ដោយ អៀវ ឈៀងនី
ភ្នំពេញ៖ អាជ្ញាធរខេត្តបាត់ដំបង និងមន្រ្តីជំនាញ បានបញ្ជាក់ពីជំហររបស់ខ្លួនកាលពីថ្ងៃទី៦ ខែកក្កដានេះ ឆ្នាំ២០២៦ថា ស្ថានភាពរាំងស្ងួតនៅស្រុកឯកភ្នំ និងស្រុកសង្កែ អាជ្ញាធរ និងមន្រ្តីជំនាញកំពុងតែពិត្យមើលកន្លែងណា ដែលមានលទ្ធភាពសង្គ្រោះបាននឹងរុញទឹកជួយសង្គ្រោះភ្លាមៗជាពិសេសដំណាំស្រូវរបស់កសិករ និងមុខរបរចិញ្ចឹមសត្វ។
លោក ឈឹម វជិរា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបាត់ដំបង បានប្រាប់ទូរទស្សន៍ ARDB ថា ស្ថានភាពរាំងស្ងួត១៧ ០០០ហិកតានេះ គឺមាននៅក្នុងស្រុកសង្កែ ស្រុកឯកភ្នំ និងស្រុកនៅតាមព្រំដែនខ្លះ ពាក់ព័ន្ធរឿងដំណាំស្រូវ ដោយសារខ្វះប្រភពទឹក ហើយក្រៅពីនេះនៅសំពៅលូន កំរៀង ប៉ះពាល់តិចតួច៧០ ទៅ ១០០ហិកតាតាមតំបន់មួយចំនួន។
លោក បានមានប្រសាសន៍ថា “យើងចុះពិនិត្យជាក់ស្តែង កន្លែងណាដែលមានលទ្ធភាពសង្គ្រោះបាន គឺមន្ទីរធនធានទឹកនឹងរុញទឹក គឺយើងអត់ទុកទេប្រភពទឹកពីអាងធំៗ ដូចជា៖ អាងពហុបំណងសេកសក ឬទំនប់ទឹកកង្ហក់មានទឹកច្រើន។អាជ្ញាធរនឹងបើកទម្លាយរុញទឹកទៅជួយសង្គ្រោះភ្លាមៗដោយមិនទុកឡើយ។ ប៉ុន្តែបើសិនជានៅឆ្ងាយពិបាកបន្តិចដែលយើងនៅតែពឹងលើទឹកភ្លៀងដដែល”។
យោងតាមមន្រ្តីកសិកម្ម អាជ្ញាធរមានលទ្ធភាពអាចអន្តរាគមន៍ជួយសង្គ្រោះបានដូចជា នៅស្រុកឯកភ្នំ ជាតំបន់ដែលនៅកៀកប្រភពទឹក អាជ្ញាធរអាចជួយសង្គ្រោះបានមួយចំនួនធំ។ ដោយឡែកស្រុកសង្កែ តំបន់ខ្លះ ដូចជាតំបន់១ និងតំបន់២ ស្ថិតនៅឆ្ងាយពីប្រព័ន្ធធារាសាស្ត្រធ្វើឱ្យការនាំទឹកទៅជួយសង្គ្រោះមានការលំបាក និងត្រូវបន្តពឹងផ្អែកលើទឹកភ្លៀង។
លោក ឡែមផូរ សុថាវរិទ្ធិ នាយកប្រតិបត្តិសមាគមវារីវប្បករនៅកម្ពុជាបានលើកឡើងថា ភាពរាំងស្ងួតនេះនៅខេត្តបាត់ដំបងដូចជានៅតំបន់ទំនាបកណ្តាលបានធ្វើឲ្យមានផលប៉ះពាលមួយចំនួនដល់របរកសិកម្មជាពិសេស វារីវប្បកម្មនិងការចិញ្ចឹមសត្វធ្ងន់ធ្ងរផងដែរ ដោយសារតែអ្នកបង្កាត់និងភ្ញាស់ត្រីខ្វះទឹក ដែលធ្វើឲ្យការផ្គត់ផ្គង់កូនត្រីជួបការលំបាកដល់អ្នកចិញ្ចឹមក្នុងស្រុក និងអាចប្រឈមមុខទិន្នផលថយចុះ។
ប្រធានសមាគមខាងលើបញ្ជាក់ថា ភាពរាំងស្ងួតនៅរដូវវស្សាបច្ចុប្បន្នធ្វើឲ្យមានការបារម្ភខ្លាំងទៅហើយចុះទម្រាំបាតុភូត អែលនីណូទៀត ដែលនឹងមកដល់ខាងមុខទៀត យើងអាចមានផលប៉ះពាល់ខ្លាំងដល់វិស័យកសិកកម្ម ជាពិសេស វិស័យវារីវប្បកម្ម ដែលត្រូវការទឹកជាធំហើយខាងសមាគមក៏បានរម្លឹកដល់ កសិករដែរ គួរតែរក្សាទឹកទុកនិងរកវិធីប្រើប្រាស់ចំណីជាដើម។
ប្រទេសកម្ពុជាក៏កំពុងប្រឈមនឹងបម្រែបម្រួលអាកាសធាតុដែលអាចបណ្តាលឱ្យមានភាពមិនទៀងទាត់នៃរដូវភ្លៀង និងការកើនឡើងនៃហានិភ័យគ្រោះរាំងស្ងួតនៅតំបន់កសិកម្មមួយចំនួន។ ជុំវិញបញ្ហានេះ អាជ្ញាធរខេត្តបាត់ដំបងបានធ្វើការផ្សព្វផ្សាយតាំងពីដំបូងទីដល់កសិករមួយចំនួននៅតាមតំបន់ខ្លះ បានដឹងក៏ពន្យារពេលការដាំដុះ។
លើសពីនេះរដ្ឋបាលខេត្តបានត្រៀមលក្ខណៈស្នើទៅរាជរដ្ឋាភិបាល ក្នុងការត្រៀមជាកញ្ចប់ស្បៀងបម្រុង និងគ្រាប់ពូជស្រូវសម្រាប់ចែកជូនកសិករ ធ្វើការស្តារឡើងវិញ បើសិនជានៅក្នុងករណីតំបន់ណា ដែលមានប្រភពទឹកគ្រប់គ្រាន់។
បាតុភូតកម្តៅហួតហែង អែលនីញ៉ូ ត្រូវបានព្យាករណ៍ថា នឹងវាយលុក និងគ្របដណ្តប់វិសាលភាពរហូតដល់ទៅ៦៣ភាគរយ នៃភពផែនដីទាំងមូល នៅក្នុងអំឡុងពេលពីខែវិច្ឆិកា ដល់ខែមករាខាងមុខនេះ។ យោងតាមការព្រមានពីទីភ្នាក់ងារគ្រប់គ្រងមហាសមុទ្រ និងបរិយាកាសជាតិអាម៉េរិក ពិភពលោកត្រៀមនឹងជួបវិបត្តិគ្រោះធម្មជាតិក្តៅសាហាវបំផុតនៅក្នុងឆ្នាំ២០២៧ ដែលវានឹងបំផ្លិចបំផ្លាញវិស័យកសិកម្មយ៉ាងធ្ងន់ធ្ងរ។
យោងតាមរបាយការណ៍ គិតចាប់ថ្ងៃទី ១៣ ខែមិថុនា ដល់ថ្ងៃទី៦ ខែកក្កដា ឆ្នាំ២០២៦ គ្រោះរំាងស្ងួតប៉ះពាល់ខេត្តចំនួនបួនគឺ ខេត្តកំពង់ធំ ផ្ទៃដីទំហំ១៥២ហិកតា និងផ្ទៃដីប្រឈម ៧ ៧៨៨ហិកតា។ ខេត្តបន្ទាយមានជ័យ ផ្ទៃដីទំហំ៦ ៤៣៦ហិកតា ខេត្តបាត់ដំបង ផ្ទៃដីទំហំ១៨ ៣៦២ហិកតា និងេខេត្តសៀមរាប ផ្ទៃដីទំហំ១៩ ៥០៣ហិកតា ស្មើ៤៨ឃុំនៃស្រុកចំនួន១២ មានផ្ទៃដីសរុបចំនួន៤៤ ៤៥៣ហិកតា បាននឹងកំពុងខ្វះខាតទឹកស្រោចស្រព្វ ព្រោះពុំមានភ្លៀងគ្រប់គ្រាន់ និងស្ទឹងបឹងបួររីងស្ងួត នៅសល់សម្រាប់មនុស្ស និងសត្វប្រើប្រាស់់។
ដោយឡែកផ្ទៃដីកសិកម្មទំហំ៧ ៧៨៨ហិកតា ខេត្តកំពង់ធំបាននឹងកំពង់សង្គ្រោះ ដោយ ឯកឧត្តម អភិបាលខេត្តដឹកនាំមន្ទីរជំនាញ ដាក់ម៉ាស៊ីនបូមទឹកចំនួនប្រាំមួយកន្លែង និងមានភ្លៀងធ្លាក់ជាប់គ្នា បានពីរបីថ្ងៃ និងខេត្តសៀមរាបមានភ្លៀងធ្លាក់បណ្តើរៗហើយ។
ឯកឧត្តមអភិបាលខេត្ត បានដឹកនាំមន្ទីរជំនាញ និងក្រុមការងារចុះពិនិត្យផ្ទាល់ និងបានដាក់ម៉ាស៊ីនបូបទឹក សម្រាប់សង្រ្គោះដំណាំស្រូវ និងមានភ្លៀងធ្លាក់ពីរបីថ្ងៃជាប់គ្នា ស្រូវចាប់ផ្តេីមលូតលាស់ឡេីងវិញ។ រហូតដល់ពេលនេះ ដំណាំស្រូវពុំទាន់មានការខូចខាត និងបាត់បង់នៅឡើយទេ។
ចំណែកលោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍ថា «ចំពោះបញ្ហានេះ គឺយើងបានសង្គ្រោះបានខ្លះហើយ ដូចជានៅខេត្តកំពង់ធំ ដោយសារប៉ុន្មានថ្ងៃមកនេះ មានភ្លៀងធ្លាក់មក។ ចំពោះខេត្តបីទៀត គឺមិនមានប្រភពទឹកគ្រប់គ្រាន ចំណែកទឹកដែលសល់នៅក្នុងបឹងត្រពាំង ឬស្រះ គឺទុកសម្រាប់ប្រជាពលរដ្ឋប្រើ និងទុកសម្រាប់សត្វផឹក តែយ៉ាងណាខេត្តទាំងបីនោះ ក៏មិនមានការខូចខាត ដែលថាសង្គ្រោះមិនបាននោះដែរ។ ជាមួយគ្នា គណៈកម្មាធិការជាតិគ្រប់គ្រងគ្រោះមហន្តរាយ បានឱ្យមន្ត្រីជំនាញ និងអាជ្ញាធរមូលដ្ឋានយកចិត្តទុកដាក់ខ្ពស់ ចំពោះបញ្ហានេះ។
ជាមួយគ្នានេះដែរ ក៏មានការស្នើទៅក្រសួងធនធានទឹក និងឧតុនិយម ឱ្យចូលរួមក្នុងការអន្តរាគមន៍ ដើម្បីរកប្រភពទឹកជួយសង្គ្រាះដែរ ប្រសិនបើមានបញ្ហាដល់ការមានការងាប់ស្រូវ។ ចំណែកខាងក្រសួងកសិកម្ម រុក្ខាប្រមាញ់ និងនេសាទ ក៏បានត្រៀមពូជស្រូវ សម្រាប់ធ្វើស្រែឡើងវិញដែរ បើស្រូវក្នុងខេត្តទាំងបួននេះ មានកូនរដ័វប្រាំងអូសបណ្តាលយូរ ដោយសារមានបាតុភូតអែលនីញ៉ូនឹងកើតឡើង៕
