អន្តរជាតិ៖ យោងតាមការចេញផ្សាយអំពីការព្យាករណ៍ បានឱ្យដឹងជាបន្តបន្ទាប់ថា ប្រទេសដែលអាចរងផលប៉ះពាល់ខ្លាំងបំផុតពីការបង្កើនឥទ្ធិពលបាតុភូតមហាអែលនីញ៉ូ (Super El Nino) នៅឆ្នាំ២០២៦ ត្រូវបានប្រមូលផ្តុំ នៅទូទាំងទ្វីបអាស៊ីអាគ្នេយ៍ អាស៊ីខាងត្បូង អាហ្វ្រិកខាងត្បូង អាម៉េរិកកណ្តាល និងអាម៉េរិកខាងត្បូង។
យោងតាមការវាយតម្លៃរបស់ភ្នាក់ងារផ្តល់ព័ត៌មានមនុស្សធម៌អន្តរជាតិ (ReliefWeb) ដែលប្រភពអាចជឿទុកចិត្តបានដ និងភ្នាក់ងាររបស់អង្គការសហប្រជាជាតិ (United Nations) បានឱ្យដឹងថា តំបន់ទាំងនេះអាចប្រឈមនឹងភាពខុសប្រក្រតីនៃអាកាសធាតុធ្ងន់ធ្ងរជាងគេ ដែលប្រទាក់ក្រឡាជាមួយភាពងាយរងគ្រោះផ្នែកសេដ្ឋកិច្ច។
ប្រទេសក្នុងទ្វីបអាស៊ីអាគ្នេយ៍ និងអាស៊ីខាងត្បូង ជួបប្រទះនឹងរលកកម្ដៅ និងគ្រោះរាំងស្ងួតធ្ងន់ធ្ងរ (Severe Heat & Drought)។ ការផ្លាស់ប្តូរដ៏ធំមួយនៅក្នុងសំណើមនៃមហាសមុទ្រប៉ាស៊ីហ្វិក កំពុងធ្វើឱ្យរបបទឹកភ្លៀងមូសុងវស្សាប្រែប្រួល ហើយបង្កឱ្យមានបញ្ហាសន្តិសុខស្បៀង សុខភាពមនុស្ស និងបណ្តាញអគ្គិសនី។
ប្រទេសវៀតណាម និងថៃ អាចប្រឈមនឹងរលកកម្ដៅខ្លាំង និងកង្វះទឹកធ្ងន់ធ្ងរជាងគេ។ យោងតាមការវាយតម្លៃរបអំពីក្របខ័ណ្ឌហានិភ័យកម្ដៅរបស់សាកលវិទ្យាល័យ អុក្សហ្វឺត (Oxford University) របស់ប្រទេសអង់គ្លេស បានចាត់ថ្នាក់ទីក្រុងហូជីមិញ និងទីក្រុងបាងកក ជាទីក្រុងអាចមានហានិភ័យខ្ពស់បំផុត នៅលើពិភពលោក ដោយសារសំណើមរួមបញ្ចូលគ្នា និងដង់ស៊ីតេមនុស្សក្នុងទីក្រុង។
ប្រទេសហ្វីលីពីន និងប្រទេសឥណ្ឌូណេស៊ី អាចប្រឈមមុខនឹងគ្រោះរាំងស្ងួតដ៏ខ្លាំងក្លា អូសបន្លាយពេលយូរ ការបាត់បង់ធនធានទឹក និងហានិភ័យខ្ពស់នៃភ្លើងឆេះព្រៃក្នុងទ្រង់ទ្រាយធំៗ។
ប្រទេសឥណ្ឌា ប៉ាគីស្ថាន និងប្រទេសបង់ក្លាដែស អាចទទួលរងការគំរាមកំហែងដោយខ្យល់មូសុងរដូវក្តៅ ដែលចុះខ្សោយខ្លាំង រហូតបណ្តាលឱ្យមានគ្រោះភាពរាំងស្ងួតយ៉ាងឆាប់រហ័ស ដែលប៉ះពាល់ដោយផ្ទាល់ដល់សេដ្ឋកិច្ចកសិកម្មក្នុងស្រុក។
វិបត្តិមនុស្សធម៌នៅតំបន់អនុសាហារ៉ានៃទ្វីបអាហ្វ្រិក (Sub-Saharan Africa) កំពុងធ្លាក់ចូលក្នុងសភាពធ្ងន់ធ្ងរជាបន្តបន្ទាប់ ដោយសារការរួមបញ្ចូលគ្នានៃជម្លោះប្រដាប់អាវុធ ការប្រែប្រួលអាកាសធាតុ ដូចជាគ្រោះរាំងស្ងួត និងទឹកជំនន់ធ្ងន់ធ្ងរ) និងបញ្ហារខ្វះខាតស្បៀងអាហារ។ តំបន់នេះត្រូវការជំនួយសង្គ្រោះធំបំផុតនៅលើពិភពលោក។
អង្គការស្បៀងអាហារ និងកសិកម្មរបស់អង្គការសហប្រជាជាតិ (Food and Agriculture Organization) បានកំណត់ទ្វីបអាហ្វ្រិកជាតំបន់គួរឱ្យព្រួយបារម្ភបំផុត ដោយសារគ្រោះមហន្តរាយអាកាសធាតុ រួមជាមួយជម្លោះប្រដាប់អាវុធ។
ប្រទេសស៊ូដង់ ស៊ូដង់ខាងត្បូង និងប្រទេសសូម៉ាលី ត្រូវបានកំណត់ជាការព្រមានអំពីវិបត្តិមនុស្សធម៌ធ្ងន់ធ្ងរបំផុតនៅទូទាំងពិភពលោក ស្របពេលបញ្ហាបរិស្ថាន ដែលបណ្ដាលមកពីបាតុភូតមហាអែលនីណូ ធ្វើឱ្យមានការផ្លាស់ទីលំនៅជាទ្រង់ទ្រាយធំ និងជួបស្ថានភាពអត់ឃ្លានកាន់តែធ្ងន់ធ្ងរ។
ប្រទេសអេត្យូពី និងប្រទេសកេនយ៉ា រងការបំផ្លិចបំផ្លាញដោយលក្ខខណ្ឌងាយរងគ្រោះខ្លាំងជាងគេ រាប់ចាប់ពីគ្រោះរាំងស្ងួតបំផ្លាញផលដំណាំធ្ងន់ធ្ងរ រហូតដល់គ្រោះទឹកជំនន់ភ្លាមៗ។
ប្រទេសម៉ូហ្សំប៊ិក ម៉ាដាហ្គាស្ការ ហ្ស៊ីមបាវ៉េ និងប្រទេសម៉ាឡាវី ងាយជួបគ្រោះរាំងស្ងួតខ្លាំង ព្រមទាំងមានព្យុះស៊ីក្លូនបោកបក់យ៉ាងខ្លាំងមកលើតំបន់អាហ្វ្រិកខាងត្បូង។
ប្រទេសក្នុងតំបន់អាម៉េរិកកណ្តាល និងអាម៉េរិកខាងត្បូង ជួបគ្រោះទឹកជំនន់ គ្រោះរាំងស្ងួត និងកង្វះថាមពល។ ការឡើងកម្ដៅនៃមហាសមុទ្រប៉ាស៊ីហ្វិក បានផ្លាស់ប្តូរអាកាសធាតុនៅទូទាំងអាម៉េរិកឡាទីន ដែលគំរាមកំហែងលើវិស័យកសិកម្ម និងហេដ្ឋារចនាសម្ព័ន្ធ។
ប្រទេសប៉េរូ និងប្រទេសអេក្វាឌ័រ គឺជាចំណុចកណ្តាលនៃបាតុភូតមហាអែលនីញ៉ូ ព្រោះប្រទេសជាប់មាត់សមុទ្រទាំងពីរនេះ ប្រឈមនឹងភ្លៀងធ្លាក់ខ្លាំង ការបំផ្លាញហេដ្ឋារចនាសម្ព័ន្ធយ៉ាងធ្ងន់ធ្ងរ និងទឹកជំនន់រីករាលដាល។
ប្រទេសកូឡុំប៊ី និងប្រទេសវេណេហ្ស៊ុយអេឡា អាចជួបបញ្ហាកង្វះទឹកភ្លៀងធ្ងន់ធ្ងរ គំរាមកំហែងដោយផ្ទាល់ដល់ការផលិតថាមពលវារីអគ្គិសនី ធ្វើឱ្យហានិភ័យនៃការដាច់ចរន្តអគ្គិសនីទូទាំងប្រទេស។
ប្រទេសហ្គាតេម៉ាឡា ហុងឌូរ៉ាស និងប្រទេសហៃទី រងផលប៉ះពាល់យ៉ាងធ្ងន់ធ្ងរដោយគ្រោះរាំងស្ងួត (Dry Corridor) ដែលបានបំផ្លាញដំណាំសំខាន់ៗ បង្កឱ្យមានកង្វះអាហារូបត្ថម្ភធ្ងន់ធ្ងរ និងវិបត្តិសេដ្ឋកិច្ចសង្គម ដែលមានស្រាប់។
ចំណែកប្រទេសប៉ាណាម៉ា រងសម្ពាធទឹកខ្លាំង កប៉ាល់ដឹកអ្នកដំណើរពិបាកឆ្លងកាត់ព្រែកជីកប៉ាណាម៉ា៕ (ផាន់ អាណា)
