ណាហ្គាសាគី៖ សន្និសីទអន្តរជាតិជាបន្តបន្ទាប់ ដើម្បីពិភាក្សាអំពីការគ្រប់គ្រងចំណែគត្រីធូណាខៀវ នៅមហាសមុទ្រប៉ាស៊ីហ្វិក បានបញ្ចប់នៅទីក្រុងណាហ្គាសាគី ប្រទេសជប៉ុន កាលពីថ្ងៃទី១៤ ខែកក្កដា ឆ្នាំ២០២៦ ដោយមិនបានឯកភាពតាមសំណើរបស់ជប៉ុន ក្នុងការពង្រីកកូតាចាប់ត្រីធំៗ ដោយសារតែការប្រឆាំងរបស់ម៉ិកស៊ិក។
ប្រទេសជប៉ុនបានស្នើឱ្យបង្កើនកូតាចាប់ត្រីធូណាខៀវ ដែលមានទម្ងន់៣០គីឡូក្រាម ឬច្រើនជាងនេះ នៅភាគខាងលិច និងកណ្តាលមហាសមុទ្រប៉ាស៊ីហ្វិកជពី១១ ៨៦៩តោន នាពេលបច្ចុប្បន្ន កើនឡើងដល់១៤ ៨៣៦តោន សម្រាប់ឆ្នាំ២០២៧ និងលើសពីនេះ ដោយកាត់បន្ថយកូតាត្រីតូចៗពី៥ ១២៥តោន មកនៅត្រឹម៤ ៨២៣តោន។
នៅថ្ងៃចុងក្រោយនៃសន្និសីទ ប្រទេសម៉ិកស៊ិកស្រាប់តែអំពាវនាវឱ្យបង្កើនកូតាសម្រាប់ខ្លួនចាប់ត្រីធូណាខៀវ នៅក្នុងមហាសមុទ្រប៉ាស៊ីហ្វិកខាងកើត និងប្រឆាំងនឹងសេចក្តីព្រាងកិច្ចព្រមព្រៀងរបស់ជប៉ុន។
នៅពេលនេះ ប្រទេសជប៉ុននឹងរៀបចំកិច្ចពិភាក្សាម្តងទៀត នៅចុងខែសីហា ឆ្នាំ២០២៦ ស្តីពីកូតាចាប់ត្រីធូណាខៀវ នៅតំបន់មហាសមុទ្រប៉ាស៊ីហ្វិកខាងកើត និងខាងលិច ដោយមានការចូលរួមពីគណៈកម្មការអន្តរអាមេរិកត្រូពិច ដែលរួមមានប្រទេសម៉ិកស៊ិក សហរដ្ឋអាម៉េរិក និងគណៈកម្មការគ្រប់គ្រងតំបន់ប៉ាស៊ីហ្វិកខាងកើត។
ទោះបីជាយ៉ាងណាក៏ដោយ ការចរចាដ៏តឹងតែងត្រូវបានគេរំពឹងថា នឹងមិនមានឯកភាពលើកិច្ចព្រមព្រៀងណាមួយឡើយ ដូច្នេះ កូតាបច្ចុប្បន្ននឹងត្រូវទុកឱ្យនៅដដែល។
នៅក្នុងដែនទឹកនេសាទរបស់ប្រទេសជប៉ុន ស្តុកត្រីធូណាខៀវនៅឆ្នាំ២០២៦នេះ បានកើនឡើងយ៉ាងខ្លាំង ប៉ុន្តែទោះបីជាយ៉ាងណាក៏ដោយ អ្នកនេសាទជប៉ុនមិនបានចាប់ត្រីឱ្យលើសពីកូតាកំណត់ ដោយបង្ខំចិត្តដោះលែងត្រីមួយចំនួន ចូលទៅក្នុងសមុទ្រវិញ និងផ្អាកការនេសាទរបស់ខ្លួន ព្រោះខ្លាចច្រើនកូតាកំណត់។
ស្តុកត្រីធូណាខៀវ ក្នុងមហាសមុទ្រប៉ាស៊ីហ្វិក បានធ្លាក់ចុះមកត្រឹម១២ ២៧៥តោន ក្នុងឆ្នាំ២០១០ ដោយសារការនេសាទហួសកម្រិត ប៉ុន្តែបានស្ទុះងើបឡើងវិញ គឺកើនដល់១៤៤ ៤៨៣តោន ក្នុងឆ្នាំ២០២២។ ការស្ទុះងើបឡើងវិញនៃចំនួនត្រីធូណាខៀវនេះ ក៏កំពុងប៉ះពាល់ដល់ការនេសាទត្រីកាម៉ុង និងត្រីតូចៗផ្សេងទៀតផងដែរ ព្រោះត្រីធូណាខៀវធំ តែងតែដេញខាំស៊ីត្រីតូចៗជាចំណីរបស់វា។
កាលពីដើមសប្តាហ៍មុន អ្នកនេសាទជប៉ុនចាប់ត្រីធូណាខៀវធំៗបានយ៉ាងច្រើន នៅក្នុងដែនទឹកនេសាទរបស់ខ្លួន បន្ទាប់រត្រីដ៏កម្រនេះ បានបន្លាស់ទីគេចេញពីទឹកសមុទ្រឡើងកម្តៅ។
ចាប់ពីខែឧសភា ឆ្នាំ២០២៦នេះ អ្នកនេសាទជប៉ុនបានកត់សម្គាល់ឃើញថា វត្តមានត្រីធូណាខៀវយ៉ាងច្រើន នៅឆ្នេរសមុទ្រប៉ាស៊ីហ្វិកភាគខាងជើងនៃកោះហុកកៃដូរបស់ប្រទេសជប៉ុន។
ត្រីធូណាខៀវដ៏មានតម្លៃសម្រាប់ធ្វើម្ហូបស៊ូស៊ីរបស់ជប៉ុន បានចូលកកកុញពេញសំណាញ់ ប៉ុន្តែអ្នកនេសាទជប៉ុនលែងពួកវាទៅវិញ ព្រោះច្រើនលើសតម្រូវការ។
ប្រទេសជប៉ុនមានកូតាចាប់ត្រីធូណាខៀវប្រចាំឆ្នាំ ហើយប្រសិនបើអ្នកនេសាទជប៉ុនហ៊ានរក្សាទុកត្រីនេសាទបានទាំងអស់នោះ ពួកគាត់នឹងមិនមានកូតានៅសល់សម្រាប់នេសាទត្រីធូណានៅរដូវត្រជាក់បានទៀតឡើយ ជាពិសេសនៅពេលត្រីធូណាពណ៌ខៀវសម្បូរជាតិខ្លាញ់ មានរសជាតិឆ្ងាញ់ និងទទួលបានតម្លៃខ្ពស់នៅលើទីផ្សារ។
ក្រុមអ្នកជំនាញផ្នែកធនធានជលផលសមុទ្ររបស់ប្រទេសជប៉ុន បានពណ៌នាថា មូលហេតុអ្នកនេសាទជប៉ុនអាចចាប់ត្រីធូណាខៀវបានច្រើន ដោយការប្រែប្រួលអាកាសធាតុ ជាពិសេស បាតុភូតអែលនីញ៉ូ បានធ្វើឱ្យទម្រង់ទឹកសមុទ្រប្រែប្រួលឡើងកម្ដៅនៅក្នុងមហាសមុទ្រប៉ាស៊ីហ្វិក ដូច្នេះទើបហ្វូងត្រីធូណាខៀវទាំងនេះផ្លាស់ទីទៅរកតំបន់មានទឹកត្រជាក់ ដូចជានៅភាគខាងជើងប្រទេសជប៉ុនជាដើម។
បាតុភូតអែលនីញ៉ូផ្លាស់ប្តូរចរន្តទឹកក្នុងមហាសមុទ្រ និងធ្វើឱ្យតំបន់ប៉ាស៊ីហ្វិកខាងលិចកក់ក្តៅ ដោយផ្លាស់ប្តូរផ្លូវចំណាកស្រុក និងជំរុញឱ្យត្រីធូណាខៀវក្នុងមហាសមុទ្រប៉ាស៊ីហ្វិក សម្រុកចូលទៅក្នុងដែនទឹកជប៉ុន។ ដូច្នេះបង្កឱ្យមានត្រីធូណាយ៉ាងច្រើនកកកុញ ដែលមិននឹកស្មានដល់នៅក្នុងដែនទឹកជប៉ុន៕ (ផាន់ អាណា)
