ភ្នំពេញ៖ រយៈពេល៩ខែឆ្នាំ២០២៤នេះ កម្ពុជាបាននាំចេញដំឡូងមីស្រស់ចំនួន ២ ៤៥៨ ៣៦០ តោនកើន ១៦២,៥៣% ធៀបនិងរយៈពេលដូចគ្នាកាលពីឆ្នាំមុន នេះបើយោងតាមរបាយការណ៍ពីអគ្គនាយកដ្ឋានកសិកម្មនៃក្រសួងកសិកម្មរុក្ខាប្រមាញ់ និងនេសាទ កាលពី ថ្ងៃទី២២ខែតុលានេះ។
យោងតាមរបាយការណ៍បង្ហាញថា ការនាំចេញមានវិញ្ញាបនបត្រភូតគាមអនាម័យសម្រេចបាន ដំឡូងមីស្រស់ចំនួន ២ ៤៥៨ ៣៦០ តោន កើនឡើង ១៦២,៥៣ភាគរយ ចំណិតដំឡូងមីក្រៀមចំនួន ៨៦០ ០៤៧ តោន ថតចុះ ១២,៥៤ភាគរយ ផ្ទៃដីដាំដុះមានប្រមាណ៧០ម៉ឺនហិកតា។
ឯកឧត្តម វ៉ា រុតសាន រដ្ឋលេខាធិការក្រសួងពាណិជ្ជកម្មបានថ្លែងបញ្ជាក់ថា នៅឆ្នាំ២០២៤នេះតម្លៃដំឡូងមីមិនសូវល្អនោះទេ ហើយជាទូទៅតម្លៃល្អគឺ ចាប់ពីខែវិច្ឆិការទៅ ហើយចំណែក គោលនយោបាយយើង គឺពិតណាស់ យើងចង់ឲ្យមានការវិនិយោគកែច្នៃទៅជាម្សៅដំឡូមីដើម្បីនាំចេញ។
សម្រាប់ លោក អិល ឆឹង ប្រធានសមាគមកសិករដំឡូងមីខ្មែរបានថ្លែងថា ដំឡូងមីយើង ទីផ្សារធំជាងគេលក់ឲ្យថៃនិងវៀតណាម ហើយទីផ្សារឡើងចុះមិនមានស្ថេរភាពទេ សមាជិកសមាគមមានចំនួន៣៧០០ នាក់នៅ១៧ខេត្តទូទាំងប្រទេស កំពុងតែដាកំដុះលើផ្ទៃដី ជាង ៨ពាន់ហិកតា ឆ្នាំនេះដោយសារតែទីផ្សារមិនល្អចាប់ពីខែ៤មករហូតដល់ខែសីហានេះហើយកន្លងមកយើងមានរោងចក្រច្រើនរហូតដល់១០ តែអត់ដំណើរការ ប៉ុន្តែដំណើរការបានតែ២ឬ៣នោះទេ ។
សម្រាប់ លោក អិល ឆឹង លើកឡើងថា ក្នុងមួយឆ្នាំកសិករផលិតបានចន្លោះពី ១២លាន ទៅ១៣ លានតោនដំឡូងស្រស់ ហើយចំណែក គោកនយោបាយដំឡូងមីនេះគឺ កសិករចង់បានស្ថេរភាពតម្លៃ ក៏ដូចជាចង់ឲ្យមានក្រុមហ៊ុនវិនិយោគច្រើនក្នុងស្រុក ដើម្បីកែច្នៃដំឡូងមីស្រស់ទៅជាស្ងួត ដើម្បីនាំចេញទៅចិន ជប៉ុន និងបណ្តាប្រទេសផ្សេងទៀត។
បន្ថែមពីនេះ តំណាងកសិករដំឡូងមី ស្នើសុំឲ្យរដ្ឋាគិតគួរជំរុញរឿងទម្លាក់ទុនជាចម្បង សម្រាប់ប្រមូលទិញ កែច្នៃដំឡូងមីស្រស់ ហើយបើមានអ្នកវិនិយោគប្រមូលទិញស្តុកទុក និងរោងចក្រកែច្នៃនឹងជួយតម្លៃកើនឡើង។ដោយឡែក ទិន្នផលដំឡូងមី ១៣ លានតោន គឺ ៣០ភាគរយទេ ប្រើប្រាស់ក្នុងស្រុក ក្នុងនោះនាំចេញដំឡូងមីស្រស់ៗនាំចេញទៅប្រទេសជិតខាងទាំងអស់។
សព្វថ្ងៃនេះ ទីផ្សារដំឡូងមីនៅក្នុងខែសីហានេះ មានតម្លៃ ២៣០រៀល ក្នុង១គីឡូក្រាម អាស្រ័យលើស្ថានភាពទឹកភ្លៀង បើភ្លៀងខ្លាំងនឹងចុះតម្លៃ តែបើសិនជាមេឃរាំងវិញនឹងមានតម្លៃល្អ។ គោលការណ៍ទី១ កសិករមានវិធីសាស្រ្តនៅឆ្នាំ២០២៤ ការដំាដុះចាប់ផ្តើម កាត់បន្ថយដី បង្កើនជី នឹងទទួលបានផលច្រើនដោយការចំណាយតិចជាងកាលពីមុន។
បើរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ បង្ហាញថា នៅឆ្នាំ២០២៣ កម្ពុជានាំចេញដំឡូងមីស្រស់ ដំឡូមីក្រៀម និងម្សៅដំឡូងមី សរុបជាង ៣លានតោន។ រយៈពេល១២ខែ ឆ្នាំ២០២៣ កម្ពុជាបាននាំចេញ ចំណិតដំឡូងមីក្រៀមមានចំនួន ១ ២៨៩ ៧៣៩.០៤តោន ធ្លាក់ចុះ ៣៧.៦៤%, នាំចេញដំឡូងមីស្រស់មានចំនួន ១ ៩៦១ ៣៧៥ តោន កើនឡើង ២៦.៥១%, នាំចេញម្សៅដំឡូងមីមានចំនួន៣៦ ២៥៦.៨០តោន ធ្លាក់ចុះ៤៥.៣៩% និងនាំចេញកាកសំណល់ដំឡូងមី មានចំនួន ៧៤ ៧៩៦ តោន កើនឡើងចំនួន ៧៥.៣១%។
សម្រាប់តម្លៃដំឡូងមីនៅចុងឆ្នាំ២០២៣ និងដើមឆ្នាំ២០២៤ នៅរក្សាបានតម្លៃល្អប្រសើរក្នុងចន្លោះ៣៥០-៣៨០រៀលក្នុងមួយគីឡូក្រាម ចំពោះដំឡូងមីស្រស់ ចំណែកដំឡូងមីក្រៀមចន្លោះ៧០០-៨០០រៀលក្នុងមួយគីឡូក្រាម ដែលជាតម្លៃប្រជាកសិករទទួលយកបាន។
