀងរួចហើយរវាងទិញស្រូវសាលីចំនួនមួយលានតោន នៅឆ្នាំ២០២៦ ដល់ឆ្នាំ២០២៣០»។
លោកបាននិយាយបន្តទៀតថា កិច្ចព្រមព្រៀងដែលមានតម្លៃជាទឹកប្រាកើប្រមាណ ២៥០លានដុល្លារក្នុងមួយឆ្នាំ នឹងត្រូវចុះហត្ថលេខានៅទីក្រុងហ្សាការតា នៅថ្ងៃទី០៧ ខែកក្កដា ឆ្នាំ២០២៥។
លោកបានមានប្រសាសន៍ថា «នៅក្នុងបរិបទនៃការចរចារលើអត្រាពន្ធលើប្រទេសឥណ្ឌូណេស៊ី យើងជាអាជីវកម្មឯកជនរួមគ្នាជាមួយអាជីវកម្មឯកជនរបស់អាម៉េរិក បានយល់ព្រមចុះកិច្ចព្រមព្រៀងមួយជាមួយគ្នា»។
លោក ដូណាល់ ត្រាំ បាននិយាយកាលពីថ្ងៃទី៦ ខែកក្កដា ឆ្នាំ២០២៥ លោកនឹងជូនដំណឹងដល់បណ្ដាប្រទេសផ្សេងៗ អំពីអត្រាការប្រាក់ថ្មី ចូលធរមាននៅក្នុងសប្តាហ៍នេះ ដោយព្រមានថា ការយកពន្ធនាំចូលរបស់សហរដ្ឋអាម៉េរិក នឹងឡើងដល់កម្រិតខ្ពស់បំផុត ដែលលោកបានកំណត់ក្នុងខែមេសា ក្រោយមកបានពន្យាពេលទុករយៈពេល៩០ថ្ងៃ ដើម្បីប្រទេសជាប់ពាក់ព័ន្ធចេញមុខមកចរចា។
ប្រទេសឥណ្ឌូណេស៊ី ដែលរាប់បញ្ចូលសហរដ្ឋអាម៉េរិក គឺស្ថិតក្នុងចំណោមដៃគូពាណិជ្ជកម្មធំជាងគេ កំពុងប្រឈមនឹងពន្ធបន្ថែមចំនួន៣២ភាគរយ លើអត្រាពន្ធមូលដ្ឋានចំនួន១០ភាគរយ។ យោងតាមទិន្នន័យពីការិយាល័យតំណាងពាណិជ្ជកម្មអាម៉េរិក បានបង្ហាញថា ឱនភាពពាណិជ្ជកម្មទំនិញរបស់រដ្ឋាភិបាលទីក្រុងវ៉ាស៊ីនតោនជាមួយរដ្ឋាភិបាលទីក្រុងហ្សាកាតា មានចំនួន១៧,៩ពាន់លានដុល្លារ ក្នុងឆ្នាំ២០២៤ ដោយកើនឡើង៥,៤ភាគរយបើធៀបនឹងអត្រាពន្ធ កាលពីឆ្នាំ២០២៤។
រដ្ឋមន្ត្រីក្រសួងសេដ្ឋកិច្ចឥណ្ឌូណេស៊ី លោក អៀឡាងហ្គា ហាតាតូ បាននិយាយថា ដំណើរការចរចាកំពុងបន្តជាមួយរដ្ឋាភិបាលទីក្រុងវ៉ាស៊ីនតោន ដោយបានសន្យាថា រដ្ឋាភិបាលទីក្រុងហ្សាការតា នឹងបង្កើនការនាំចូលប្រេងឥន្ទនៈ និងទំនិញរបស់ខ្លួន ដើម្បីបិទគម្លាតពាណិជ្ជកម្មរវាងប្រទេសទាំងពីរ៕
