ម៉ានីល៖ ក្រុមអ្នកស្រាវជ្រាវ បានលើកឡើងថា រដ្ឋាភិបាលហ្វីលីពីនត្រូវតែបែងចែកយ៉ាងហោចណាស់មួយភាគរយនៃតម្លៃបន្ថែមសរុបរបស់ឧស្សាហកម្មស្រូវអង្ករ សម្រាប់គាំទ្រការស្រាវជ្រាវ និងអភិវឌ្ឍន៍ ដើម្បីបង្កើនទិន្នផល និងកែលម្អដំណើរការផ្គត់ផ្គង់ផលិតផលស្រូវអង្ករ។
យោងតាមសារព័ត៌មានរបស់ហ្វីលីពីន បានឱ្យលើកអំពីរបាយការណ៍សង្ខេបនៃគោលនយោបាយរៀបចំដោយវិទ្យាស្ថានស្រាវជ្រាវអង្ករហ្វីលីពីន ដោយបានកំណត់យកការស្រាវជ្រាវ និងអភិវឌ្ឍន៍ គឺជាកត្តាដ៏ធំបំផុត ដែលជួយជំរុញឱ្យមានកំណើនផលិតកម្មស្រូវ នៅក្នុងប្រទេសហ្វីលីពីន កើនឡើងក្នុងអត្រា២៧ភាគរយ។
វិទ្យាស្ថានស្រាវជ្រាវរបស់ហ្វីលីពីន បានកត់សម្គាល់ថា កំណើនទិន្នផលស្រូវពីឆ្នាំ២០០៤ ដល់ឆ្នាំ២០១៣ ដែលមានកំណើនចំនួន១,០៦ភាគរយ ប៉ុន្តែនៅទីបំផុតវាបានធ្លាក់ចុះមកត្រឹម០,៤១ភាគរយប៉ុណ្ណោះ នៅក្នុងឆ្នាំ២០១៤ ដល់ឆ្នាំ២០២៣។
វិទ្យាស្ថានដដែល បានលើកឡើងទៀតថា អត្រាធ្លាក់ចុះនេះ គឺជាលទ្ធផលនៃឱនភាពនៅក្នុងតំបន់ប្រមូលផលស្រូវ ដែលបានធ្លាក់ចុះពី១,៥ភាគរយ ពីឆ្នាំ២០០៤ ដល់ឆ្នាំ២០១៣ និងកើនឡើង០,១៦ភាគរយ នៅក្នុងឆ្នាំ២០២៤ ដល់ឆ្នាំ២០២៣។ ការកើនឡើងភាគរយនៃកំណើនផលិតកម្មស្រូវហ្វីលីពីន រវាងឆ្នាំ២០០៤ និងឆ្នាំ២០១៣ គឺមានចំនួន២៧ភាគរយ បើធៀបនឹងការកើនឡើងចំនួនប្រាំមួយភាគរយ ដែលត្រូវបានកត់ត្រាពីក្នុងឆ្នាំ២០១៤ ដល់ឆ្នាំ២០២៣។
វិទ្យាស្ថានស្រាវជ្រាវ បាននិយាយទៀតថា ការធ្លាក់ចុះនៃទំហំផ្ទៃដីដាំស្រូវ ដែលធ្លាប់តែប្រមូលផលនាពេលកន្លងមក គឺជាសញ្ញាបង្ហាញថា ផលិតកម្មដំណាំស្រូវនាពេលអនាគត នឹងបានមកពីសមត្ថភាពផលិតអាចផ្តល់ទិន្នផលខ្ពស់ មិនមែនដោយសារទំហំផ្ទៃដីដាំដុះឡើយ។
វិទ្យាស្ថានស្រាវជ្រាវនេះ បាននិយាយថា បច្ចេកវិទ្យាភាគច្រើន ដែលយើងអនុវត្តនាពេលបច្ចុប្បន្ននេះ គឺជាផលិតផលនៃការវិនិយោគរបស់វិទ្យាស្ថានស្រាវជ្រាវ និងអភិវឌ្ឍន៍ពីមុន។ ដូច្នេះហើយ ទុនសម្រាប់ការវិនិយោគថ្មីគួរតែកើនឡើងច្រើនជាងមុន ដើម្បីធានាបាននូវប្រភពនៃកំណើនផលិតកម្មស្រូវនាពេលអនាគត។ រដ្ឋាភិបាលហ្វីលីពីនក៏គួរតែពង្រីក និងបង្កើនលទ្ធភាពទទួលបានបច្ចេកវិទ្យារបស់កសិករ ពង្រឹងការអភិវឌ្ឍហេដ្ឋារចនាសម្ព័ន្ធ និងជំរុញការគាំទ្រ និងផ្តល់សេវាកម្មបន្ថែមដោយផ្អែកលើតម្រូវការជាក់ស្តែង ដើម្បីបង្កើនផលិតកម្មស្រូវនៅក្នុងប្រទេសហ្វីលីពីន។
របាយការណ៍បានបន្ថែមថា ការបង្កើតមូលដ្ឋានទិន្នន័យកណ្តាល និងការវិភាគទិន្នន័យតាមពេលវេលាជាក់ស្តែងនឹងជួយមិនត្រឹមតែអ្នកពាក់ព័ន្ធវិស័យស្រូវអង្ករប៉ុណ្ណោះទេ ប៉ុន្តែថែមទាំងជាអ្នកបង្កើតគោលនយោបាយក្នុងការបង្កើតគោលនយោបាយចាំបាច់នានា ដើម្បីបង្កើនល្បឿនកំណើនផលិតកម្មស្រូវផងដែរ៕
