ញូវដែលី៖ យោងតាមការព្យករណ៍នាពេលថ្មីៗនេះ បានឱ្យដឹងថា ផលិតកម្មស្រូវពិភពលោកអាចថយចុះប្រាំបួនលានតោន គឺធ្លាក់ចុះពី៥៤៥,៤លានតោន មកនៅត្រឹម៥៣៦,៤លានតោន ក្នុងឆ្នាំទីផ្សារ២០២៦-២០២៧ ខណៈពេលបាតុភូតអែលនីញ៉ូ ដែលអាចមានកម្លាំងខ្លាំង រួមទាំងការឡើងនៃថ្លៃធាតុចូលផលិតកម្ម និងភាពតានតឹងភូមិសាស្ត្រនយោបាយ កំពុងបង្កការគំរាមកំហែងដល់ដំណាំ។
ការព្យាករណ៍របស់ អេសអេនភី គ្លូបល (S&P Global) ដែលជាក្រុមហ៊ុនផ្តល់ព័ត៌មានវិទ្យា វិភាគទិន្នន័យ និងសេវាកម្មហិរញ្ញវត្ថុដ៏ធំបំផុតមួយនៅលើពិភពលោក បានលើកឡើងថា អាកាសធាតុប្រែប្រួលខុសពីធម្មតា កំពុងបង្កផលប៉ះពាល់ដល់ប្រទេសផលិត នាំចេញ និងនាំចូលអង្ករ រួមមាន ឥណ្ឌា ប៉ាគីស្ថាន វៀតណាម ឥណ្ឌូណេស៊ី ចិន ភូមា និងហ្វីលីពីន។
សារព័ត៌មានរបស់ឥណ្ឌាចេញផ្សាយនៅដើមខែសីហា ឆ្នាំ២០២៦ បានដកស្រង់ការលើកឡើងរបស់សហព័ន្ធអ្នកនាំចេញអង្ករឥណ្ឌា ដែលនិយាយថា ប្រទេសទាំងឥណ្ឌាកំពុងប្រឈមនឹងសម្ពាធក្នុងកម្រិតខុសៗគ្នា ពីការរំខានកើតឡើងក្នុងអំឡុងពេលដាំដុះ និងការលូតលាស់របស់ដំណាំស្រូវ ការផ្លាស់ប្តូរផ្ទៃដីដាំដុះ ការព្រួយបារម្ភអំពីការផ្គត់ផ្គង់ទឹក និងការកើនឡើងនៃថ្លៃដើមផលិត។
របាយការណ៍បាននិយាយថា បាតុភូតអែលនីញ៉ូ ដែលអូសបន្លាយពេលយូរ និងកាន់តែខ្លាំងឡើង រួមជាមួយនឹងការឡើងថ្លៃជី ប្រេងឥន្ធនៈ និងថ្លៃដឹកជញ្ជូន ដែលពាក់ព័ន្ធនឹងសង្គ្រាមក្នុងតំបន់មជ្ឈិមបូព៌ា ក៏កំពុងបង្កើតបរិយាកាសមិនល្អថែមទៀតសម្រាប់ទីផ្សារអង្ករពិភពលោក។
យោងតាមសេចក្តីប្រកាសព័ត៌មានរបស់មជ្ឈមណ្ឌលព្យាករណ៍អាកាសធាតុនៃរដ្ឋបាលជាតិមហាសមុទ្រ និងបរិយាកាសរបស់សហរដ្ឋអាម៉េរិក បានព្យាករណ៍គិតត្រឹមខែកក្កដា ឆ្នាំ២០២៦ថា មានលទ្ធិភាព៩៧ភាគរយ ដែលបាតុភូតអែលនីញ៉ូនឹងបន្តអូសបន្លាយរហូតដល់ដើមឆ្នាំ២០២៧។ សេចក្តីប្រកាសនេះក៏បង្ហាញថា មានលទ្ធភាពរហូត៨១ភាគរយ ដែលបាតុភូតនេះនឹងក្លាយជាបាតុភូតមហាអែលនីញ៉ូ ក្នុងអំឡុងខែតុលា និងធ្នូ ឆ្នាំ២០២៦។
របាយការណ៍រំពឹងថា បាតុភូតអែលនីញ៉ូនឹងបន្តអូសបន្លាយរហូតដល់ខែមេសា ឆ្នាំ២០២៧ ដូច្នេះតំបន់ដាំស្រូវសំខាន់ៗអាចប្រឈមនឹងអាកាសធាតុមិនអំណោយផល ក្នុងអំឡុងពេលដាំដុះ និងការលូតលាស់របស់ដំណាំស្រូ។ ចំណែកថ្លៃធាតុចូលផលិតកម្មកាន់តែខ្ពស់ ក៏អាចប៉ះពាល់ដល់ការសម្រេចចិត្តរបស់កសិករអំពីការដាំដុះផងដែរ ជាពិសេសនៅទូទាំងទ្វីបអាស៊ី។
រីឯការនាំចេញ និងស្តុកអង្ករវិញ ទោះបីផលិតកម្មត្រូវបានព្យាករណ៍ថា នឹងធ្លាក់ចុះក៏ដោយ ការនាំចេញអង្ករពិភពលោកអាចមានស្ថិរភាពក្នុងកម្រិតមួយ ដោយសារមានស្តុកសល់ច្រើនពីឆ្នាំទីផ្សារ២០២៥–២០២៦។ ទោះជាយ៉ាងណា តម្រូវការនាំចូលអង្ករលើពិភពលោកត្រូវបានព្យាករណ៍ថា នឹងកើនឡើងជិត៤លានតោន ដល់៥៩,៧លានតោន ដោយសារប្រទេសផ្សេងៗចង់ធានាការផ្គត់ផ្គង់ទុកជាមុន ដើម្បីទប់ទល់នឹងការរំខាន ដែលអាចកើតមានចំពោះការប្រមូលផល។
ជាលទ្ធផល សមាមាត្រស្តុកអង្ករធៀបនឹងការប្រើប្រាស់ (Stock-to-use ratio) នៅលើពិភពលោក ត្រូវបានព្យាករណ៍ថា នឹងធ្លាក់ចុះមកនៅ ៣៦ភាគរយ។
ទោះបីសមាមាត្រនេះស្ថិតក្នុងកម្រិតអាចជឿទុកចិត្តបាន បើប្រៀបធៀបនឹងស្តង់ដារប្រវត្តិសាស្ត្រក៏ដោយ របាយការណ៍បានព្រមានថា ស្ថានភាពនេះត្រូវការការតាមដានយ៉ាងដិតដល់។ តម្លៃអង្ករនៅតាមបណ្តាប្រទេសនាំចេញធំៗ ក៏បានចាប់ផ្តើមបង្ហាញពីក្តីព្រួយបារម្ភអំពីហានិភ័យអាកាសធាតុ និងការធ្លាក់ចុះនៃតុល្យភាពរវាងការផ្គត់ផ្គង់ និងតម្រូវការអង្ករលើពិភពលោក។
គេរំពឹងថា ក្រុមអេសអេនភី គ្លូបល នឹងបង្ហាញការវាយតម្លៃលម្អិតអំពីផលិតកម្ម ការប្រើប្រាស់ ពាណិជ្ជកម្ម ស្តុក និងតម្លៃអង្ករលើពិភពលោក នៅក្នុងសន្និសីទស្តីពីអង្ករអន្តរជាតិ ឆ្នាំ២០២៦ ដែលគ្រោងរៀបចំមានរយៈពេលបីថ្ងៃ ដោយចាប់ផ្តើមពីថ្ងៃទី២៣ ដល់ទី២៥ ខែតុលា នៅទីក្រុងញូវដែលី ប្រទេសឥណ្ឌា។
ការវាយតម្លៃនេះក៏នឹងពិនិត្យមើលថា តើប្រទេសណាខ្លះប្រឈមនឹងហានិភ័យខ្ពស់បំផុតចំពោះការផ្គត់ផ្គង់;
ទីផ្សារណាអាចក្លាយជាអ្នកនាំចូលធំៗ និលំហូរពាណិជ្ជកម្មអង្ករបែបប្រពៃណី អាចផ្លាស់ប្តូរយ៉ាងដូចម្តេចក្នុងរយៈពេលមួយឆ្នាំខាងមុខ៕ (ផាន់ អាណា)
