ដោយ អៀវ ឈៀងនី
ភ្នំពេញ៖ សព្វថ្ងៃនេះ ផលិតផលខ្មែរដែលកែច្នៃ ឬផលិតចេញពីទិន្នផលកសិកម្មកំពុងមានវត្តមានយ៉ាងសកម្ម និងទទួលបានការគាំទ្រយ៉ាងខ្លាំងនៅលើទីផ្សារកម្ពុជា ទាំងផ្សារទំនើប ផ្សារប្រពៃណី និងផ្សារអនឡាញ។
យោងតាមក្រសួងពាណិជ្ជកម្ម បានឱ្យដឹងថា តាមរយៈយុទ្ធនាការផលិតផលជាតិ រហូតមកទល់ពេលនេះ ការកែច្នៃកសិផល និងផលិតផលនៅកម្ពុជា ក្រោមការសម្របសម្រួលពីក្រសួងពាណិជ្ជកម្ម បានធ្វើឱ្យផលិតផលខ្មែរជាច្រើនប្រភេទបន្តចូលទៅក្នុងផ្សារទំនើប ម៉ាត និងមីនីម៉ាត នៅទូទាំងប្រទេសមានចំនួនជាង៧០០ទីតាំង។
ផលិតផលខ្មែរភាគច្រើនត្រូវផលិតចេញពីផលិតផលកសិកម្ម មានដូចជាផលិតផលវារីវប្បកម្ម គ្រឿងសមុទ្រ និងត្រីទឹកសាប មានត្រីងៀត ត្រីឆ្អើរ ប្រហុក ផ្អក ម៉ាំ។ លើសពីនេះ ដំណាំដាំដុះ ដូចជាស្រូវអង្ករ ជាប្រភពធំជាងគេ ដែលបង្កើតបានជាផលិតផលខ្មែររាប់រយមុខ ដូចជា៖ អង្ករផ្ការំដួល អង្ករសែនក្រអូប អង្ករសម្រូប និងអង្ករសរីរាង្គផ្សេងៗ។ បន្ថែមពីនេះ មានគ្រឿងទេស និងឱសថបុរាណដូចជា៖ ម្រេចកំពត (ម៉ត់ គ្រាប់ ជ្រក់) ខ្ញី រំដេង ស្លឹកគ្រៃ រមៀត និងតែស្លឹកគ្រៃ/តែផ្កាឈូក រួមទាំងការកែច្នៃផ្លែឈើស្រស់ និងបន្លែជាដើម។
ការគាំទ្រផលិតផលជាតិបានរួមចំណែកកាត់បន្ថយការនាំចូល បង្កើនការផលិតក្នុងស្រុក ពង្រីកការចែកចាយ បំផុសផ្នត់គំនិតអ្នកប្រើប្រាស់ ដោយជឿជាក់ថា មិនយូរទេប្រទេសកម្ពុជានឹងមានផលិតផលខ្លួនឯងនៅលើប្រទេសខ្លួនឯង ជំនួសឱ្យផលិតនាំចូលជាក់ជាមិនខាន។
យុទ្ធនាការផលិតផលជាតិ ម៉េត អ៊ីន ខេមបូឌា (Made in Cambodia )គឺជាយុទ្ធនាការលើកកម្ពស់ផលិតផលក្នុងស្រុក និងការនាំចេញផលិតផលជាតិ នៅនឹងកន្លែង ដើម្បីបង្ហាញពីការស្រទ្បាញ់ផលិតផលជាតិ ទឹកចិត្តនៃក្តីស្រទ្បាញ់ចំពោះកសិករខ្មែរនិងផលិតករខ្មែរ និងស្មារតីស្រទ្បាញ់ជាតិមាតុភូមិ។
ដើម្បីជំរុញផលិតផលខ្មែរ ក្រសួងពាណិជ្ជកម្មក៏បានបង្កើតផ្សារផលិតផលខ្មែរ ដើម្បីជួយគាំទ្រ និងពង្រីកបណ្តាញទីផ្សារសម្រាប់កសិករ បង្កើនការលក់ បង្កើនប្រាក់ចំណូល និងលើកកម្ពស់ជីវភាពរបស់ប្រជាកសិករ និងផលិតករ។ ការគាំទ្រ និងការប្រើផលិតផលខ្មែរ គឺជាការរួមចំណែកលើកកម្ពស់ផលិតកម្មក្នុងស្រុក បង្កើនប្រាក់ចំណូលប្រជាពលរដ្ឋ និងរួមចំណែកដល់ការអភិវឌ្ឍសេដ្ឋកិច្ច-សង្គមជាតិ។
យុទ្ធនាការផលិតផលជាតិ ត្រូវបានរៀបចំឡើងរយៈពេលមួយសប្តាហ៍ក្នុងមួយខែ និងមានរយៈពេលពេញមួយឆ្នាំ ក្នុងគោលបំណងបង្ហាញ និងផ្សព្វផ្សាយផលិតផលជាតិ ឱ្យមានភាពលេចធ្លោ ហើយក៏ជាឱកាសជំរុញការដាក់លក់ផលិតផលក្នុងស្រុក នៅតាមបណ្តាផ្សារទំនើប ម៉ាត និងមីនីម៉ាតទូទាំងប្រទេស៕
