ដោយ ឡុង សារេត
បាត់ដំបង៖ ដំណាំស្រូវនៅលើផ្ទៃដី ជាង១៨ពាន់ហិកតា ស្ថិតនៅក្នុងស្រុកឯកភ្នំ និងស្រុក សង្កែ ខេត្តបាត់ដំបង បាននិងកំពុងរងការខូចខាត ចំណែកកសិករបាននិងកំពុងរង់ចាំមើលអាជ្ញាធរពាក់ព័ន្ធចូលរួមធ្វើអន្តរាគមន៍ជួយសង្គ្រោះ តាមរយៈនាំទឹកពីតំបន់ផ្សេងមកចាក់បញ្ចូលទៅក្នុងស្ទឹងសង្កែ ក៏ដូចបង្ហៀរចូលទៅក្នុងអាងទឹក ក្នុងតំបន់មួយចំនួនផ្សេងទៀត ដើម្បីអាចឱ្យកសិករអាចបូមទឹកយកទៅស្រោចស្រពដំណាំស្រូវឱ្យបានទាន់ពេលវេលា។
លោក ណែម ពក ប្រធានសហគមន៍កសិកម្មទំនើបស្រូវអង្ករសុវត្ថិភាព ស្រុកឯកភ្នំ ខេត្តបាត់ដំបង បានឱ្យដឹង ថាដំណាំស្រូវរបស់សមាជិកសហគមន៍ ដែលបានដាំដុះនៅលើផ្ទៃដីជាង ១ ៤០០ហិកតា នៅពេលកន្លងទៅអាចខូចខាត។ ប៉ុន្តែក្រោយពីមានភ្លៀងរលឹមធ្លាក់ខ្លះៗ កាលពីដើមខែកក្កដា កន្លងទៅនេះ បានធ្វើឱ្យដំណាំស្រូវខ្លះ ដែលមិនទាន់ខូចខាតធ្ងន់ធ្ងរ ហាក់មាន សភាពស្រស់ឡើងមកវិញ។
លោកប្រធានសហគមន៍កសិកម្មខាង បានវាយតម្លៃថា ដំណាំស្រូវក្នុងមួយស្រែៗរងការខូចខាតប្រហែល៣០ភាគរយ ចំណែក៧០ភាគរយផ្សេងទៀត ក្រោយពីមានភ្លៀងរលឹម ជាបន្តបន្ទាប់ហាក់មានភាពស្រស់ឡើងវិញ។ តែទោះជាបែបនេះក្តី បើនៅថ្ងៃខាងមុខមានទឹកស្រោចស្រពគ្រប់គ្រាន់ឡើងវិញ ទិន្នផលស្រូវអាចធ្លាក់ចុះ។
ស្រពពេលដំណាំស្រូវកំពុងត្រូវការទឹកដូចសព្វថ្ងៃនេះ, លោក ណែម ពក លើកឡើងថា ប្រសិនជាមានទឹកជំនន់ដងស្ទឹងសង្កែមកការស្រោចស្រង់ដំណាំស្រូវអាចបានច្រើន ដោយសារនៅក្នុងភូមិឃុំ មានម៉ាស៊ីនបូមទឹកសម្រាប់ស្រោចស្រពមួយចំនួន។ តែបច្ចុប្បន្ន ទឹកនៅក្នុងស្ទឹងសង្កែមិនទាន់ធ្លាក់ចុះទៅក្រោមទេ ហើយនៅផ្នែកខាងលើស្ទឹងសង្កែ មានទំនប់ ស្ទាក់ទឹកមានច្រើនកន្លែង។
លោកបន្តថា “សព្វថ្ងៃនេះឃើញថា នៅខាងលើទំនប់សាលាតាអន ខាងអាជ្ញាធរបានឱ្យ កសិកររៀបចំការ៉ុងច្រកដី ប្រហែលជាអាជ្ញាធរអាចទម្លាក់ទឹកពីតំបន់ខាងលើឱ្យហូរចូល អូរដូនទាវ។ បានន័យថា អាជ្ញាធរបានរៀបចំដោះស្រាយទឹកទំម្លាក់ចុះមកផ្នែកខាងក្រោម ហើយ។ តែលទ្ធផលទឹកហូរមកដល់ពេលណា មិនទាន់ដឹងច្បាស់ទេ ”។
បើតាមលោក ណែម ពក, ដំណាំស្រូវមានអាយុកាលបីទៅបួនខែ ចំណែកស្រូវស្ថិតក្នុងដំណាក់កាលអាយុជាងមួយខែនេះ បើសិនមានទឹកស្រោចស្រព អាចសង្គ្រោះស្រូវបានមួយចំនួន មកវិញ តែបើអត់ទឹកហើយ ស្រូវមានអាយុលើពីពីរខែឡើងទៅ វានិងពិបាកសង្គ្រោះ។ តែទោះជាយ៉ាងនេះក្តី ប៉ុន្មានថ្ងៃចុងក្រោយនេះ ឃើញមេឃអាចនឹងមានភ្លៀងមកបន្តទៀត ព្រោះមានពពកខ្មៅដេសដាស់ ដោយរំពឹងថា អាចនិងមានភ្លៀងធ្លាក់ស្រោចស្រពបន្ថែមទៀត ។
សូមជម្រាបជូនថា កាលថ្ងៃទី៤ ខែកក្កដា ឆ្នាំ២០២៦កន្លងទៅនេះ ថ្នាក់ដឹកនាំជាន់ខ្ពស់ក្រសួងធនធានទឹក និងឧតុនិយម បានចាត់តាំងក្រុមការងារមន្ទីរធនធានទឹក និងឧតុនិយម ខេត្តបាត់ដំបង ចុះពិនិត្យទីតាំង ដែលរងផលប៉ះពាល់ដោយសារគ្រោះរាំងស្ងួត ក្នុងភូមិសាស្ត្រស្រុកសង្កែ និងស្រុកឯកភ្នំ ដោយបានវាយតម្លៃថា ផ្ទៃដីបង្កបង្កើនផលស្រូវ ដែលរងផលប៉ះពាល់ដោយសារគ្រោះរាំងស្ងួតនៅទីតាំងទាំងពីរនេះ គឺស្ថិតនៅឆ្ងាយពីប្រភពទឹក ដែលពិបាកក្នុងការជួយសង្គ្រោះ។
ផ្ទៃដីដែលរងផលប៉ះពាល់កន្លងមកមានចំនួន១៨ ៣៦២ហិកតា ក្នុងនោះស្រុកសង្កែមានចំនួន១០ ៥៩៣ហិកតា និងស្រុកឯកភ្នំមានចំនួន៧ ៧៦៩ហិកតា។ គិតត្រឹមថ្ងៃទី៤ ខែកក្កដា ឆ្នាំ២០២៦នេះ ផ្ទៃដីដែលប្រឈមនឹងការខ្វះខាតទឹកក្នុងភូមិសាស្ត្រខាងលើបានទទួលទឹកភ្លៀងគ្រប់គ្រាន់ហើយ៕
