កដ្ឋមណ្ឌូ៖ ប្រសិនបើអ្វីៗដំណើរការដូចការគ្រោងទុក ប្រទេសនេប៉ាល់នឹងចាប់ផ្តើមនាំចេញសាច់ក្របីទៅកាន់ប្រទេសចិន នៅពាក់កណ្កាលឆ្នាំក្រោយ ក្នុងគោលដៅនាំសាច់ក្របីចេញប្រចាំថ្ងៃចំនួន៥ ០០០តោន។
យោងតាមបណ្តាញព័ត៌មានអាស៊ី (Asia News Network) បានដកស្រងសម្តីប្រធានក្រុមហ៊ុននាំចេញសាច់ក្របីរបស់នេប៉ាល់ ដែលបាននិយាយថា ក្រុមហ៊ុនរបស់លោកទទួលបានការយល់ព្រមសម្រាប់ការវិនិយោគរបស់ចិន ដែលមានតម្លៃទឹកប្រាក់ជិត៧០លានដុល្លារ។
លោកប្រធានក្រុមហ៊ុន បាននិយាយដូច្នេះថា «យើងគួរចាប់ផ្តើមសាងសង់រោងចក្ររួចយូរមកហើយ ប៉ុន្តែដោយមានការពន្យារពេលរបស់រដ្ឋាភិបាលនេប៉ាល់ ក្នុងការប្រកាសតំបន់គ្មានជំងឺចំពោះសម្រាប់សត្វពាហនៈ។ ភាគីចិនរង់ចាំការប្រកាសជាផ្លូវការមុននឹងអនុម័តកញ្ចប់ថវិកាវិនិយោគ»។
លោកប្រធានក្រុមហ៊ុន បានលើកឡើងថា ទោះបីរដ្ឋាភិបាលនេប៉ាល់ មានគម្រោងបញ្ជូនឯកសារចាំបាច់លើកដំបូង នៅក្នុងខែធ្នូ ឆ្នាំ២០២៤ក៏ដោយ ប៉ុន្តែឯកសារទាំងនោះត្រូវបានបញ្ជូននៅក្នុងខែមិថុនា ឆ្នាំ២០២៥វិញ។ ក្នុងរយៈពេលមួយសប្តាហ៍ក្រោយពីដាក់ពាក្យស្នើសុំ នោះប្រទេសចិន នឹងយល់ព្រមលើការវិនិយោគនៅបរទេស។
រោងចក្រកែច្នៃវេចខ្ចប់សាច់ក្របីនេះ មានទីតាំងនៅក្នុងទីប្រជុំជនមួយកន្លែងក្នុងខេត្ត បាកម៉ាទី ស្ថិតនៅភាគខាងកើតរាជធានី កដ្ឋមណ្ឌូ។ ចំណែកសត្វក្របីនឹងត្រូវបានចិញ្ចឹមនៅតាមតំបន់ជនបទនានា នៅក្នុងខេត្តនេះ។ ទោះបីជាតំបន់ទាំងនេះមិនត្រូវបានទទួលស្គាល់ជាផ្លូវការថា ជាតំបន់គ្មានជំងឺឆ្លងក៏ដោយ ប៉ុន្តែសត្វក្របីនឹងត្រូវបានដឹកជញ្ជូនទៅកាន់សត្តឃាតដ្ឋាន ដោយដាក់ឱ្យនៅដាច់ដោយឡែករយៈពេលបីសប្តាហ៍ជាមុនសិន ទើបសម្លាប់យកសាច់វេចខ្ចប់នាំចេញទៅប្រទេសចិន។
លោកប្រធានក្រុមហ៊ុន បានមានប្រសាសន៍ថា ក្នុងចំណោមដីជួលទំហំ៥០ហិកតា ដែលបានចុះកិច្ចសន្យាសម្រាប់គម្រោងវិនិយោគនេះ ក្រុមហ៊ុនបានឈួសសម្អាតបានត្រឹមតែ១០ហិកតាប៉ុណ្ណោះ ខណៈដីនៅសល់៣០ហិកតាទៀត ត្រូវរងចាំការអនុញ្ញាតពីអាជ្ញាធរមូលដ្ឋាន។
ចំណែកក្រុមហ៊ុនសំណង់ចិនបានមកដល់ប្រទេសនេប៉ាល់រួចរាល់ហើយ ដើម្បីចាប់ផ្តើមសាងសង់ទីតាំងសត្តឃាតដ្ឋាន ដោយសង្ឃឹមថា នឹងចាប់ផ្តើមការសាងសង់ នៅខែកញ្ញា ឆ្នាំ២០២៥នេះ និងក្រោងបញ្ចប់ការសាងសង់នៅក្នុងខែមេសាឆ្នាំ២០២៦។ ចំណែកដំណើរចិញ្ចឹមក្របីនឹងចាប់ផ្តើមនៅក្នុងខែតុលា ឆ្នាំ២០២៥ ដោយគ្រោងចិញ្ចឹមកូនក្របីចំនួន២០០ ០០០ក្បាលក្នុងរយៈពេលបួនខែដំបូង តាមរយៈទិញកូនក្របីពីកសិករនៅក្នុងមូលដ្ឋាន។
ក្រុមហ៊ុនកែច្នៃវេចខ្ចប់សាច់ក្របី ធ្លាប់បានបង្កើតការិយាល័យសាជីវកម្មរបស់ខ្លួន រួចរាល់ហើយនាពេលកន្លងមក ដោយបាននាំចេញសាច់ក្របីទៅប្រទេសវៀតណាម ដែលក្រោយមកបានប្រែក្លាយជាមជ្ឈមណ្ឌលនាំចេញសាច់ក្របីទៅកាន់ប្រទេសចិន។
អ្នករកស៊ីក្នុងឧស្សាហកម្មសាច់ក្របីនៅតែមានការប្រុងប្រយ័ត្ន ដោយសារចំនួនសត្វក្របីបច្ចុប្បន្នរបស់នេប៉ាល់ គឺមិនគ្រប់គ្រាន់សម្រាប់បំពេញតម្រូវការក្នុងស្រុកនៅឡើយទេ។ សាច់ក្របីប្រមាណជិត៧០ភាគរយ ដែលផ្គត់ផ្គង់ទីផ្សារនៅក្នុងប្រទេសនេប៉ាល់ គឺបានមកពីការនាំចូលដោយខុសច្បាប់ពីប្រទេសឥណ្ឌា។ ឧស្សាហកម្មសាច់ក្របីក្នុងប្រទេសនេប៉ាល់ នៅតែបន្តប្រឈមមុខនឹងការផ្គត់ផ្គង់មិនគ្រប់គ្រាន់តាមតម្រូវការទីផ្សារ។
ខណៈពេលប្រទេសនេប៉ាល់សម្រេចបាននូវភាពគ្រប់គ្រាន់ដោយខ្លួនឯង ក្នុងការផលិតសាច់ពពែ និងបសុបក្សី ប៉ុន្តែសម្រាប់ទីផ្សារសាច់ក្របីនៅតែជួបបញ្ហាខ្វះខាត។
ដំណើរការចិញ្ចឹមក្របី ត្រូវធ្វើឡើងតាមរយៈប្រមូលទិញសត្វនៅក្នុងតំបន់ ដោយត្រូវចំណាយពេលប្រហែលពីរឆ្នាំសម្រាប់ចិញ្ចឹមកូនក្របី រហូតដល់ធំពេញវ័យសម្រាប់យកសាច់៕
