ខេត្តតាកែវ៖ ដំបូងឡើយ ម្ចាស់ដើមព្រីងបានគិតត្រឹមថា ដាំដើមពូជឈើមួយប្រភេទនេះនៅតាមព្រំរបងផ្ទះ គឺដើម្បីការពារខ្យល់ និងធ្វើឱ្យជុំវិញផ្ទះមានទេសភាពបៃតងល្អ ចំណែកផ្លែរបស់វាក្រៅពីហូប គេអាចកែច្នៃធ្វើជាឪសថសម្រាប់ព្យាបាលជំងឺផងដែរ។
លោក រស់ កេត កសិករនៅស្រុកអង្គរបុរី ខេត្តតាកែវ បាននិយាយថា ការដំាំដើមព្រីងនៅក្បែរផ្ទះ ក្រៅពីផ្តល់លក់ផ្លែទុំសម្រាប់ហូប លោកក៏អាចកែច្នៃធ្វើជាស្រាបានថែមទៀតផង ដោយអាចផ្តល់ចំណូលរហូតដលប្រាំពាន់ដុល្លារក្នុងមួយឆ្នាំ។
កសិករខាងលើបានរៀបរាប់អំពីអត្ថប្រយោជន៍ផ្លែប្រេងថា ដើមព្រីងមានអត្ថប្រយោជន៍កែច្នៃធ្វើជាឱសថសម្រាប់ព្យាបាលជំងឺ, ជួយការពារខ្យល់កន្ទ្រាក់ និងធ្វើឱ្យបរិស្ថាននៅជុំវិញផ្ទះមានភាពបៃតង។ ដើមឈើហូបផ្លែមួយនេះ ត្រូវបានប្រជាពលរដ្ឋក្នុងតំបន់ដាំដុះតាមគ្នា ជាបន្តបន្ទាប់នៅនជុំវិញគេហដ្ឋាន ដោយសារតែវាងាយស្រួលក្នុងការដាំដុះជាងដើមឈើផ្សេងៗ។
ក្រោយពីមើលឃើញដើមព្រីងមានអត្ថប្រយោជន៍ច្រើន គ្រួសារលោក រស់ កេត និងអ្នកស្រី ហ៊ ឡៅ មានទីតាំងនៅភូមិអង្គរ ឃុំព្រែកផ្ទោល ស្រុកអង្គរបុរី ខេត្តតាកែវ បានសម្រេចចិត្តដាំដើមព្រីងពូជម៉ាឡេស៊ីចំនួនប្រាំបីដើមនៅជុំវិញផ្ទះ ដែលដាំកាលពីឆ្នាំ២០១៦ រហូតមកដល់នេះ បានចូលរួមចំណែកយ៉ាងសំខាន់សម្រាប់សេដ្ឋកិច្ចគ្រួសារ។ តួយ៉ាងនៅក្នុងរយៈពេលបួនប្រាំឆ្នាំកន្លងមកនេះ គ្រួសារកសិករខាងលើមួយនេះរកចំណូលពីការលក់ផ្លែព្រីងស្រស់ និងពីការកែច្នៃផ្លែព្រីងធ្វើជាស្រាព្រីង បានប្រាក់ចន្លោះពីបួនពាន់ដុល្លារ ទៅបួនពាន់ដុល្លារនៅក្នុងមួយឆ្នាំៗ។
លោក រស់ កេត បាននិយាយថា ក្រោយមកមូលហេតុដែលជំរុញឱ្យលោកដំាំដើមព្រីងនៅក្បែរផ្ទះ ក្រៅពីអាចលក់ផ្លែស្រស់ គឺលោកអាចកែច្នៃធ្វើជាស្រា។
លោកលើកឡើងថា កាលពីមុនមិនទាន់មានការនិយមដាំដើមព្រីងពូជពីប្រទេសម៉ាឡេស៊ីច្រើនទេ ដូច្នេះលោកបានយកផ្លែព្រីងពូជក្នុងស្រុកកែច្នៃធ្វើជាស្រា។ ប៉ុន្តែនៅពេលបច្ចុប្បន្ននេះ ពេលព្រីងពូជម៉ាឡេស៊ី ឱ្យផលនៅក្នុងមួយឆ្នាំ ប្រហែលពី១០០ ទៅ២០០គីឡូក្រាម ដែលអាចកែច្នៃធ្វើជាស្រាព្រីង ព្រោះពលរដ្ឋនិយមចូលចិត្តទិញផ្លែព្រីងស្រស់ហូបច្រើនពេក។ ជាក់ស្តែងដើមព្រីងប្រាំបីដើម ដល់រដូវប្រមូលផលចូលមកដល់ក្នុងមួយថ្ងៃអាចលក់ផ្លែព្រីងស្រស់ពី១០គីឡូរហូតដល់៥០គីឡូក្រាម ឬស្មើប្រមាណជាង១០ម៉ឺនរៀលក្នុងមួយថ្ងៃ។
បើតាមកសិករ រស់ កេត, កាលឆ្នាំ២០២៤ តម្លៃផ្លែព្រីងស្រស់មួយគីឡូក្រាម ថ្លៃ១៥ ០០០រៀល តែនៅឆ្នាំ២០២៥នេះ តម្លៃផ្លែព្រីងស្រស់ប្រមាណ១០ ០០០ម៉ឺនរៀល ។ តម្លៃព្រីងធ្លាក់ចុះនេះ ដោយសារតែប្រជាពលរដ្ឋមានការដាំដុះព្រីងពូជម៉ាឡេស៊ីនេះច្រើនពេក។ តែទោះជាយ៉ាងនេះក្តី យោងតាមការលក់ផ្លែព្រីងស្រស់ និងការកែច្នៃព្រីងធ្វើជាស្រាព្រីងអស់រយៈពេលបួនប្រាំឆ្នាំកន្លងមកនេះ ផលិតផលព្រីងបានជួយគ្រួសារលោក រស់ កេត អាចរកចំណូលបានក្នុងមួយឆ្នាំៗប្រមាណបួនទៅប្រាំពាន់ដុល្លារសម្រាប់ផ្គត់ផ្គង់គ្រួសារ ក្រៅពីធ្វើកសិកម្មដាំដំណាំស្រូវនៅតាមរដូវកាល។
លោកបន្តថា “ផ្អែកទៅលើប្រភពចំណូល ដែលទទួលបានពីដំណាំព្រីងនៅពេលកន្លងមកក៏ដូចសព្វថ្ងៃនេះ យើងមានមហិច្ឆិកតាចង់បានចម្ការព្រីងមួយ មានទំហំបួនទៅប្រាំហិកតា នៅថ្ងៃអនាគតសម្រាប់គ្រួសារ ព្រោះតែដំណាំមួយនេះវាងាយស្រួលដាំដុះ និងមិនចាំបាច់ប្រើប្រាស់ជី ថ្នាំបំប៉នដូចដំណាំផ្សេងៗ” ៕
