ព្យុងយ៉ាង៖ ទូរទស្សន៍មជ្ឈឹមរបស់កូរ៉េខាងជាតិ បានផ្សាយកាលពីថ្ងៃទី១០ ខែកក្កដា ឆ្នាំ២០២៥ នូវរូបភាពប្រជាជនកូរ៉េខាងជើងដើរតាមដងផ្លូវដោយកាន់ឆ័ត្រ ខណៈអក្សរនៅលើអេក្រង់បញ្ជាក់ថា សីតុណ្ហភាពខ្ពស់ និងរលកកម្ដៅកំពុងកើតមានទូទាំងប្រទេស។
គណៈរដ្ឋមន្ត្រីកូរ៉េខាងជើងបានបើកកិច្ចប្រជុំបន្ទាន់ និងចេញសេចក្តីណែនាំលម្អិតអំពីរលកកម្ដៅ បន្ទាប់ពីចំនួនអ្នកស្លាប់ដោយសារជំងឺពាក់ព័ន្ធនឹងកម្ដៅនៅទូទាំងប្រទេស បានកើនលើស១០០នាក់។ ការចេញបទបញ្ជានេះត្រូវបានធ្វើឡើងស្របពេលអាកាសធាតុក្តៅខ្លាំងមិនធ្លាប់មាននៅក្នុងប្រទេសកូរ៉េខាងជើង និងធ្វើឱ្យចំនួនអ្នករងគ្រោះកើនដល់កម្រិតមិនធ្លាប់ជួបប្រទះនាពេលកន្លងមក។
សារព័ត៌មាន ដេលី អិនខេ (Daily NK) កាលពីថ្ងៃទី១៨ ខែសីហា ឆ្នាំ២០២៦នេះថា គណៈរដ្ឋមន្ត្រីបានកោះប្រជុំបន្ទាន់នៅថ្ងៃទី២ ខែសីហា បន្ទាប់ពីចំនួនអ្នកស្លាប់ដោយសារកម្ដៅនៅទូទាំងប្រទេសបានកើនលើស១០០នាក់។ ភ្លាមៗនោះ អាជ្ញាធរបានចេញគោលការណ៍សកម្មភាពលម្អិត ព្រមទាំងវិធានការដើម្បីការពារកុំឱ្យមានអ្នកស្លាប់ថែមទៀត។
សារព័ត៌មានដដែលនេះ បានលើកឡើងថា ក្រសួងការពារគ្រោះមហន្តរាយរបស់កូរ៉េខាងជើង បានដាក់របាយការណ៍ជូនគណៈរដ្ឋមន្ត្រី កាលពីដើមខែសីហានេះ ស្តីពីការខូចខាតដោយសាររលកកម្ដៅនៅទូទាំងប្រទេស ដោយគិតចាប់ពីថ្ងៃទី១ ខែមិថុនា ឆ្នាំ២០២៦ ហូតមកដល់ពាក់កណ្ដាលខែសីហានេះ។ របាយការណ៍បានកត់ត្រាថា មានអ្នកជំងឺ ដោយសាររលកកម្ដៅ មានចំនួនសរុបប្រមាណ៤ ៣០០នាក់ ហើយក្នុងចំណោមនោះ មានមនុស្សប្រហែល១០០នាក់បានស្លាប់។
ដោយសារចំនួនអ្នកស្លាប់បានកើនដល់កម្រិតមិនធ្លាប់មានទូទាំងប្រទេស គណៈរដ្ឋមន្ត្រីកូរ៉េខាងជើង បានកោះប្រជុំបន្ទាន់ និងចេញគោលការណ៍សកម្មភាពចំនួន២០ចំណុច ស្តីពីការទប់ទល់នឹងរលកកម្ដៅទៅកាន់គ្រប់បណ្តាខេត្ត នៅទូទាំងប្រទេស។
គោលការណ៍ណែនាំនេះផ្តោតសំខាន់លើជីវិតប្រចាំថ្ងៃ និងសុវត្ថិភាពនៅកន្លែងធ្វើការ ដោយណែនាំថា ត្រូវស្វែងរកកន្លែងមានម្លប់ក្នុងអំឡុងពេលអាកាសធាតុក្តៅបំផុតនៅពេលថ្ងៃ។ ប្រសិនបើមាននរណាម្នាក់បង្ហាញរោគសញ្ញា ដែលបណ្តាលមកពីរលកកម្ដៅ ត្រូវបញ្ជូនទៅកាន់មន្ទីរពេទ្យជាបន្ទាន់។ មិនត្រូវធ្វើការក្រោមកម្ដៅព្រះអាទិត្យនៅពេលថ្ងៃត្រង់ឡើយ ព្រមទាំងត្រូវផ្គត់ផ្គង់ទឹកកក ឬទឹកត្រជាក់ដល់កសិករ ឬកម្មករ។ ត្រូវផ្លាស់ប្តូរម៉ោងធ្វើការទៅពេលអាកាសធាតុត្រជាក់ ដូចជាពេលព្រឹកព្រលឹម និងពេលល្ងាច ដើម្បីរក្សាប្រសិទ្ធភាពការងារ។
ជាមួយគ្នានេះដែរ គណៈរដ្ឋមន្ត្រីបានព្រមានយ៉ាងតឹងរ៉ឹងថា មិនត្រូវឱ្យមានអ្នកស្លាប់ដោយសាររលកកម្ដៅទៀតឡើយ។ ប៉ុន្តែកម្មករកសិកម្ម និងកម្មករសំណង់ បានប្រតិកម្មយ៉ាងខ្លាំងចំពោះគោលការណ៍ថ្មីនេះ ដោយលើកឡើងថា អាជ្ញាធរបានបង្ខំឱ្យពួកគេបន្តធ្វើការ ទោះបីក្តៅខ្លាំងដល់ស្លាប់ក៏ដោយ ហើយទើបចាប់ផ្តើមដាក់ចេញវិធានការការពារ បន្ទាប់ពីមានមនុស្សស្លាប់រួចទៅហើយ។ អ្វីដែលកម្មករខឹងជាងគេ គឺអាជ្ញាធរបានណែនាំឱ្យពួកគេប្រុងប្រយ័ត្ន ដោយអនុវត្តតាមគោលការណ៍២០ចំណុច ប៉ុន្តែ ជាក់ស្តែងនៅតាមកន្លែងធ្វើការ សូម្បីតែសម្ភារៈវេជ្ជសាស្ត្រសង្គ្រោះបឋម ដូចជា អំបិល និងថ្នាំបន្ថយកម្ដៅក៏មិនសូវមានដែរ។
លើសពីនេះ សូម្បីតែមន្ត្រីតូចតាច ដែលទទួលខុសត្រូវត្រួតពិនិត្យកន្លែងធ្វើការ ក៏បានបង្ហាញពីការមិនពេញចិត្តផងដែរ។ ពួកគេនិយាយថា ថ្នាក់លើមិនបានកាត់បន្ថយកូតាការងារទេ ទោះបីជាបញ្ជាឱ្យពួកគេការពារកុំឱ្យមានអ្នកស្លាប់ថែមទៀតក៏ដោយ។
កាលសប្ដាហ៍មុន កសិករកូរ៉េខាងជើង បានបង្ហាញពីការមិនពេញចិត្ត និងប្តឹងតវ៉ា បន្ទាប់ពីពួកគាត់ត្រូវអនុវត្តតាមបទបញ្ជាផ្ទុយគ្នាពីរ ក្នុងអំឡុងពេលមានរលកកម្តៅឡើងខ្លាំងខុសពីធម្មតា ដែលបទបញ្ជាទីមួយ តម្រូវឱ្យកសិករទប់ស្កាត់ការខូចខាតដំណាំ ចំណែកបទបញ្ជាទីពីរ តម្រូវឱ្យពួកគាត់ការពារកុំឱ្យមានករណីខ្យល់គរគាំងបេះដូង ឬដាច់សរសៃឈាមខួរសា្លប់ ដោយសារសីតុណ្ហភាពក្តៅខ្លាំងពេក។
អាជ្ញាធរកូរ៉េខាងជើងបានចេញសេចក្តីជូនដំណឹងអំពីអាកាសធាតុក្តៅខ្លាំង កាលពីថ្ងៃទី២៩ ខែកក្កដា ឆ្នាំ២០២៦ នៅភាគខាងត្បូងប្រទេស ដោយផ្តោតសំខាន់លើអ្នកធ្វើការក្នុងវិស័យកសិកម្ម។
កសិដ្ឋានត្រូវតែរាយការណ៍ជារៀងរាល់ថ្ងៃ ដោយគ្មានការលើកលែង អំពីការគ្រប់គ្រងទឹកនៅតាមស្រែចម្ការ និងនៅតាមកសិដ្ឋានចិញ្ចឹមត្រី ខណៈសីតុណ្ហភាពនៅពេលថ្ងៃត្រង់ក្នុងតំបន់ទាំងនោះបានឡើងកម្ដៅរហូត៤០អង្សាសេ។ ប៉ុន្តែអាជ្ញាធរបានបង្ខំកសិករឱ្យធ្វើការចាប់តាំងពីព្រលឹមស្រាងៗ ដោយត្រូវរែកទឹក និងយួរទឹកក្នុងធុងដើរចុះឡើងពាសពេញវាលស្រែ។ ដូច្នេះកសិករខ្លះបានដួលសន្លប់ និងធ្លាក់ខ្លួនឈឺជាបន្តបន្ទាប់។
កសិករនិយាយថា អាកាសធាតុអាក្រក់រួចទៅហើយ ប៉ុន្តែបទបញ្ជាដ៏តឹងរ៉ឹង និងប្រព័ន្ធរាយការណ៍អំពីគ្នាឯងនេះ កំពុងតែសម្លាប់មនុស្សថែមទៀត៕ (ផាន់ អាណា)
