ហាណូយ៖ អាជ្ញាធរវៀតណាមបានលាតត្រដាងរឿងអាស្រូវអំពីសុវត្ថិភាពចំណីអាហារដ៏សំខាន់មួយ ដែលឈ្មួញទុចរិតយកប្រេងឆាសម្រាប់ផលិតជាចំណីសត្វរាប់ម៉ឺនតោន ត្រូវបានលក់បន្លំជាប្រេងឆា ចែកចាយដល់ភោជនីយដ្ឋាន រោងចក្រ និងដល់អ្នកផលិតចំណីអាហារ នៅទូទាំងប្រទេសវៀតណាម។
នាយកដ្ឋានសុវត្ថិភាពចំណីអាហាររបស់វៀតណាម បានចេញការព្រមានដល់ទូទាំងប្រទេស កាលពីថ្ងៃទី២៥ ខែមិថុនា ឆ្នាំ២០២៥ បន្ទាប់ពីនគរបាលនៅខេត្តហុងយ៉េន (Hung Yen) ភាគខាងកើតទីក្រុងហាណូយ បានបង្ក្រាបអំពើកែច្នៃប្រេងឆាក្លែងក្លាយដ៏ធំមួយ។ ក្រុមហ៊ុនផលិត និងនាំចេញចំណីអាហាររបស់វៀតណាមឈ្មោះ ញ៉ាតមិញ (Nhat Minh) ត្រូវរងការចោទប្រកាន់ថា បាននាំចូលប្រេងឆាថោកៗសម្រាប់ផលិតចំណីសត្វ យកមកវេចខ្ចប់វាឡើងវិញ ក្រោមម៉ាកយីហោ អូហ្វូដ (OFOOD) និងបានលក់ចែកចាយជាផលិតផលប្រេងឆាសម្រាប់ធ្វើម្ហូបមនុស្ស។
មន្ត្រីមកពីនាយកដ្ឋានសុវត្ថិភាពចំណីអាហារ បាននិយាយថា ប្រេងឆាក្លែងក្លាយនេះបង្កគ្រោះថ្នាក់ខ្លាំងណាស់ដល់សុខភាពមនុស្ស។
ប្រេងឆាសម្រាប់ផលិតចំណីសត្វ គឺជាប្រេងឆៅ មិនទាន់ចម្រាញ់ និងអាចមានជាតិពុល សារធាតុមិនស្អាត និងសារធាតុគីមី បង្កគ្រោះថ្នាក់ដល់សុខភាពមនុស្ស។ ប្រសិនបើទទួលទានប្រេងឆាប្រភេទនេះយូរៗទៅអាចបណ្តាលឱ្យពុល ខូចប្រព័ន្ធសរីរាង្គ បង្កើតជាតិពុល និងបង្កឱ្យកើតជំងឺរ៉ាំរ៉ៃ។
អាជ្ញាធរវៀតណាមបានជំរុញឱ្យគ្រប់ភោជនីយដ្ឋាន អ្នកផ្គត់ផ្គង់អាហារ និងរោងចក្រផលិតចំណីអាហារទាំងអស់ ត្រូវផ្ទៀងផ្ទាត់ឯកសារអ្នកផ្គត់ផ្គង់ឱ្យបានច្បាស់លាស់ ដោយបន្ថែមថា រាល់សារធាតុផ្សំណាមួយ ដែលបានប្រើប្រាស់គោលការណ៍ណែនាំ បើទោះបីជាមានឯកសារត្រឹមត្រូវក៏ដោយ នៅតែខុសច្បាប់ និងមានគ្រោះថ្នាក់ដល់សុខភាពមនុស្ស។
កាលពីខែមេសា ឆ្នាំ២០២៥ នគរបាលខេត្ត ភូធូ (Phu Tho) ស្ថិតនៅខាងលិចទីក្រុងហាណូយ បានចាប់រឹបអូសយកបានប្រេងឆាក្លែងក្លាយចំនួន៧១ ០០០លីត្រ ម្សៅម៉ុនសូដ្យូម គ្លុយតាម៉េត ចំនួន៤០តោន ម្សៅគ្រឿងទេសក្លែងក្លាយ ចំនួន២២តោន និងអំបិលក្លែងក្លាយប្រាំបួនតោន។ នៅទីក្រុងហាណូយ ក្រុមមន្ត្រីពាក់ព័ន្ធ បានរឹបអូសសាច់បង្កក សាច់ក្រក គ្រឿងផ្សំសម្រាប់ស៊ុប និងសណ្តែកបណ្តុះ មានផ្ទុកសារធាតុគីមីរាប់ពាន់តោន។
អាជ្ញាធរវៀតណាម បានព្រមានថា ផលិតផលពុលទាំងនេះជាច្រើនត្រូវបានឈ្មួញលក់ក្នុងតម្លៃថោកៗ តាមរយៈប្រព័ន្ធផ្សព្វផ្សាយសង្គម ទីផ្សារតាមចិញ្ចើមផ្លូវ និងបណ្តាញចែកចាយលួចលាក់ផ្សេងៗ ហើយភាគច្រើននៃគ្រឿងឧបភោគបរិភោគខុសច្បាប់ទាំងអស់នេះលក់អាហារដ្ឋានក្នុងសាលារៀន ហាងបាយនៅក្នុងរោងចក្រ និងរោងចក្រផលិតចំណីអាហារ៕
