ខេត្តពោធិ៍សាត់៖ លោក អ៊ា លាត អតីតនិស្សិតជំនាញផ្នែកវិស្វករអគ្គិសនី មានស្រុកកំណើតនៅភូមិស្នំប្រាំពី ឃុំម៉ាក់ប្រាង្គ ស្រុកទឹកឈូ ខេត្តកំពត បានជ្រើសរើសមុខរបរដាំដំណាំល្ហុងជាលក្ខណៈពាណិជ្ជកម្មនៅឆ្នាំ២០១០នៅខេត្តបាត់ដំបងលើផ្ទៃដី១០ហិកតា និងនៅខេត្តពោធិ៍សាត់ចំនួន៤០ហិកតា ក្នុងគោលបំណងដើម្បីផ្គត់ផ្គង់ទីផ្សារក្នុងស្រុក និងដើម្បីកាត់បន្ថយការនាំចូលផ្លែល្ហុងមកពីប្រទេសជិតខាងដូចពេលមុនៗ។
លោក អ៊ា លាត បានរៀបរាប់ថា ដើមចមដំបូងដែលជំរុញឱ្យលោកចាប់យកមុខរបរដាំល្ហុងនេះ គឺផ្តើមចេញពីបងស្រីបង្កើត ជាអ្នកលក់ផ្លែឈើមួយកន្លែងនៅក្រុងភ្នំពេញ នៅពេលដើររកទិញផ្លែល្ហុងជួបតែកន្លែងលក់មានចំនួនតិចតួចមិនដូចអ្វីដែលខ្លួនចង់បាន ទើបធ្វើឱ្យរូបលោក សម្រេចចិត្តដាំល្ហុងដោយខ្លួនឯងនៅឆ្នាំ២០១០ ដើម្បីតម្រូវចិត្តរបស់អតិថិជន និងម្យ៉ាងទៀតដើម្បីកាត់បន្ថយការនាំចូលពីខាងក្រៅមកផ្គត់ផ្គង់ក្នុងប្រទេសកម្ពុជាដូចមុនៗទៀត ក៏ដូចជាដើម្បីផ្តល់ភាពងាយស្រួលដល់ប្រជាពលរដ្ឋបានបរិភោគផ្លែឈើ ដែលដាំដោយកសិករក្នុងស្រុក ដោយជ្រើសរើសទីតាំងដាំដុះនៅខេត្តពោធិ៍សាត់ និងខេត្តបាត់ដំបង។
លោកលើកឡើងថា នៅឆ្នាំដំបូងៗ ការផ្គត់ផ្គង់ផ្លែល្ហុងទៅលើទីផ្សារមានថ្ងៃខ្លះខ្វះ និងមានថ្លៃខ្លះទៀតលើសពីតម្រូវទីផ្សារធ្វើឱ្យសល់ផ្លែល្ហុងច្រើន ហើយបើចង់នាំចេញទៅប្រទេសជិតខាងជួបការលំបាក។ តែទោះបីជាបែបនេះក្តី ក្នុងរយៈពេលជាង១០ឆ្នាំកន្លងមកនេះ លោកសង្កេតឃើញថា ការគាំទ្ររបស់បងប្អូនក្នុងស្រុកហាក់មានសន្ទុះកើនឡើងជាងពេលមុនៗ។
តួយ៉ាងកាលពីមុននៅរាជធានីភ្នំពេញធ្លាប់លក់បានប្រមាណ១០តោនក្នុងមួយថ្ងៃ តែមកដល់សព្វថ្ងៃបានកើនឡើងដល់៣០ទៅ៤០តោនក្នុងមួយថ្ងៃ ។
បើតាមលោក អ៊ា លាត, នៅក្នុងខែមីនា ឆ្នាំ២០២៥នេះ លោកកំពុងតែប្រមូលផលផ្លែល្ហុងទាំងនៅក្នុងខេត្តបាត់ដំបង និងខេត្តពោធិ៍សាត់ ក្នុងមួយថ្ងៃមានពី៤០តោន ទៅ៥០តោន ហើយក្នុងនោះនៅរាជធានីភ្នំពេញមានតម្រូវការច្រើនជាងខេត្តសៀមរាប, ខេត្តព្រះសីហនុ និងខេត្តបាត់ដំបង ហើយផ្អែកលើតម្រូវការបរិភោគផ្លែល្ហុងនៅមានកម្រិត ដូច្នេះលោកចង់ឃើញប្រជាពលរដ្ឋស្វែងយល់អំពីអត្ថប្រយោជន៍នៃផ្លែល្ហុងផងដែរ ព្រោះផ្លែល្ហុងជួយដល់សុខភាព។ ហូបកាន់តែច្រើនវាជួយឱ្យក្រពះពោះវៀនរបស់មនុស្សមានដំណើរការកាន់តែល្អ និងមិនបង្កអាការៈក្តៅខ្លួនដូចការបរិភោគផ្លែឈើផ្សេងៗឡើយ។
លោក អ៊ា លាត បានលើកឡើងទៀត ការវិនិយោគលើមុខរបរដាំអស់រយៈពេល១៥ឆ្នាំនេះ លទ្ធផលដែលទទួលបានវាមិនទាន់បានឆ្លើយតបទៅនិងតម្រូវការនៅឡើយទេ ដោយសារការដាំល្ហុងនៅពេលកន្លងមកអាចប្រមូលផលផ្លែល្ហុងលក់បានចំនួនតិចតួច ហើយបើចង់ធ្វើការនាំចេញទៅប្រទេសថៃជួបការលំបាក។ ដូចនេះលោកចង់បានទីផ្សារមួយដោយមិនពុំចាំបាច់នាំចេញឆ្លងកាត់ប្រទេសទី២ ដូចការនាំចេញរបស់ប្រទេសថៃដែរ។
ពាក់ព័ន្ធនិងការនាំចេញទៅបរទេសនេះ លោក អ៊ា លាត ចង់ឱ្យរាជរដ្ឋាភិបាល ពិសេសមន្ត្រីជំនាញពាក់ព័ន្ធនិងវិស័យកសិកម្មជួយសម្របសម្រួលជាមួយប្រទេសជិតខាង ឬចរចារ ក្នុងលក្ខខណ្ឌណាមួយជាមួយមន្ត្រីជំនាញនៅប្រទេសជិតខាងកម្ពុជា ដើម្បីឱ្យការនាំចេញបានដោយរលូន។ បើអាចធ្វើបែបនេះដូចជួយឱ្យកម្មករចំនួន១០០នាក់ដែលកំពុងធ្វើការនៅក្នុងចម្ការល្ហុងរបស់លោកមានការងារធ្វើជាប់រហូតដោយមិនចាំបាច់ធ្វើចំណាកស្រុក ព្រោះប្រាក់ចំណូលទទួលបានប្រហាក់ប្រហែលទៅធ្វើការក្រៅប្រទេស៕
